Tihlabelelo 41 - Siswati 1996 Bible

Sekucela kuphiliswa

Sihlabelelo saDavide lesetfulwe kumhlabelisi.

¹ Ubusisiwe umuntfu lonakekela lobutsakatsaka, Simakadze uyawumsindzisa ngelilanga lekuhlupheka.

² Simakadze uyawumlondvolotela imphilo yakhe; uyawumenta abe ngulonenhlanhla emhlabeni, angeke amnikele entsandvweni yetitsa takhe.

³ Simakadze uyawumcinisa nakagula, amphilise nakubo bonkhe butsakatsaka bakhe.

⁴ Mine-ke ngatsi: “Awu, Simakadze, ngihawukele, ungiphilisele umphefumulo wami, ngobe ngonile kuwe.”

⁵ Titsa tami tikhuluma kabi ngami, titsi: “Kantsi yena uyawufa nini libito lakhe litewuphela?”

⁶ Nakukhona lotengihlola ufike atentise angitsatse ematfoko, kantsi enhlitiyweni yakhe ugaya tiboti ngami, utsi angesuka lapho ayifafate lonkhe live.

⁷ Bonkhe labangitondzako bahlebelana ngami, basonge lokubi kakhulu ngami.

⁸ Batsi: “Ubanjwe sifo lesesabekako, angeke aphindze avuke.”

⁹ Ngisho nemngani wami lengangimetsemba, nalengangidla esitjeni sinye naye, sewungidlangele ngebunyoka nebumbulu.

¹⁰ Kepha wena, Simakadze, ngihawukele ungiphilise, kuze ngitiphindzisele kubo.

¹¹ Ngati kahle kamhlophe kutsi wena uyangitsandza, ngobe sitsa sami awukasivumeli kutsi sitigabatise ngekungehlula.

¹² Yebo, ungisimisa ngebucotfo bami ungimise ebukhoneni bakho, phakadze naphakadze.

¹³ Akabongwe Simakadze, Nkulunkulu wema-Israyeli, kusukela phakadze kuze kube phakadze. Amen! Yebo, Amen!