Sembulo 9 - Siswati 1996 Bible

Licilongo lesihlanu liyashaywa Maye wekucala

¹ Ingilosi yesihlanu yalishaya licilongo layo, ngabona inkhanyeti iwa ezulwini iwela emhlabeni, yanikwa sikhiya semgodzi longenamkhawulo.

² Lenkhanyeti yawuvula lomgodzi longenamkhawulo, kwase kuphuma intfutfu leyayifanana nentfutfu yemlilo lomkhulu; lilanga nemoya kwaba mnyama ngenca yalentfutfu leyayiphuma kulomgodzi.

³ Kulentfutfu kwaphuma sikhonyane sehlela emhlabeni, sanikwa emandla lafanana nemandla abofecela bemhlaba.

⁴ Satjelwa kutsi singaboni tjani bemhlaba, nome yini leluhlata lekhulako, nome sihlahla, intfo nje sicondzane ngco nebantfu labangenalo luphawu lwaNkulunkulu emabuntini abo.

⁵ Savunyelwa kutsi sibatfose ngetinhlupho tinyanga letisihlanu, kodvwa singababulali. Lokuhlushwa kwabo kuyawuba njengebuhlungu bafecela, nakasutela umuntfu.

⁶ Kulawo malanga bantfu bayawukufuna kufa, kodvwa bangete bakutfola; bayawufisa kutsi bafe, kodvwa kufa kuyakubabalekela.

⁷ Lesikhonyane sasibonakala sifanana nemahhashi lalungiselwe imphi; etinhloko taso kunalokwakufana nemichele yegolide, buso baso bufanana nebemuntfu.

⁸ Tinwele taso tatifanana netalabasikati, ematinyo aso afanana nematinyo emabhubesi.

⁹ Esifubeni sasinetivikelo tesifuba tensimbi, imisindvo yetimphiko taso yayifanana nemdvumo wetincola temphi letinyenti tidvonswa ngemahhashi, lagijimela ekulweni.

¹⁰ Sasinemisila lefanana neyabofecela, inetindvonsi. Kulemisila yaso bekungulapho kunemandla aso ekuhlupha nekulimata bantfu tinyanga letisihlanu.

¹¹ Inkhosi yaso lesibusako bekuyingilosi yemgodzi longenamkhawulo. Libito layo ngesiHebheru ngu-Abadoni, ngesiGriki ngu-Apoliyoni.

¹² Maye wekucala sewendlulile, kodvwa kusasele bomaye lababili.

Licilongo lesitfupha liyashaywa Maye wesibili

¹³ Ingilosi yesitfupha yase ishaya licilongo layo. Ngeva livi liphuma etimphondvweni letine telilati legolide lelisembikwaNkulunkulu,

¹⁴ likhuluma kulengilosi yesitfupha leyayinelicilongo litsi: “Tfukulula letingilosi letine letiboshwe emfuleni lomkhulu iYufrathe.”

¹⁵ Ngako-ke letingilosi letine tatfukululwa. Tativele tilungiselwe li-awa, nelilanga, nenyanga, nemnyaka kutsi tibulale incenye yesitsatfu yabo bonkhe bantfu emhlabeni.

¹⁶ Ngeva kutsi lamabutfo labegibele emahhashi abengahle abe tigidzi letingema-200.

¹⁷ Embonweni wami lamahhashi ngawabona anje: Labagibeli babefake tivikelo tetifuba letatibovu njengemlilo, netesafire, netesibabule; tinhloko temahhashi tatinjengetinhloko temabhubesi, emilonyeni yawo kuphuma umlilo, nentfutfu, nesibabule.

¹⁸ Incenye yesitsatfu yebantfu yafa ibulawa nguletinhlupheko letintsatfu: umlilo, nentfutfu, nesibabule, lokwakuphuma emilonyeni yawo.

¹⁹ Ngobe emandla alamahhashi abesemilonyeni yawo nasemisileni yawo. Imisila yawo yayinetinhloko, ifanana netinyoka. Abelimata ngayo lemisila.

²⁰ Kepha bantfu lababesele bangete bafa kuletinhlupho, abazange baphendvuke emisebentini yetandla tabo. Kodvwa bachubeka bakhonta emadimoni netithico tegolide, netesiliva, netelitfusi, netelitje, netemitsi: tintfo letingaboni, naletingeva, naletingahambi.

²¹ Abazange baphendvuke ekubulaleni kwabo, nasekutsakatseni kwabo, nasebugwadleni babo, nasebuphingini babo, nasekwebeni kwabo.