Tihlabelelo 104 - Siswati 1996 Bible

Simakadze unakekela lokudaliwe

¹ Mphefumulo wami, dvumisa Simakadze! Yebo, Simakadze, Nkulunkulu wami, wena umkhulu kakhulu! Wembetse ludvumo nebukhosi.

² Kukhanya kuyingubo lotembese ngayo, weneke emazulu njengekumiswa kwelithende;

³ indlu yakho yebukhosi, uyakhe etikwemanti lasetulu. Emafu lamnyama lahlomile ayincola yakho, ugibele emaphiko emoya.

⁴ Nguwe lowenta titfunywa takho tibe ngimimoya, wente tinceku takho tibe ngimibane.

⁵ Wasimisa umhlaba etikwetisekelo tawo, kuze ungatanyatanyiswa, phakadze naphakadze,

⁶ wawembesa ngemanti lamanyenti, njengekwembeswa ngengubo, emanti agcwala adzimate acwilisa tintsaba.

⁷ Wawekhuta abaleka, ngekubhonga kwelivi lakho asubatsa ngematubane abaleka,

⁸ adzilika etintsabeni ehlela etigodzini, aphutfuma endzaweni lowawuyimisele wona.

⁹ Wawabekela iminyele langeke ayengce, angete asabuyela kuyakwembesa umhlaba wonkhe.

¹⁰ Wenta tiyalu tigelete etihosheni, ageletise imifula emkhatsini wetintsaba.

¹¹ Kunatsa kuyo tonkhe tilwane tesiganga, netimbongolo tesiganga ngulapho tikucima khona koma kwato.

¹² Tinyoni tesiganga takhela ngakuyo, tintjilote emkhatsini wemagala.

¹³ Unisela tintsaba ngemvula utihlalele etulu, nemhlaba weneliswe sitselo semsebenti wakho:

¹⁴ Uhlumisa tjani, kuze kudle imfuyo, uhlumise lokumilako kusitakale bantfu, kuze kuvele kudla emhlabeni,

¹⁵ neliwayini lelijabulisa tinhlitiyo tabo, nemafutsa ekugcobisa buso bakhe buze bucwebetele, nekudla lokuyinsika yemphilo yemuntfu.

¹⁶ Tihlahla taSimakadze tiniselwe ngalokwenele, imisedari yaseLebanoni layihlanyelile,

¹⁷ tinyoni letakhele tidleke tato kuyo, gilonki wakhela etulu emagaleni ato.

¹⁸ Tintsaba letindze tiyinkhundla yemagoga, emadvwala asiphephelo setimbila.

¹⁹ Wenta inyanga kutsi yehlukanise tikhatsi, lilanga liyasati sikhatsi salo sekuya kunina.

²⁰ Wenta bumnyama bube busuku, bese kweluka tonkhe tilwane temahlatsi.

²¹ Emabhubesi ayabhodla atamule, atingele tinyamatane, afuna kudla kwawo kuNkulunkulu.

²² Naliphumako lilanga ayahoshoba, abange emihumeni yawo, afike alale phansi.

²³ Umuntfu uyaphuma aye emsebentini wakhe, akhandleke kudzimate kushone lilanga.

²⁴ Awu, Simakadze! Maye, minyenti imisebenti yakho! Yonkhe uyente ngekuhlakanipha; umhlaba ugcwele tidalwa takho.

²⁵ Naluya lwandle lolukhulu, nalolubanti, loluphetfuka tintfo umuntfu langeke akhone kutibala, tintfo letiphilako letincane naletinkhulu.

²⁶ Nansiya imikhumbi intjweza kulo nemikhoma lowayenta yatjakadvula kulo.

²⁷ Tonkhe letidalwa tibheke wena, kutsi utiphe kudla kwato ngesikhatsi lesifanele.

²⁸ Utipha kudla tidle, nawuvula sandla sakho, teneliswa ngetintfo letinhle.

²⁹ Nawufihla buso bakho, tiyetfuka, nawutsatsa kuphefumula kwato, tiyafa, tibuyele elutfulini.

³⁰ Nawutfumela Moya wakho, tiyadaleka, uhlumise kabusha imvelo yemhlaba.

³¹ Shangatsi ludvumo lwaSimakadze lungema kuze kube ngunaphakadze. Shangatsi Simakadze angatfokota ngemisebenti yakhe,

³² yena lotsi nakabuka umhlaba utfutfumele, atsintse tintsaba tibhunye.

³³ Simakadze ngiyawumhlabelela, yingci nangisaphila. Ngiyawudvumisa Nkulunkulu wami, ngisaphila lapha emhlabeni.

³⁴ Shangatsi kuzindla kwami kungamjabulisa, ngiyawutfokota kuSimakadze.

³⁵ Shangatsi toni tingasishulwa emhlabeni, lababi bangabe basaphushwa nakuphushwa. Mphefumulo wami, dvumisa Simakadze! Dvumisa Simakadze!