Tihlabelelo 139 - Siswati 1996 Bible

Nkulunkulu wati konkhe, ukhona yonkhe indzawo

Sihlabelelo saDavide lesetfulwe kumhlabelisi.

¹ Simakadze ungihlolisisile, uyangati.

² Uyakwati kuhlala kwami nekuvuka kwami, imicabango yami uyati ingakaveli.

³ Uhlolisisa kuhamba kwami nekulala kwami, uyatati tonkhe tindlela tami.

⁴ Livi litsi liselulwimini lwami, wena, Simakadze, ube sewulati ngalokuphelele.

⁵ Ungitungeletile ngemuva nangembili, wangivikela ngesandla sakho.

⁶ Indlela longati ngayo iyangimangalisa, iphakeme, ngingeke ngifinyelele kuyo.

⁷ Ngingayaphi ngisuke kuMoya wakho? Ngingashona kuphi ngibaleke ebusweni bakho?

⁸ Nangikhuphukela emazulwini, wena ulapho, nangendlala licansi lami endzaweni yalabafile, wena ulapho.

⁹ Nangingandiza ngetimphiko tentsatsakusa, ngiye ngihlale emikhawulweni yelwandle,

¹⁰ nakhona lapho sandla sakho besiyawungihola, sekudla sakho singibambe singicinise.

¹¹ Nome bengingatsi: “Bumnyama abungisibekele, kukhanya kugucuke kube busuku lobungitungeletile,”

¹² bumnyama bebungeke bube mnyama kuwe, busuku bebuyawukhanya njengemini, ngobe bumnyama bufanana nekukhanya kuwe.

¹³ Ngobe nguwe lowadala imibilini yami, wangeluka esiswini samake.

¹⁴ Ngiyakudvumisa ngobe ngentiwe ngendlela leyesabekako nalemangalisako. Imisebenti yakho iyamangalisa, loko ngikwati kahle kamhlophe.

¹⁵ Ematsambo ami abengakafihlakali kuwe, ngesikhatsi ngibunjwa ekusitsekeni ngelukwa esiswini samake.

¹⁶ Wangibona ngiselihlwili. Onkhe emalanga ami abhalwa encwadzini yakho, ajutjwa, lisengakefiki nalinye lawo.

¹⁷ Imicabango yakho ijulile, Nkulunkulu! Maye, bukhulu bunyenti bayo!

¹⁸ Nangingayibala, ingaba minyenti kwendlula tinhlavu tesihlabatsi. Nangivuka, wena usenami.

¹⁹ Shangatsi wena, Nkulunkulu, ungababhubhisa lababi. Ngako-ke sukani kimi, nine bantfu bengati.

²⁰ Bayakuhlambalata, laba labatitsa takho bakhuluma kabi ngelibito lakho.

²¹ Simakadze, angibatondzi yini labo labatondza wena? Anginengwa yini ngulabo labakuvukelako?

²² Ngibazonda ngenzondo lephelele. Ngibatsatsa njengetitsa tami.

²³ Ngihlolisise, Nkulunkulu, wati inhlitiyo yami! Ngilinge, wati imicabango yami,

²⁴ ubone kutsi kute yini lokubi ekuhambeni kwami, bese ungiholela endleleni yaphakadze.