Tihlabelelo 16 - Siswati 1996 Bible

Lifa lelihle kakhulu lelinguNkulunkulu

Sihlabelelo saDavide lesiligugu njengegolide kuye.

¹ Ngilondvolote, Nkulunkulu, ngobe ngikhosele kuwe.

² KuSimakadze ngitsi: “Wena uyiNkhosi yami. Kute lokuhle lengingaba nako ngaphandle kwakho.”

³ Kodvwa ngalabangcwele labalapha emhlabeni ngitsi: “Batikhulu letincabile lengijabula ngato.”

⁴ Tinkhatsato titakwandziswa kulabo labanikela kubonkulunkulu labanye. Ngingeke ngiyicitse ingati kutsi ibe ngumnikelo kulabanye bonkulunkulu. Ngingeke ngikhuleke kubo.

⁵ Simakadze, wena usabelo lesilifa lami, ungipha konkhe lengikudzingako. Likusasa lami lisetandleni takho.

⁶ Lifa lelingumhlaba, lengisikelwe wona, liyindzawo lenhle kakhulu.

⁷ Ngiyamdvumisa Simakadze lowangeluleka, nanembeza wami uyangiyala ebusuku.

⁸ Emehlo ami ayawunamatsela kuSimakadze phakadze naphakadze. Yena ungasesandleni sami sangesekudla, ngiyawuhlala kuye ngitinte.

⁹ Ngako-ke inhlitiyo yami iyatfokota, nemoya wami uyajabula, nemtimba wami ulondvolotekile.

¹⁰ Ngobe ungeke uvume kungiyekelela endzaweni yalabafile, nome-ke ungeke umvumele lotsandzekako wakho kutsi abole ethuneni.

¹¹ Uyawungifundzisa indlela yekuphila. Lapho kukhona khona wena kunekujabula lokuphelele. Esandleni sakho sangesekudla kunekujabula phakadze naphakadze.