Tihlabelelo 18 - Siswati 1996 Bible

Davide uhlabela ngekusindziswa nangekuncoba kwakhe

Sihlabelelo saDavide, inceku yaSimakadze, lesetfulwe kumhlabelisi. Siyingoma Davide layicamba abhekise kuSimakadze ngesikhatsi asamephule etandleni tato tonkhe titsa takhe, nasesandleni saSawula. Davide watsi:

¹ Ngiyakutsandza, Simakadze, wena, longemandla ami.

² Simakadze, ulidvwala lami, nenqaba yami, neMkhululi wami. Nkulunkulu wami, ulidvwala lami lengiphephela kulo. Usihlangu sami sekungivikela nemandla ensindziso yami. Yena ungumgedze wami wekubhaca.

³ Ngikhala kuSimakadze, bese uyangephula etitseni tami. Akadvunyiswe Simakadze!

⁴ Tintsambo tekufa tangitungeleta, tikhukhula tembhubhiso tangigabudzela.

⁵ Tintsambo telithuna tatingitsandzele, tingibe tekufa tangitfonya.

⁶ Ngakhala kuSimakadze ngisekudzangaleni kwami, ngacela lusito kuNkulunkulu wami. Waliva livi lami asendlini yakhe, kuncusa kwami, nekukhala kwami, nekuthandaza kwami kwangena etindlebeni takhe.

⁷ Umhlaba watfutfumela, watamatama, netisekelo tetintsaba tatfutfumela, tatamatama, ngobe Somandla abesatfukutsele.

⁸ Emakhala akhe akhafula intfutfu, umlomo wakhe wakheputa umlilo locotfulako kuwo kwakhehleka emalahle labovu.

⁹ Wabhobosa emazulu, wehlela phansi. Emafu lamnyama abengaphansi kwetinyawo takhe.

¹⁰ Wagibela likherubhi, wandiza, wantjuza asetikwemaphiko emoya.

¹¹ Wenta bumnyama baba yingubo yakhe, watungeletwa ngemafu lahlomile, lamnyama.

¹² Ebukhatikhatini bebukhona bakhe kwaphambana imibane, kwavela emafu lamnyama lahlomile, kwehla sangcotfo nemalahle lavutsako.

¹³ Simakadze wabhavumula asezulwini. Losetikwako Konkhe walivakalisa livi lakhe, kwehla sangcotfo nemalahle lavutsako.

¹⁴ Wajijimeta ngemicibisholo yakhe, kwasakateka titsa, watigalela ngemibane, watidzidzitelisa, tasiphuka.

¹⁵ Kujula kwetilwandle kwenekeka ebaleni, tisekelo temhlaba tembuleka, ngenca yekutsetsa kwakho, Simakadze, nangenca yekufutsa kwemakhala akho.

¹⁶ Welula ingalo yakhe akulelisetulu, wayehlisela phansi, wangibamba, wangenyula ekujuleni kwemanti.

¹⁷ Wangephula esitseni sami lesinemandla, wangephula nakulabangitondzako, ngobe babenemandla kakhulu kunami.

¹⁸ Bangidvumela ngesikhatsi ngehlelwa sehlakalo, kodvwa Simakadze waba sihlangu sami.

¹⁹ Wangikhiphela endzaweni lebanti; wangephula, ngobe abejabula ngami.

²⁰ Simakadze wangiphatsa njengekulunga kwami, wangivuza njengebumsulwa betandla tami,

²¹ ngobe imiyalo yaSimakadze ngiyigcinile. Angikenti lutfo lolubi; angikamfulatseli Nkulunkulu wami.

²² Yonkhe imiyalo yaNkulunkulu isembikwami, angikatikhweshisi kimi timiso takhe.

²³ Bengisolo ngite sici embikwakhe, ngitigcinile ngangete ngona.

²⁴ Ngako-ke Simakadze ungivuze njengekulunga kwami, ngobe uyati kutsi tandla tami timsulwa.

²⁵ Kulowetsembekile wena utibonakalisa wetsembekile, kulongenacala wena utibonakalisa ucotfo,

²⁶ kulohlantekile wena utibonakalisa uhlantekile, kodvwa kulosigwegwe wena utibonakalisa ulukhuni.

²⁷ Wena, losindzisa labatfobekile, uyabatfobisa labatigabatisako.

²⁸ Nguwe lowokhela sibane sami, Simakadze, Nkulunkulu wami; ugucula bumnyama bami abente bube kukhanya.

²⁹ Ngawe ngisengayidvungulula imphi; ngaloNkulunkulu wami ngisengagalaja lubondza lwetitsa.

³⁰ Indlela yaNkulunkulu ilungile, livi laSimakadze letsembekile. Yena usihlangu sabo bonkhe labaphephela kuye.

³¹ Kambe nje ngubani longuNkulunkulu, ngaphandle kwaSimakadze? Ngubani lolidvwala, ngaphandle kwaloNkulunkulu wetfu?

³² Nguye loNkulunkulu longihlomisa ngemandla, ente indlela yami icondze, ibe msulwa.

³³ Wenta tinyawo tami tibe lula njengetenyamatane, angente ngiphephele ekuphakameni.

³⁴ Yena wenta tandla tami tifundzele kulwa, kuze imikhono yami yetayele kugoba butjoki belitfusi.

³⁵ Ungihlomisa ngesihlangu sensindziso yakho. Sandla sakho sangesekudla sangisimisa, utehlisa wena kuze uphakamise mine.

³⁶ Wentele tinyatselo tami indzawo lebanti kuze emacakala ami angabhinyiliki.

³⁷ Titsa tami ngaticosha, ngaze ngatikhandza, ngativimbetela, angizange ngincandzeke ngingakaticedzi.

³⁸ Ngatiphahlata taze tehluleka kuvuka, tawela ngaphansi kwetinyawo tami.

³⁹ Wangihlomisa ngemandla ekulwa imphi. Titsa tami watitfobisa ngaphansi kwami.

⁴⁰ Titsa tami watidvungulula, tabaleka, ngabacedza bonkhe labangitondzako.

⁴¹ Bakhala, bacela lusito, kodvwa kwabate lobasindzisako; bahlaba inyandzaleyo kuSimakadze, kodvwa akazange abaphendvule.

⁴² Ngabagaya baba njengelutfuli lolupheshulwa ngumoya, ngabasaphata njengeludzaka lwendlela.

⁴³ Wangisindzisa embangweni wesive sakitsi, wangibeka ngaba yinhloko yetive. Sive lengingazange sengisati sitangikhotsama.

⁴⁴ Betive batsi bangangiva, bangihlonipha masinyane, beta kimi bakhasa.

⁴⁵ Bonkhe baphelelwa ngemandla, beta bachachatela baphuma emigedzeni yabo.

⁴⁶ Simakadze uyaphila! Alidvunyiswe lidvwala lami! Akaphakanyiswe Nkulunkulu loyinsindziso yami!

⁴⁷ UnguNkulunkulu longiphindziselelako, lotsambisa tive ngaphansi kwami.

⁴⁸ Wangikhulula etitseni tami, wangiphakamisa ngaba ngetulu kwalabo labamelene nami, wangephula kubantfu belutfutfuva.

⁴⁹ Ngako-ke ngiyawukudvumisa wena, Simakadze, emkhatsini wetive, ngikugambute ngetibongelelo teLibito lakho.

⁵⁰ Nguwe, Nkhosi, umenti wankhulu, inkhosi yakho uyiphe kuncoba timphi ngetimphi, wentele logcotjiwe wakho umusa wakho longapheli, yebo, Davide netitukulwane takhe, phakadze naphakadze.