Taga 1 - Siswati 1996 Bible

Lusito lwetaga

¹ Taga taSolomoni, umsa waDavide, inkhosi yema-Israyeli.

² Letaga tenta umuntfu akwati kuhlakanipha nekwekhuteka, acondzisise inchazelo yemavi lajulile.

³ Tifundzisana kuphila ngebucotfo bengcondvo, nekwenta kulunga, nekungakhetsi.

⁴ Tenta losengakaliboni live abe nekuhlakanipha, tifundzise labasha kuba nelwati nekuzitsa.

⁵ Labahlakaniphile batsi bangatilalela kwengeteke lwati lwabo; nalabanengcondvo batsi bangatifundza batente, batfole bungcweti,

⁶ khona batekuvisisa kahle letaga, nemifanekiso, nenchazelo yaletimphicabadzala.

Umyalo locondzene nendvodzana

⁷ Kwesaba Simakadze kusicalo selwati, tilima tiyakwedzelela kuhlakanipha nemiyalo.

⁸ Ndvodzana yami, lalela umyalo weyihlo, ungayali imfundziso yenyoko,

⁹ ngobe iyakuba ngumhlobiso lonjengemchele wenhloko yakho, nanjengeligcebesha lentsamo yakho.

¹⁰ Ndvodzana yami, nangabe toni tikuyenga, ungacali uvume,

¹¹ natitsi kuwe: “Kota, sambe sifune lesingahle simbulale; asihambe silalele labangenacala, sibajabhalate ngaphandle kwesono.

¹² Asibagwinye baphila baye endzaweni yalabafile, njengalabo labangena baye phansi ethuneni.

¹³ Sitawutfola tonkhe tintfo letiligugu, sigcwalise tindlu tetfu ngetimphahla lesitichwagile.

¹⁴ Kota, utihlanganise natsi; khona sitewuba nesikhwama sinye nawe.”

¹⁵ Ndvodzana yami, ungahambisani nebantfu labanje; ungalubeki lunyawo lwakho etindleleni tabo,

¹⁶ ngobe tinyawo tabo tigijimela lokubi, basheshe bacitse ingati.

¹⁷ Akusiti lutfo kuvula sochaka, kantsi lenyoni lofuna kuyibamba iyakubuka.

¹⁸ Kodvwa bantfu labanjalo batetsiyela sifu sekutibulala bona; babhacele kutisontsa bona, batibulale.

¹⁹ Tinjalo tindlela talabo labatfola ingcebo ngebugelekece; timphilo tabo titsatfwa bugelekece babo.

Kumemeta kwekuhlakanipha

²⁰ Kuhlakanipha kumemeta etitaladini; kumemeta kakhulu nasetimakethe.

²¹ Kumemeta kakhulu nasemahlanganweni emigwaco; kukhulume nasemasangweni emadolobha kutsi:

²² “Nine leningati lutfo! Niyawuhlala ningati lutfo kuze kube ngunini? Baphukuti bayawuphukuta kuze kube ngunini? Tona tilima titawutondzana nelwati kuze kube ngunini?

²³ Ase nilalele kunitsetsisa kwami; imicabango yami ngitayitfululela kini, nginitjele lokusenhlitiyweni yami.

²⁴ Njengobe nginimemetile nala kulalela, ngelula sandla sami nala kusibamba,

²⁵ nangete nasitsatsa seluleko sami, nala nekutsi nginekhute,

²⁶ nami-ke ngitanihleka nase nehlelwe tinhlupheko. Ngitanicoloshela nase nehlelwe sigemegeme,

²⁷ nase nifikelwe kutfutfumela lokunjengesiphepho, nesigemegeme lesinjengesihhushuhhushu, nekudzangala kanye nekudzabuka.

²⁸ “Bayawube sebayangibita, kodvwa ngingeke ngisabele; batangifunisisa, kodvwa bangeke bangitfole.

²⁹ Ngobe batondza lwati, abazange bakhetse kwesaba Simakadze.

³⁰ Abazange basitsatse seluleko sami, nekubacondzisa kwami bakwedzelela.

³¹ Ngako-ke batawutfola titselo tetindlela tabo, bacunjiswe ngemacebo abo.

³² Labate lwati babulawa kweduka kwabo; tilima tibulawa kweneliseka kwato.

³³ Kodvwa lowo lolalela mine utawuhlala aphephile, akhululeke, angesabi lutfo lolubi.”