Tihlabelelo 148 - Siswati 1996 Bible

Yonkhe indalo ayidvumise Nkulunkulu

Haleluya, dvumisani Simakadze!

¹ Dvumisani Simakadze nine mazulu laphakeme, nidvumise Simakadze nani lenisezulwini.

² Mdvumiseni nine tingilosi takhe, nimdvumise nani nonkhe mabutfo akhe.

³ Mdvumise wena langa, nawe nyanga, nimdvumise nani nonkhe tinkhanyeti letikhatimulako!

⁴ Mdvumiseni nine mazulu laphakeme, nani manti langetulu kwesibhakabhaka.

⁵ Konkhe akudvumise libito laSimakadze, ngobe wakhuluma kwadaleka.

⁶ Wakumisa etindzaweni tako phakadze naphakadze, wakushayela umtsetfo longenakweciwa.

⁷ Dvumisani Simakadze nine lenisemhlabeni, nani tilwane letesabekako taselwandle, nawe kujula kwelwandle,

⁸ nawe mlilo nesangcotfo, nelichwa, netinkhungu, nemoya lonemandla lolalela imiyalo yakhe.

⁹ Mdvumiseni nine magcuma netintsaba tonkhe, nimdvumise nani tihlahla tetitselo, nani nonkhe mahlatsi,

¹⁰ nine tilwane tesiganga netekufuywa, nani lenihamba ngesisu, netinyoni letindizako.

¹¹ Mdvumiseni nine makhosi netive tonkhe, nimdvumise nani tikhulu nebabusi bonkhe bemhlaba,

¹² nani majaha netintfombi, nani labadzala nalabancane.

¹³ Bonkhe abadvumise libito laSimakadze, ngobe lakhe kuphela libito leliphakeme; inkhatimulo yakhe ingetulu kwemhlaba nelizulu.

¹⁴ Sive sakhe usivusele insindziso, kuze kudvunyiswe bonkhe labangcwele bakhe, lekusive saka-Israyeli, lesisedvute naye. Haleluya, dvumisani Simakadze!