Taga 4 - Siswati 1996 Bible

Lusito lwekuhlakanipha

¹ Madvodzana ami, yilaleleni ngekucophelela imiyalo yeyihlo, khona nitawuba nekucondza.

² Ngininika imiyalo lemihle, ningacali niyilahle nje imfundziso yami.

³ Ngisengumfanyana wekuphela, kubabe namake,

⁴ babe abengifundzisa atsi: “Shangatsi inhlitiyo yakho ingawabambisisa emavi ami, nemiyalo yami, khona utawuphila.

⁵ Zuza kuhlakanipha uzuze nekuvisisa. Ungakhohlwa, futsi ungesuki emavini emlomo wami.

⁶ Ungakulahli, kuyawukuphephisa; kutsandze, kuyawukugadza.

⁷ Kucala kwekuhlakanipha, naku: Zuza kuhlakanipha, uzuze nekucondza, nome kukubitani.

⁸ Kutuse, kona-ke kuyawukuphakamisa, kugone, kona-ke kuyawukwatisa.

⁹ Kuyawukwetfwesa ludvumo enhloko, kukwetfwese umchele lomuhle.”

¹⁰ Ndvodzana yami, lalela wemukele emavi ami, khona iminyaka yekuphila kwakho itakwandza.

¹¹ Ngikufundzise indlela yekuhlakanipha, ngakuholela etindleleni tekulunga.

¹² Nawuhambako, sinyatselo sakho singeke siphatamiseke; nawugijimako, ungeke ukhubeke.

¹³ Bambelela emyalweni ungawuyekeli, uwulondvolote, ngobe uyimphilo yakho.

¹⁴ Ungalubeki lunyawo lwakho endleleni yalababi, futsi ungahambi endleleni yebantfu lababi.

¹⁵ Yikhweshele, ungahambi kuyo, yifulatsele uchubeke.

¹⁶ Bantfu lababi abalali bangakenti lokubi, bayacwasha bangalali nabangakoni muntfu.

¹⁷ Bubi bukudla kwabo, budlova businatfo sabo.

¹⁸ Kodvwa indlela yalabalungile ifanana nekukhanya kwentsatsakusa, lokuya ngekuya kuze kube ngusemini.

¹⁹ Indlela yalababi ifanana nebumnyama, lababi abati nalapho bakhubeka bawe khona.

²⁰ Ndvodzana yami, bambisisa emavi ami, ubeke indlebe yakho emavini ami.

²¹ Ungawavumeli kutsi alahleke emehlweni akho, walondvolote enhlitiyweni yakho.

²² Lamavi akuphila kulowo lowatfolako, aphilise wonkhe umtimba wakhe.

²³ Ngetulu kwako konkhe londvolota inhlitiyo yakho ngekunakekela konkhe, ngobe kuyo kugeleta tiyalu tekuphila.

²⁴ Yisuse kuwe inkhulumo lesigwegwe, inkhulumo lekhohlisako yikhweshisele khashane nawe.

²⁵ Emehlo akho akacondze ngco embili, ubukisise embikwakho.

²⁶ Caphelisisa indlela yetinyawo takho, tonkhe-ke tindlela takho tiyawuba nekuciniseka.

²⁷ Ungajikeli ngesekudla nome ngesancele, lunyawo lwakho ungalubeki ebubini.