Sililo 3 - Siswati 1996 Bible

Sijeziso, nekuphendvuka, nelitsemba

¹ Mine ngingumuntfu lokubonile kuhlupheka ngendvuku yelulaka lwaSimakadze.

² Ungicoshile, wangenta ngahamba ngetinyawo, ngahamba ebumnyameni kungesiko ekukhanyeni.

³ Ngempela, sandla sakhe usiguculele ngakimi, simelana nami njalo nje, onkhe emalanga.

⁴ Usigugisile sikhumba sami nenyama yami, ematsambo ami uwafohlotile.

⁵ Ungivimbetele, wangitungeleta ngalokubabako nangekuhlupheka lokukhulu.

⁶ Ungihlalise ebumnyameni, nginjengalabo lasebalala kadzeni emadlizeni.

⁷ Ungibiyele ngetindvonga, ngako angikhoni kuphunyula ngibaleke. Ungibophe ngetinketane letimatima.

⁸ Ngisho nome sengimemeta, ngikhalela kusitwa, uyivalela ngaphandle imikhuleko yami.

⁹ Indlela yami uyivale ngetinguzanguza tematje; wagwegwisa indlela yami, yaba matombetombe.

¹⁰ Njengelibhele lelibhacele inyamatane, nanjengelibhubesi lelitifihlile,

¹¹ ungihudvule endleleni, wangisitila, wangishiya ngingenamsiti.

¹² Ujijimete umcibisholo wakhe, wangenta ngaba yinkoyoyo yemicibisholo yakhe.

¹³ Ugwaze inhlitiyo yami ngemicibisholo yasengculwini yakhe.

¹⁴ Ngagucuka ngaba yintfo yekuhlekisa kubo bonkhe bantfu, bahlabela tingoma ngami bangihaya lonkhe lilanga.

¹⁵ Ungesutsise ngemitsi lebabako, wangigcwalisa ngenyongo.

¹⁶ Ematinyo ami uwagamule ngelukhetse, wangigcobagcoba elutfulini.

¹⁷ Ngidlelelwe kuthula, ngadzimate ngakhohlwa nekutsi kuyini kuphumelela.

¹⁸ Nguko ngitsi: “Bukhosi bami buhambile kanye nako konkhe lebengetsembele ngako kuSimakadze.”

¹⁹ Ngikhumbula kushaywa kwami kanye nekundzindza kwami, loko kubaba kanye nenyongo.

²⁰ Ngikukhumbula kahle, umphefumulo wami uphansi, udzabukile ngekhatsi kwami.

²¹ Yebo, noko ngiyakubuyisa engcondvweni, ngako nginelitsemba:

²² Ngenca yelutsandvo lolukhulu lwaSimakadze asikadliwa sacedvwa, ngobe sihawu sakhe singeke siphele.

²³ Sisha onkhe emalanga ekuseni, kwetsembeka kwakho kukhulu.

²⁴ Ngiyatitjela ngitsi: “Simakadze usabelo sami, ngako ngitawulindzela yena.”

²⁵ Simakadze ulungile kulaba lababeke litsemba labo kuye, kulaba labamfunisisako.

²⁶ Kuhle kuyilindzela ngekuthula nangekubeketela insindziso yaSimakadze.

²⁷ Kuhle kumuntfu kutsi etfwale lijoko ngesikhatsi asesemusha.

²⁸ Akahlale yedvwa athule, ngobe nguSimakadze lona lometfwese lona.

²⁹ Akembele buso bakhe elutfulini, mhlawumbe kusengaba khona litsemba.

³⁰ Akaniketele sihlatsi sakhe kulowo longamshaya ngemphama, atseleke ngemahloni nangelihlazo.

³¹ Ngobe Simakadze bantfu akabalahli kokuphela.

³² Nome akuletsa kudzabuka, kodvwa uyawubuye ahawukele, lukhulu kangako-ke lutsandvo lwakhe.

³³ Ngobe bantfu akabahluphi ngobe atsandza kubevisa buhlungu nome-ke kubadzabukisa.

³⁴ Kuhlifita ngetinyawo tonkhe tiboshwa eveni,

³⁵ nekudlelela umuntfu emalungelo akhe embikwaSimakadze Longetulu Kwako Konkhe,

³⁶ nekudlelela umuntfu lilungelo lakhe lekwehlulelwa ngebucotfo bemtsetfo, kungabe Simakadze angeke yini atibone tintfo letinjengaleto?

³⁷ Ngubani longakhuluma, ente kwenteke, nangabe Simakadze angakakumiseli kutsi kube njalo?

³⁸ Akuphumi lokuhle nalokubi yini emlonyeni wakhe, Longetulu Kwako Konkhe?

³⁹ Umuntfu nje lophilako ukhononelani, nakajeziswa ngenca yetono takhe?

⁴⁰ Asihlolisise tindlela tetfu sitivivinye, bese sibuyela kuSimakadze.

⁴¹ Asiphakamisele tinhlitiyo tetfu kanye netandla tetfu etulu, sitiphakamisele kuNkulunkulu, sitsi:

⁴² “Sonile sahlubuka, awukatsetseleli.

⁴³ “Utimbonye ngelulaka, wasisukela wasicosha, wabulala ngaphandle kwesihawu.

⁴⁴ Utimbonye ngelifu, kuze kutebate umthandazo longefika kuwe.

⁴⁵ Usente emagwebu netilahlwa emkhatsini wetive tonkhe.

⁴⁶ “Tonkhe titsa tetfu setisikhamisele imilomo lemikhulu.

⁴⁷ Sehlelwe kwesaba neluvalo, nemigodzi, kubhujiswa, nekucitfwa.”

⁴⁸ Imifula yetinyembeti iyageleta isuka emehlweni ami, ngobe bantfu bami babhujisiwe.

⁴⁹ Emehlo ami ayawugobhota angemi, angabi nako kuphumula,

⁵⁰ adzimate Simakadze abuke phansi asezulwini kutsi abone.

⁵¹ Loku lengikubonako kuletsa lusizi emphefumulweni wami, ngenca yabo bonkhe besifazane basedolobheni lami.

⁵² Labo lababetitsa tami ngaphandle kwesizatfu babengitingela njengenyoni.

⁵³ Betama kucedzela imphilo yami emgodzini, bangijikijela ngematje,

⁵⁴ emanti ayisibekela inhloko yami, ngacabanga ngatsi akusesingakanani ngincanyulwe.

⁵⁵ Ngalibita Libito lakho, Simakadze, ekujuleni kwemgodzi lohlokomako.

⁵⁶ Wakuva kuncusa kwami: “Ungativali tindlebe takho ekukhaleni kwami; ngicela kuphunyutwa.”

⁵⁷ Wasondzela kimi nangikubita, watsi: “Ungesabi.”

⁵⁸ Awu Simakadze, wayimela indzaba yami, wayihlenga imphilo yami.

⁵⁹ Awu Simakadze, nawe ukubonile lokubi lokwentiwe kimi. Phumelelisa indzaba yami!

⁶⁰ Ukubonile kujula kwemphindziselo yabo, onkhe emacebo labangibophele wona ngasense.

⁶¹ Awu Simakadze, utivile tinhlamba tabo, onkhe emacebo abo labangimisele wona,

⁶² loko titsa tami letikuhlebako, tingumtela ngami lonkhe lilanga.

⁶³ Tibuke! Natihleti nome timile, tiyangihaya nangetingoma tato.

⁶⁴ Awu Simakadze, buyisela kuto loko lokufanele tandla tato.

⁶⁵ Mbonya tinhlitiyo tato ngendvwangu, shangatsi sicalekiso sakho singaba setikwato!

⁶⁶ Ticoshe ngentfukutselo yakho, utibhubhise, tingaphindzi tibe khona ngaphansi kwemazulu aSimakadze.