Numeri 17 - Siswati 1996 Bible

Indvuku ya-Aroni

¹ Simakadze wakhuluma kuMosi, watsi:

² “Khuluma kuma-Israyeli akunike tindvuku letili-12, yinye kuleso nakuleso sive lephuma kumholi waso. Bhala libito laleyo naleyo ndvodza endvukwini yayo.

³ Endvukwini yakaLevi ubobhala libito la-Aroni, ngobe kufanele kube nendvuku yalowo nalowo mholi waleso sive.

⁴ Letindvuku ubotibeka embikwelibhokisi lesivumelwane ethendeni lekuhlangana, lapho ngihlangana nani khona.

⁵ Indvuku yalowo lengimkhetsile itawuhluma, ngitakucedza kanjalo kusola kwalama-Israyeli lakhononako.”

⁶ Ngako Mosi wakhuluma kuma-Israyeli, nebaholi bawo bamnika letindvuku letili-12, leyo naleyo ndvuku imele umholi wesive, nendvuku ya-Aroni yayisemkhatsini wato.

⁷ Letindvuku Mosi watitsatsa watibeka embikwaSimakadze embikwelibhokisi lesivumelwane lelalisethendeni lebufakazi.

⁸ Ngelilanga lelilandzelako Mosi wangena ethendeni lebufakazi, kulelibhokisi lesivumelwane, wakhandza kutsi indvuku ya-Aroni, leyayimele sive semaLevi, yayingakahlumi kuphela kodvwa yaze yaba nemidvumba yachakaza yatsela titselo tema-alimondi.

⁹ Ngako Mosi watsatsa tonkhe letindvuku embikwaSimakadze watiletsa kuma-Israyeli. Atibuka, kwaba ngulowo watsatsa yakakhe.

¹⁰ Simakadze wakhuluma kuMosi, watsi: “Buyisela indvuku ya-Aroni uyibeke embikwelibhokisi lesivumelwane, igcinelwe kutsi ibe secwayiso kulabahlubukako. Loko kutawucedza kungisola nekumelana kwabo nami, khona bangetikufa.”

¹¹ Mosi wenta njengobe abeyalwe nguSimakadze.

¹² Sive sema-Israyeli sakhuluma kuMosi, satsi: “Sitakufa! Silahlekile! Silahleke sonkhe!

¹³ Nangabe lowo losondzela eceleni kwelithende laSimakadze atakufa, ngabe kusho kutsi sitakufa sonkhe yini?”