Tihlabelelo 132 - Siswati 1996 Bible

Umthandazo wekucela tibusiso ethempelini

Ingoma yekuya emikhosini.

¹ Yebo, Simakadze, khumbula Davide, kanye nato tonkhe tinhlupheko takhe.

² Khumbula tifungo takhe kuSimakadze, netetsembiso latenta kuSomandla waJakobe nakatsi:

³ “Ngingeke ngingene endlini yami, nome ngicambalale nasembhedzeni wami,

⁴ nemehlo ami ngingeke ngiwanike butfongo, netinkhophe tami kwetela,

⁵ ngingakamtfoleli Simakadze indzawo, ngakhe likhaya laSomandla waJakobe.”

⁶ Seva ngelibhokisi lesivumelwane ngesikhatsi siseBhetlehema, salikhandza kulaseJeyarimu.

⁷ Asambe siye lapho ahlala khona, siyewukhonta esenabelweni setinyawo takhe.

⁸ Phakama, Simakadze, uye endzaweni yakho yekuphumula, wena nelibhokisi lesivumelwane sakho, lelingumfanekiso wemandla akho.

⁹ Baphristi bakho abembatse kulunga, labangcwele bakho bahlabele ngekwetsaba.

¹⁰ Ngenca yaDavide, inceku yakho, ungamfulatseli umgcotjwa wakho.

¹¹ Simakadze wafunga kuDavide, wenta sifungo langeke ajike kuso, watsi: “Lomunye wemadvodzana akho ngiyawumenta abe yinkhosi emvakwakho.

¹² Nangabe bantfwabakho bagcina sivumelwane sami netimiso tami lengiyawubafundzisa tona, nebantfwababo futsi bayawuhlala esihlalweni sakho sebukhosi, kuze kube phakadze.”

¹³ Ngobe Simakadze uyikhetsile iSiyoni, kutsi ibe likhaya lakhe, watsi:

¹⁴ “Lena yindzawo yami yekuphumula, ngiyawuhlala kuyo phakadze naphakadze; lena yindzawo lengifuna kuyibusa.

¹⁵ Ngiyawuyibusisa ngako konkhe lekudzingako; ngesutsise timphuya tayo ngekudla.

¹⁶ Baphristi bayo ngiyawubembatsisa ngensindziso, labangcwele bayo bahlabele ngekujabula.

¹⁷ Ngiyawuvusa lomunye wetitukulwane taDavide, ngimente abe yinkhosi lenkhulu. Umgcotjwa wami ngimlungiselele sibane, kutsi bukhosi bakhe bukhanye njalo.

¹⁸ Titsa takhe ngiyawutembesa ngelihlazo, kodvwa umbuso wakhe uyawuphumelela uchume.”