Sililo 5 - Siswati 1996 Bible

Umkhuleko wekucela umusa

¹ Awu Simakadze! Khumbula kutsi kwentekeni kitsi. Buka ulibone lihlazo letfu.

² Lifa letfu selijikisiwe lanikwa bafokati, nemakhaya etfu anikwa bachamuki.

³ Sesigucuke saba tintsandzane, sabate nabobabe, nabomake sebabafelokati.

⁴ Emanti lesiwanatsako kufanele siwatsenge, netinkhuni sititfola ngemali kuphela.

⁵ Labo labasicoshako basihleti emsileni, sikhatsele sidziniwe, asikutfoli kuphumula.

⁶ Satinikela kubaseGibhithe nakubase-Asiriya, kuze sitfole kudla lokwenele.

⁷ Bobabemkhulu labona sebafa, tsine sesetfwele licala labo.

⁸ Tigcili tibusa etikwetfu, kute namunye longasikhulula etandleni tato.

⁹ Kudla kwetfu sikutfola ngekutidzela ematsambo ngenca yenkemba lesehlane.

¹⁰ Sikhumba setfu sishisa njengelitiko, siyavevetela ngenca yekulamba.

¹¹ Bafati badlwenguliwe eSiyoni, netintfombi tadlundlulutwa emadolobheni akaJuda.

¹² Tikhulu tilengiswe ngetandla tato; labadzala bangete bahlonishwa.

¹³ Emajaha ayaphishaneka etigayweni, bafana bayadzayitela ngaphansi kwetinyandza tetinkhuni.

¹⁴ Baholi besukile emasangweni elidolobha, emajaha asewuyekele umculo wawo.

¹⁵ Injabulo iphelile etinhlitiyweni tetfu; kugidza kwetfu kwenjabulo sekugucuke kwaba sililo.

¹⁶ Umchele udzilikile etinhloko tetfu. Maye kitsi! Ngobe sonile.

¹⁷ Ngenca yako konkhe loku tinhlitiyo tetfu tidzabukile, nangenca yato tonkhe letintfo emehlo etfu ayadvumba,

¹⁸ ngobe intsaba iSiyoni seyisele ikhala libhungane, timphungutja tiyajangaza kuyo.

¹⁹ Awu, wena Simakadze, uyabusa kuze kube phakadze. Sihlalo sakho sebukhosi sihlala sicinile titukulwane ngetitukulwane.

²⁰ Usikhohlwelani njalo nje? Usilahleleni sikhatsi lesidze kangaka?

²¹ Awu! Simakadze, sibuyisele kuwe, kuze natsi sitewubuyela kuwe; sivusetele emalanga etfu abe njengemalanga asendvulo.

²² Nome sewusilahle kokuphela yini? Sekute yini siphetfo ekutfukutseleni kwakho?