Tihlabelelo 101 - Siswati 1996 Bible

Setsembiso sekuhamba ngendlela lecotfo

Sihlabelelo saDavide.

¹ Ngiyawuhlabela kuwe, Simakadze, ngibonge umusa wakho nebuhle bakho bekungakhetsi bala.

² Angicaphelisise kuhamba ngendlela yebucotfo. Uyawuze ufike nini kimi? Ngiyawuhamba ngimsulwa endlini yami.

³ Ngingeke ngitimisele kwenta lokubi. Ngiyayenyanya imisebenti yalabahlubuka Nkulunkulu, futsi ngingeke ngihambisane nayo.

⁴ Inhlitiyo lesigwegwe ayisuke kimi, ngingakwenti lokubi.

⁵ Lowo lohleba makhelwane wakhe emasitseleni mine ngiyawumcitsa. Lowo lonemehlo lachoshile nenhlitiyo letigcabhako angihambisani naye.

⁶ Ngiyabanconota labo labetsembeke kuNkulunkulu, kulelive, kutsi bangahlala nami. Lowo lohamba ngendlela yebucotfo angaba yinceku yami.

⁷ Umuntfu lonemacebo ngeke ngimvumele ahlale endlini yami. Wonkhe umuntfu localemanga ngingeke ngimbeketelele.

⁸ Kusa ngekusa, ngiyawubabhubhisa ngibabulale bonkhe lababi eveni, kuze ngibacotfule bonkhe lababi bangabikho ekhaya laSimakadze.