Numeri 34 - Siswati 1996 Bible

Iminyele yaseKhenani

¹ Simakadze wakhuluma kuMosi, watsi:

² “Yala ema-Israyeli utsi kuwo: ‘Naningena eKhenani, live lenitakwabelwa lona kutsi libe lifa lenu, litawuba naleminyele lena:

³ Ngaseningizimu litawufaka liHlane laseSini kugudla umnyele waka-Edomu. Ngasemphumalanga, umnyele utawucala ngaseningizimu ngasekugcineni kweLwandle Lweluswayi,

⁴ wewelele ngesheya eningizimu yemsaho longuFecela, i-Akrabhimu, wendlule uye eHlane laseSini ucondze eningizimu yeKhadeshi Bhaneya. Utawushaya ucondze eHasari Adari uze ufike e-Asmoni,

⁵ lapho utawufike ujike khona, ucondze emfudlaneni waseGibhithe uhambelane nawo ugcine eLwandle.

⁶ “ ‘Umnyele wenu ngasenshonalanga kutawuba lugu lweLwandle Lolukhulu. Kuyawuba ngulowo-ke umnyele ngasenshonalanga.

⁷ “ ‘Umnyele wenu ngasenyakatho utawuhamba usuke eLwandle Lolukhulu ucondze eNtsabeni iHori,

⁸ usuke eHori ucondze eLebo Hamathi. Lomnyele utawuhamba ucondze eSedadi,

⁹ uchubekele eZifroni ugcine eHasari Enani. Kutawuba ngulowo-ke umnyele wenu ngasenyakatfo.

¹⁰ “ ‘Umnyele wenu ngasemphumalanga utawuhamba usuke eHasari Enani uze ufike eShefamu.

¹¹ Umnyele utawucondza eningizimu, kusukela eShefamu kuya eRibla ngasemphumalanga ye-Ayini, uchubeke ugudle emacele ngasemphumalanga yeLwandle iKhinerethi.

¹² Lomnyele utakwewuka ugudle iJordane ugcine ngeLwandle Lweluswayi. “ ‘Ngiyo lena-ke iminyele yelive lenu kuyo yonkhe leyo mihlubulo yalo.’ ”

¹³ Ngako Mosi wakhuluma kuma-Israyeli, watsi: “Lelive nitakwabelana ngenkatho kutsi libe lifa lenu. Simakadze uyale kutsi labelwe tive letiyimfica kanye nencenye yesive,

¹⁴ ngobe imindeni yesive sakaRubeni, nesive sakaGadi, nencenye yesive sakaManase seyilemukele lifa lato.

¹⁵ Letive letimbili nencenye setilemukele lifa lato, ngasemphumalanga yemfula iJordane, malungana neJerikho kubheka ngasemphumalanga.”

Baholi bekwaba live

¹⁶ Simakadze wakhuluma kuMosi, watsi:

¹⁷ “Nankha-ke emabito alamadvodza latawunabela lelive kutsi libe lifa lenu: bo-Eleyazare, umphristi, naJoshuwa, umsa waNuni.

¹⁸ Beka umholi waleso naleso sive kutsi asisite ekwabeni lelive lelilifa lenu.

¹⁹ Nankha-ke emabito abo: “Khalebi, umsa waJefune, wesive sakaJuda;

²⁰ Shemuweli, umsa wa-Amihudi, wesive sakaSimeyoni;

²¹ Elidadi, umsa waKhisloni, wesive sakaBhenjamini;

²² Bukhi, umsa waJogli, umholi labephuma esiveni sakaDani;

²³ Haniyeli, umsa wa-Efodi, umholi labephuma esiveni sakaManase, umsa waJosefa;

²⁴ Khemuweli, umsa waShifthani, umholi labephuma esiveni saka-Efrayimu, umsa waJosefa;

²⁵ Elisafani, umsa waPhanaki, umholi labephuma esiveni sakaZebuloni;

²⁶ Phaltiyeli, umsa wa-Azani, umholi labephuma esiveni saka-Isakhari;

²⁷ Ahihudi, umsa waShelomi, umholi labephuma esiveni saka-Asheri;

²⁸ Phedaheli, umsa wa-Amihudi, umholi labephuma esiveni sakaNaftali.”

²⁹ Kwaba ngiwo lawa-ke emabito emadvodza Simakadze lawanika umsebenti wekwabela ema-Israyeli lifa lawo lekwakulive laseKhenani.