Tihlabelelo 10 - Siswati 1996 Bible

Kuthandazelwa kutsi lababi baketulwe

¹ Simakadze, umeleni khashane? Utifihleleni ngesikhatsi sisekuhluphekeni?

² Ngekuchosha kwalomubi, lomphofu uyahlupheka. Lomubi akabanjwe elugibeni lalwetsiyile.

³ Lomubi utigabatisa ngetinkhanuko takhe; uyamtusa lohlazisako, yebo, lomubi wedzelela Nkulunkulu.

⁴ Lomubi uyatigabatisa, akanaki lutfo, emicabangweni yakhe yonkhe, utsi: “Kute Nkulunkulu.”

⁵ Lomubi uyaphumelela etindleleni takhe tonkhe ngaso sonkhe sikhatsi. Tehlulelo taNkulunkulu tiphakamele khashane kulomubi, yebo, lomubi uchoshela titsa takhe.

⁶ Enhlitiyweni yakhe ucabanga utsi: “Ngingeke nginyakatiswe, ngingeke ngibe nenhlanhla lembi titukulwane ngetitukulwane.”

⁷ Emlonyeni wakhe kugcwele ticalekiso, nemacebo, nencindzetelo; ngaphansi kwelulwimi lwakhe kucambalale kuganga nebubi.

⁸ Lomubi uyacatsama abhace etindzaweni letinematfunti emadolobheni, ababulalele ematfuntini labo labate licala, emehlo akhe atse ndlo kulabo langabehlula ngemandla.

⁹ Uyalala abhace njengelibhubesi, nalibhacela kubamba inyamatane; ubamba labo labehlulako, ahudvule losihlupheki ngelinetha lakhe.

¹⁰ Lesihlupheki siyaphihlitwa siwele phansi emhlabatsini; ngako lesihlupheki sitikhandza sesisesandleni sakhe lomubi.

¹¹ Lomubi ucabanga enhlitiyweni yakhe utsi: “Nkulunkulu akanendzaba, akanaki, angeke abuke ngakimi kuze kube phakadze naphakadze.”

¹² Sukuma, Simakadze! Awu, Nkulunkulu! Phakamisa sandla sakho! Ungamkhohlwa losekuhluphekeni.

¹³ Kwentiwa yini kutsi lomubi edzelele wena, Nkulunkulu? Ucabangelani enhlitiyweni yakhe kutsi wena ungeke umjezise?

¹⁴ Kantsi wena uyabona, ngobe tinhlupheko netinsizi uyakunaka, kuze ukufumbatse ngetandla takho. Lohluphekile utinikela kuwe, ngobe wena ungumsiti wetintsandzane.

¹⁵ Juba sandla salomubi losikhohlakali, jezisa bubi bakhe, kuze kubete lokusalako.

¹⁶ Simakadze uyiNkhosi, phakadze naphakadze, impela emahedeni ayakunyamalala eveni lakhe.

¹⁷ Yebo, Simakadze! Uyativa tifiso talabacotfo, ucinise nenhlitiyo yabo. Indlebe yakho iyabalalela,

¹⁸ kuze tintsandzane nalabacindzetelwe babonelelwe ngekulunga. Kute umuntfu walomhlaba loyawuphindze abe yingoti.