Tihlabelelo 42 - Siswati 1996 Bible

Sigaba sesibili (Tihlabelelo 42 – 72) Komela Nkulunkulu

Sihlabelelo lesiyimaskili sentalelwane yaKhora, lesetfulwe kumhlabelisi.

¹ Njengendluzele yomele emanti emfula, kanjalo nemphefumulo wami ulangatelela wena, Nkulunkulu.

² Umphefumulo wami womele Nkulunkulu, yena lowo Nkulunkulu lophilako. Ngiyawufika nini ngibonakale embikwaNkulunkulu?

³ Tinyembeti tami tikudla kwami busuku nemini, ngobe lilanga lonkhe bantfu bangichwephesha batsi: “Kantsi ushonephi loNkulunkulu wakho?”

⁴ Nangikhumbula emuva, inhlitiyo yami iyabibitseka ngekhatsi kwami. Ngangihamba nesicuku lesikhulu ngisihola embili ngiya endlini yaNkulunkulu sihlabela ngekujabula lokukhulu.

⁵ Mphefumulo wami, udzabukeleni? Uvungamelani ngekhatsi kimi? Mani kuNkulunkulu, ngobe ngisetawumdvumisa uMsindzisi wami naNkulunkulu wami.

⁶ Umphefumulo wami udzabukile ngekhatsi kwami, ngako-ke ngiyawukukhumbula ngiseseJordane, nasetintsabeni taseHemoni netaseMisari.

⁷ Ngiva umsindvo wemanti lageletako, titiba nemabhudlo timemetana todvwana, shangatsi ngigujetelwa ngemagagasi netikhukhula temfula logcwele.

⁸ Shangatsi Simakadze angakhombisa umusa wakhe kimi emini, kuze kutsi ebusuku ngihlabele ngimdvumise, ngikhuleke kuNkulunkulu wekuphila kwami.

⁹ Ngikhuluma kuNkulunkulu ngitsi: “Dvwala lami, kwentiwa yini kutsi ungikhohlwe? Kungani ngihambe ngilila ngenca yekucindzetelwa sitsa?”

¹⁰ Shangatsi kufohloteka ematsambo ami titsa natingihheletela lilanga lonkhe, titsi: “Kantsi uphi loNkulunkulu wakho?”

¹¹ Mphefumulo wami, udzabukeleni? Uvungamelani ngekhatsi kwami? Mani kuNkulunkulu, ngobe ngisetawumdvumisa uMsindzisi wami naNkulunkulu wami.