Tihlabelelo 143 - Siswati 1996 Bible

Umthandazo wekucela lusito (Sihlabelelo sesikhombisa sekutisola)

Sihlabelelo saDavide.

¹ Simakadze, vani umkhuleko wami ubeke indlebe yakho ekuncengeni kwami, ungiphendvule njengekwetsembeka kwakho nangekulunga kwakho.

² Ungangibeki licala mine, nceku yakho, ngobe kute umuntfu lomsulwa kuwe.

³ Sitsa siyangitingela, singicindzetela phansi emhlabatsini singivimbetela ebumnyameni njengalabakadze bafa.

⁴ Ngako-ke umoya wami udzangele, nenhlitiyo yami iyatfutfumela.

⁵ Ngikhumbula emalanga asendvulo. Ngizindla ngemisebenti yakho yonkhe, ngicabange ngato tonkhe tento takho.

⁶ Tandla tami ngitiphakamisela kuwe, umphefumulo wami womela wena njengemhlabatsi lowomele imvula. Cabanga.

⁷ Sheshisa, Simakadze, ungiphendvule; umoya wami ushona phansi. Ungangifihleli buso bakho, funa ngibe njengalabashona emgodzini.

⁸ Ngivise umusa wakho ekuseni nakudzabuka kusa, ngobe litsemba lami lonkhe likuwe. Ngifundzise indlela lekufanele ngihambe ngayo, ngobe umphefumulo wami ngiwuphakamisela kuwe.

⁹ Ngikhulule etitseni tami, Simakadze, sengibalekele kuwe ngabhaca.

¹⁰ Ngifundzise kwenta intsandvo yakho, ngobe wena unguNkulunkulu wami. Moya wakho lomuhle akangiholele endleleni lebekile.

¹¹ Ngenca yelibito lakho, Simakadze, ngigcinele imphilo yami; ngekulunga kwakho ngephule etinhluphekweni.

¹² Bhubhisa tonkhe titsa tami ngekwemusa wakho, ubacedze bonkhe labemelene nami, ngobe mine ngiyinceku yakho.