Taga 2 - Siswati 1996 Bible

Imivuzo yekuhlakanipha

¹ Ndvodzana yami, yemukela loku lengikufundzisa kona, uyigcine imiyalo yami.

² Lalela ubambisise kuhlakanipha; inhlitiyo yakho ibe nekucondza.

³ Yebo cela lwati, ucele nekucondza;

⁴ kufunisise njengesiliva, ukumbe njengemcebo lofihliwe.

⁵ Nangabe ukwenta konkhe loko, utawucondzisisa kutsi kuyini kwesaba Simakadze, utfole nekutsi kuyini kwati Nkulunkulu.

⁶ NguSimakadze lowephana ngekuhlakanipha; emlonyeni wakhe kuphuma lwati nekucondza.

⁷ Labacotfo ubabekele kuhlakanipha; ulihawu kulabo labatiphatsa ngekwetsembeka.

⁸ Ugadza tindlela talabo labaphatsa labanye ngekungakhetsi, alindze indlela yalabangcwele bakhe.

⁹ Ngako, wena utakucondza kulunga, nebumsulwa, nebucotfo, ukwati nalokufanele.

¹⁰ Kuhlakanipha kutawungena enhlitiyweni yakho, nelwati lube yinjabulo emphefumulweni wakho.

¹¹ Kucophelela kutakugadza, nekucondzisisa kutakwelusa,

¹² kukuphephise endleleni yebubi nakubantfu bemanga,

¹³ labalahla tindlela tekulunga bahambe etindleleni tebumnyama,

¹⁴ labajabula ngekwenta lokubi, bajatjuliswe kwandza kwemacebo,

¹⁵ labatindlela tabo tigwegwile, nalabahamba ngetindlela tekweduka.

¹⁶ Kucophelela nekucondzisisa kutakusindzisa kulomsikati loyingwadla, umfati walenye indvodza, lonelulwimi lolushelelako,

¹⁷ lowala lowo lashade naye ebusheni bakhe, wakhohlwa sivumelwane sakhe kuNkulunkulu wakhe.

¹⁸ Indlu yakhe ibishela ekufeni, netindlela takhe tigcina endzaweni yalabafile.

¹⁹ Kuye akuyi lolubuyako; lowo loke wangena kuye akaphindzi futsi abuyele etindleleni tekuphila.

²⁰ Ngako kufanele utsatse sibonelo kubantfu labalungile; uhambe etindleleni tekulunga.

²¹ Bantfu labacotfo labatawukwakha kulelive; ngulabetsembekile bodvwa labayawuhlala kulo.

²² Kodvwa lababi bayawususwa eveni, nalabanemacebo bayawusishulwa kulo.