Tihlabelelo 141 - Siswati 1996 Bible

Umthandazo locela kuvikelwa kulokubi

Sihlabelelo saDavide.

¹ Ngikhala kuwe, Simakadze; vani livi lami, nangikhala kuwe.

² Shangatsi umthandazo wami ungaba njengemphepho kuwe; nekuphakamisa kwami tandla akube kuwe njengemihlatjelo yakusihlwa.

³ Simakadze, beka umlindzi emlonyeni wami; ungeluse, ngingakhulumi lutfo ngemawala.

⁴ Ngente ngingakutsandzi kwenta lokubi, ngingahlanganyeli nalababi emisebentini yabo lemibi, ngingahlanganyeli nasemadzilini abo.

⁵ Ngingamane ngijeziswe ngumuntfu lolungile, loko kungumusa kimi; angamane angitsetsise, loko kungemafutsa enhloko yami, kodvwa umkhuleko wami uphambene netento letimbi talababi.

⁶ Mhlazana babusi babo bayawujikijelwa phansi emaweni, ngumzukwana bayawufundza kutsi emavi ami aliciniso.

⁷ Njengetinkhuni tijutjwa tiba ticucu, ngalokufananako ematsambo abo ayawusakateka ngasekungeneni kwelithuna.

⁸ Awu, Simakadze, Somandla, emehlo ami anamatsele kuwe ngiphephela kuwe, ungangiyekeleli ekufeni.

⁹ Ngihlenge elugibeni labangibekele lona, ungigcine kubosochaka balababi.

¹⁰ Lababi ababanjwe tingibe tabo, kodvwa mine ngendlule ngiphephile.