Tihlabelelo 21 - Siswati 1996 Bible

Umthandazo wekubonga kuncotjwa kwesitsa

Sihlabelelo saDavide lesetfulwe kumhlabelisi.

¹ Yebo, Simakadze, inkhosi iyajabula ngemandla loyiphe wona. Kukhulu kanganani kujabula kwayo, ngekuncoba loyentele kona.

² Uyiphe sifiso senhlitiyo yayo, futsi awuyigodlelanga leyayikucela ngemlomo wayo. Cabanga.

³ Uyihlangabete ngetibusiso letinalokuhle, wayetfwesa enhloko yayo umchele wegolide lecengekile.

⁴ Yacela imphilo kuwe, wena wayipha emalanga lamadze phakadze naphakadze.

⁵ Tidvumo tayo tinkhulu, ngenca yelusito lwakho, uyinike ludvumo nebukhosi.

⁶ Wayenta yabusiseka kakhulu kuze kube phakadze, uyitfokotisa ngenjabulo ebusweni bakho.

⁷ Inkhosi yetsembele kuSimakadze, ngenca yesihawu saLosetikwako Konkhe ingeke itanyatanyiswe.

⁸ Sandla sakho siyawutibhadzama tonkhe titsa takho; sandla sakho sangesekudla siyawubabhadzama bonkhe labakutondzako.

⁹ Mhla kubonakala wena, uyawubashisa babe ngumlilo lowesabekako nalohhumako. Simakadze uyawubacedza ngentfukutselo yakhe, abacotfule ngemlilo.

¹⁰ Uyawubhubhisa intalo yabo emhlabeni, ushabalalise nebantfwababo emkhatsini walabanye bantfu.

¹¹ Nome bebahlose lokubi ngawe, bacondze kukugangela, kodvwa bangeke baphumelele.

¹² Uyawubenta babaleke, ubadubule ngemicibisholo yakho.

¹³ Yebo, Simakadze! Awuphakanyiswe emandleni akho! Tsine siyawuhlabela sidvumise emandla akho.