Taga 3 - Siswati 1996 Bible

Seluleko kumadvodzana

¹ Ndvodzana yami, ungayikhohlwa imfundziso yami, kodvwa inhlitiyo yakho ayigcine imiyalo yami,

² ngobe ngiyo letakunika emalanga neminyaka leminyenti ekuphileni kwakho; ikunike nekuchuma.

³ Ungehlukani nenhlonipho nekwetsembeka; kukhungele entsanyeni yakho, ukubhale etibhelekeceni tenhlitiyo yakho.

⁴ Loko kuyawukwenta ube neludvumo loluhle utsandvwe nguNkulunkulu nebantfu.

⁵ Tsemba Simakadze ngayo yonkhe inhlitiyo yakho, ungeyami ekwatini kwakho.

⁶ Matise kuko konkhe lokwentako, yena uyakucondzisa tindlela takho.

⁷ Ungatenti sihlakaniphi, yesaba Simakadze, ukuyekele lokubi.

⁸ Ngiko loko lokuyakwelapha umtimba wakho, kuphilise nematsambo akho.

⁹ Dvumisa Simakadze ngalokuhle lonako nangetitselo tekucala tako konkhe lokulimile,

¹⁰ netincolobane takho tiyakugcwaliswa ngenala, imiphandza yakho iphuphume liwayini.

¹¹ Ndvodzana yami, ungakwedzeleli kucondziswa nguSimakadze, ungadzinwa kutsetsiswa nguye.

¹² Ngobe Simakadze uyamtsetsisa amcondzise lowo lamtsandzako, njengobe neyise enta endvodzaneni yakhe lajabula ngayo.

¹³ Ubusisiwe umuntfu lotfola kuhlakanipha nalowo lowemukela kucondza.

¹⁴ Ngobe kuhlakanipha kwendlula isiliva ngekucebisa umuntfu, nenzuzo yako yinkhulu kuneyegolide.

¹⁵ Kuhlakanipha kuligugu kakhulu, kwengca ematje laligugu; kute lokufisako longakulinganisa nako.

¹⁶ Imphilo lendze isesandleni sako sekudla, kantsi esandleni sako sesancele kunengcebo neludvumo.

¹⁷ Tindlela tako kutindlela tekujabula, netindlela tako tonkhe ngetekuthula.

¹⁸ Kusihlahla sekuphila kulabakuphutfumako; labo labakubamba bakunkonkoshele ngulabo labajabulako.

¹⁹ Simakadze wasekela umhlaba ngekuhlakanipha, wamisa emazulu endzaweni yawo ngekucondza.

²⁰ Ngelwati lwakhe wehlukanisa emanti langaphansi kwemhlaba, nangelwati lwakhe emafu ehlisa imvula.

²¹ Ndvodzana yami, bambelela ekuhlakanipheni nasekuzitseni; ungakuvumeli kusuke kuwe.

²² Kuyawuba kuphila emphefumulweni wakho, kube ngumhlobiso entsanyeni yakho.

²³ Endleleni yakho uyakuhamba ngekuphepha, nelunyawo lwakho lungakhubeki.

²⁴ Nawucambalala phansi, ungeke wesabe; nawulala, uyawutfola butfongo lobumnandzi.

²⁵ Ungesabi kutunywa yinhlekelele yengoti nekuhlaselwa bantfu lababi;

²⁶ ngobe Simakadze uyawuba siphephelo sakho; uyawulondvolota lunyawo lwakho lungabanjwa lugibe.

²⁷ Yenta lokuhle kulabo labakudzingako, nangabe unawo emandla ekukwenta.

²⁸ Ungasho kumakhelwane wakho utsi: “Hamba, ngitawubuye ngikunike kusasa,” kantsi unako nalamuhla.

²⁹ Ungatimiseli ngekwenta lokubi kumakhelwane wakho lohlala ngekukwetsemba.

³⁰ Ungaphikisani nemuntfu ngelite angakakukhubi nekukukhuba.

³¹ Ungabi namhawu ngemuntfu losidlova; ungacali ukhetse ngisho nome yinye yetindlela takhe.

³² Ngobe umuntfu losidlova usinengiso kuSimakadze, kodvwa labalungile balitsemba lakhe.

³³ Sicalekiso saSimakadze sisemndenini walomubi, kodvwa indlu yalolungile uyayibusisa.

³⁴ Uyabahleka labo labeyisako, kodvwa unemusa kulabatfobekile.

³⁵ Labahlakaniphile bayawudvunyiswa, kodvwa tilima tiyawuhlazeka.