Tihlabelelo 142 - Siswati 1996 Bible

Umthandazo wekucela lusito ngesikhatsi sekuhlupheka

Imaskili lengumthandazo waDavide ngesikhatsi asemhumeni.

¹ Ngikhala kuSimakadze ngelivi lami. Ngincenga Simakadze ngelivi lami.

² Ngititfululela kuye tonkhe tikhalo tami, ngimtjele tonkhe tinhlupheko tami.

³ Umoya wami nase uphelelwa ngemandla, wena ucaphela tinyatselo tami. Endleleni lapho ngitawuhamba khona bangifihlele lugibe.

⁴ Nangicalata eceleni kwami, ngikhandza kutsi kute namunye longangisita, kute longivikelako, kute nalonginakile.

⁵ Ngikhala kuwe, Simakadze, ngitsi: “Wena usiphephelo sami, nesabelo sami ngisaphila.”

⁶ Vani kukhala kwami, ngobe ngicindzeteleke kakhulu. Ngephule kulabo labangitingelako, ngobe banemandla kunami.

⁷ Ngikhulule kulelijele lengikulo, kuze ngitewubonga libito lakho. Labalungile bayawungihaca, ngobe wena uyawungiphatsa kahle.