Sembulo 7 - Siswati 1996 Bible

Ema-Israyeli labekwa luphawu

¹ Emvakwaloko ngabona tingilosi letine time emagumbini omane emhlaba, tibambe imimoya yomine yemhlaba kutsi kubete umoya lohhusha emhlabeni, nome elwandle, nome kukusiphi sihlahla.

² Ngase ngibona lenye ingilosi yenyuka iphuma emphumalanga, iphetse luphawu lwaNkulunkulu lophilako; yamemeta ngelivi lelikhulu, imemeta letingilosi letine letatinikwe emandla ekulimata umhlaba nelwandle,

³ yatsi: “Ningawulimati umhlaba, nome lwandle, nome tihlahla, singakatibeki luphawu emabuntini tisebenti taNkulunkulu wetfu.”

⁴ Ngase ngitjelwa sibalo salababekwe luphawu kutsi bati-144 000. Babephuma kuto tonkhe tive taka-Israyeli:

⁵ Lababekwa luphawu esiveni sakaJuda baba ti-12 000, esiveni sakaRubeni baba ti-12 000, esiveni sakaGadi baba ti-12 000,

⁶ esiveni saka-Asheri baba ti-12 000, esiveni sakaNaftali baba ti-12 000, esiveni sakaManase baba ti-12 000,

⁷ esiveni sakaSimeyoni baba ti-12 000, esiveni sakaLevi baba ti-12 000, esiveni saka-Isakhari baba ti-12 000,

⁸ esiveni sakaZebuloni baba ti-12 000, esiveni sakaJosefa baba ti-12 000, esiveni sakaBhenjamini baba ti-12 000.

Sicumbi lesikhulu sebantfu

⁹ Emvakwaloko ngatsi ngiyabuka ngabona sicumbi lesikhulu sebantfu lesingeke sibalwe ngumuntfu. Kwakubantfu lababephuma etiveni tonkhe, nasemindenini yonkhe, nasemaveni onkhe, nasetilimini tonkhe. Babeme embikwesihlalo sebukhosi nasembikweliWundlu, bembetse tingubo letimhlophe, etandleni baphetse emagala elisundvu.

¹⁰ Sakhala ngelivi lelikhulu satsi: “Insindziso yaNkulunkulu wetfu, lohleti esihlalweni sebukhosi, neyeliWundlu.”

¹¹ Tonkhe tingilosi tema tatungeleta sihlalo sebukhosi, nemalunga, netidalwa letine, tawa phansi ngebuso embikwesihlalo sebukhosi, takhonta Nkulunkulu,

¹² tatsi: “Amen! Sibusiso, nebukhosi, nekuhlakanipha, nekubongwa, neludvumo, nemandla, nekuncoba akube kuNkulunkulu phakadze naphakadze! Amen!”

¹³ Lelinye lemalunga lakhuluma kimi latsi: “Bobani laba labembetse tingubo letimhlophe, empeleni baphumaphi?”

¹⁴ Ngatsi kulo: “Nkhosi, nguwe lobatiko.” Lase litsi kimi: “Laba-ke ngibo labaphume ekuhluphekeni lokukhulu. Bageze tingubo tabo taba mhlophe ngengati yeliWundlu.

¹⁵ Kungako nje basembikwesihlalo sebukhosi saNkulunkulu, bamkhonta imini nebusuku ethempelini lakhe; lowo lohlala esihlalweni sebukhosi uyawubasingatsa ngebukhona bakhe.

¹⁶ Bangeke baphindze balambe, bangeke baphindze bome, lilanga lingeke liphindze libahlabe ngekubashisa, kute nome ngayini leyawubashisa.

¹⁷ Ngobe liWundlu laNkulunkulu lelisenkhabeni yesihlalo sebukhosi, liyawubelusa, libaholele emitfonjeni yemanti ekuphila. Nkulunkulu uyakwesula tonkhe tinyembeti tabo emehlweni abo.”