Tihlabelelo 4 - Siswati 1996 Bible

Umkhuleko wakusihlwa walowetsembele kuNkulunkulu

Sihlabelelo saDavide lesetfulwe kumhlabelisi kutsi sihlatjelwe ngetingubhu.

¹ Ngiphendvule nangikhala kuwe, wena Nkulunkulu ukulunga kwami. Ekucindzetelweni kwami uyangikhulula; ngihawukele, ukwemukele kuncenga kwami.

² Madvodza! Kuyawuze kube ngunini libito lami linyembenywa? Kuyawuze kube ngunini nitfungatsa lite nilandzelana nemanga? Cabanga.

³ Kodvwa kufanele nati kutsi Simakadze utehlukanisele lolungile. Simakadze uyangiva nangikhala kuye.

⁴ Nanitfukutsele ningoni, cabangisisani nisathulile etinhlitiyweni tenu, nisacambalele emacansini enu. Cabanga.

⁵ Nikelani ngemihlatjelo leyemukeleka kuNkulunkulu, bese nibeka litsemba lenu kuSimakadze.

⁶ Labanyenti batsi: “Ngubani longasentela tintfo letinhle?” Simakadze, sikhanyisele ngebukhona bakho.

⁷ Ungiphe injabulo lenkhulu enhlitiyweni yami, leyengca injabulo lababa nayo nabanenala yemabele neyeliwayini.

⁸ Ngitawutilahla phansi, ngilale butfongo ngekuthula, ngobe nguwe wedvwa, Simakadze, longenta ngihlale ngiphephile.