Tihlabelelo 146 - Siswati 1996 Bible

Kudvumisa Nkulunkulu ngemisebenti yakhe yekulunga

Haleluya, dvumisani Simakadze.

¹ Mphefumulo wami, dvumisa Simakadze.

² Simakadze ngiyawumdvumisa ngisaphila, ngihlabele kuNkulunkulu wami yonkhe imphilo yami.

³ Ningetsembeli etikhulwini nakubantfu, kute kubantfu lusito.

⁴ Nakuphuma umphefumulo, umuntfu ubuyela emhlabatsini, tinhloso netifiso takhe tiphele ngalelo langa.

⁵ Ubusisiwe umuntfu lomsiti wakhe kunguNkulunkulu waJakobe, lolitsemba lakhe likuSimakadze, Nkulunkulu wakhe.

⁶ Yena unguMdali wako konkhe: Wadala lizulu, nemhlaba, nelwandle, nako konkhe lokukuko. Ugcina setsembiso sakhe kuze kube phakadze.

⁷ Labacindzetelwe yena uyabemelela, abaphe kudla labalambile. Simakadze ukhulula tiboshwa,

⁸ Simakadze uvula emehlo etimphumphutse, Simakadze uyabaphakamisa labatfotjisiwe, Simakadze uyabatsandza labalungile.

⁹ Simakadze uyabalondvolota bafokati, uyabaphasa bafelokati netintsandzane, kodvwa indlela yalababi uyayibhubhisa.

¹⁰ Simakadze uyawubusa kuze kube phakadze. Nkulunkulu wakho, Siyoni, ubusa kuto tonkhe titukulwane. Haleluya, dvumisani Simakadze.