Tihlabelelo 105 - Siswati 1996 Bible

Imisebenti lemangalisako yaSimakadze layentela Israyeli

¹ Bongani Simakadze, nibite libito lakhe, nimemetele tento takhe emkhatsini wetive.

² Hlabelani kuye, nimdvumise, nibalise ngetimangaliso takhe tonkhe.

³ Tibongeni ngelibito lakhe lelingcwele, atijabule tinhlitiyo talabafuna Simakadze.

⁴ Funani kwati Simakadze nemandla akhe, nifunisise buso bakhe onkhe emalanga.

⁵ Khumbulani timangaliso takhe latentile, nikhumbule tibonakaliso takhe, kanye netehlulelo temlomo wakhe,

⁶ nine situkulwane sa-Abrahama, inceku yakhe, nine madvodzana aJakobe, labakhetsiwe bakhe.

⁷ Yena Simakadze unguNkulunkulu wetfu, tehlulelo takhe tisemhlabeni wonkhe.

⁸ Uyasikhumbula sivumelwane sakhe phakadze naphakadze; livi layala ngalo uyalikhumbula titukulwane ngetitukulwane.

⁹ Sivumelwane lasenta na-Abrahama, nesifungo sakhe ku-Isaka,

¹⁰ wasicinisa kuJakobe, saba ngumtsetfo, ku-Israyeli saba sivumelwane saphakadze.

¹¹ Watsi: “Wena ngiyakupha live laseKhenani leliyawuba sabelo lesilifa lakho.”

¹² Babesembalwa ngesibalo, yebo, babeyingcosana, batihambi kulelo live.

¹³ Bazula bandzindza etiveni ngetive, basuka kulomunye umbuso baya kulomunye,

¹⁴ kodvwa akavumelanga muntfu kutsi abahluphe, ngenca yabo wajezisa ngisho emakhosi.

¹⁵ Watsi: “Ningabatsintsi labagcotjiwe bami, ningacali nilimate baphrofethi bami.”

¹⁶ Watfumela indlala kulelo live, kwaphela kudla, kati walala etiko.

¹⁷ Watfuma indvodza yahamba kucala kunabo, Josefa, lowatsengiswa waba sigcili.

¹⁸ Tinyawo takhe batibopha ngetinketane, naye lucobo lwakhe waboshwa ngetinsimbi,

¹⁹ kwaze kwaba sikhatsi lekwagcwaliseka ngaso livi lakhe, nelivi laSimakadze lamvivinya lamtfola kutsi ucinisile.

²⁰ Faro, inkhosi, watfumela kutsi akhululwe, yebo, umbusi wetive wamkhulula.

²¹ Wamenta waba sikhulu semuti wakhe, waba ngundvunankhulu welive lonkhe,

²² kuze acondzise tikhulu takhe; nebaholi bakhe wabafundzisa kuhlakanipha.

²³ Israyeli wase uyefika eGibhithe, Jakobe wakhonta eveni lakaHhamu.

²⁴ Simakadze wasandzisa kakhulu sive sakhe, wasenta sandza saba nemandla kunetitsa taso.

²⁵ Wayigucula inhlitiyo yebaseGibhithe, kuze itondze bantfu bakhe, babaphatsa ngebucili.

²⁶ Watfumela Mosi, inceku yakhe, wahamba na-Aroni labekhetfwe nguSimakadze.

²⁷ Benta tibonakaliso taSimakadze emkhatsini wabo, netimangaliso eveni lakaHhamu.

²⁸ Watfumela bumnyama, wenta live laba mnyama, kepha bemelana nemavi akhe.

²⁹ Wagucula emanti abo aba yingati, wabhubhisa tinhlanti tabo.

³⁰ Live labo lanyakatela tigogodvolo, taphetfuka ngisho nasemakamelweni emakhosi.

³¹ Wakhuluma, kwavela emabulo etibawu, kanye netimphungane eveni labo lonkhe.

³² Wabapha sangcotfo, saba yimvula yabo, kwaklwebha imibane eveni labo lonkhe.

³³ Wavitsita imivini nemakhiwane abo, washaya netihlahla eveni labo.

³⁴ Wakhuluma, kwavela sikhonyane, kwavela inkhasa lengeke ibaleke,

³⁵ kwadla yonkhe intfo lemilako eveni, kwacedza sitselo semhlaba emasimini abo.

³⁶ Wabulala onkhe ematubulo abo eveni, lababetibone ngawo kutsi sebakhulile.

³⁷ Wase uyabakhipha baka-Israyeli eGibhithe, bahamba sebanesiliva negolide; kute nome munye lowawa emindenini yabo.

³⁸ EmaGibhithe ajabula ekuphumeni kwabo ngobe abesafile kubesaba.

³⁹ Wendlala lifu, laba ngumpheme wekubambonya, wabentela umlilo wekubakhanyisela ebusuku.

⁴⁰ Bacela, wabapha tigwaca, wabesutsisa ngesinkhwa lesivela ezulwini.

⁴¹ Wavula lidvwala, kwampompota emanti, ageleta ehlane njengemfula.

⁴² Ngobe wakhumbula livi lakhe lelingcwele, lalikhuluma ku-Abrahama, inceku yakhe.

⁴³ Wase ukhipha sive sakhe ngenjabulo, labakhetsiwe bakhe bahamba ngekutfokota.

⁴⁴ Wabapha emave ebetive, badla lifa lelititfukutfuku tebetive,

⁴⁵ kuze bacaphele timiso takhe, bagcine imitsetfo yakhe. Haleluya, dvumisani Simakadze!