Numeri 15 - Siswati 1996 Bible

Imitsetfo ngemhlatjelo

¹ Simakadze wakhuluma kuMosi, watsi:

² “Khuluma kuma-Israyeli utsi: ‘Nase ningene eveni lenginipha lona kutsi libe likhaya lenu,

³ nibobe seniletsa iminikelo leyentiwa ngemlilo kuSimakadze, ibe yetinkhomo, nome yetimbuti, nome yetimvu, kube liphunga lelinuka lusi lolumnandzi kuSimakadze. Kungaba ngumnikelo wekushiswa, nome umhlatjelo wekugcwalisa setsembiso lesitsite, nome umnikelo wesihle, nome iminikelo yemikhosi.

⁴ Lowo loletsa umnikelo wakhe utawuletsa kuSimakadze umnikelo walokutinhlavu ngemalitha langaba mabili afulaha lobhicwe nemafutsa emncumo langaba yilitha.

⁵ Lungisa liwayini lelingaba yilitha ngelizinyane lemvu, libe ngumnikelo wekushiswa nome wemhlatjelo, kutsi liwayini libe ngumnikelo wesinatfo.

⁶ Nawunikela ngesihhanca, bhica fulaha wemnikelo walokutinhlavu longemakhilogremu langaba mabili labhicwe nemafutsa emncumo langaba yilitha nencenye,

⁷ kunikelwe kanye neliwayini lelingaba yilitha nencenye, kube ngumnikelo wesinatfo. Kunikele kube liphunga lelinuka lusi lolumnandzi kuSimakadze.

⁸ Nawulungisa inkunzana kutsi ibe ngumnikelo wekushiswa nome ibe ngumhlatjelo wesetsembiso lesitsite nome semnikelo wekuthula kuSimakadze,

⁹ uyawuyiletsa kanye nemnikelo walokutinhlavu kube ngufulaha longemalitha langaba sitfupha nencenye lobhicwe nemafutsa emncumo langemalitha langaba mabili,

¹⁰ kanye neliwayini lelingemalitha langaba mabili, lemnikelo walokunatfwako kube ngumnikelo lowentiwa ngemlilo, liphunga lelinuka lusi lolumnandzi kuSimakadze.

¹¹ “ ‘Kutabonikelwa kanjalo-ke, nakunikelwa ngenkunzi, nome ngesihhanca, nome ngelizinyane lemvu nome lembuti.

¹² Ngulowo nalowo mnikelo ubowentela loko kuye ngebunyenti bawo.

¹³ Wonkhe um-Israyeli wekutalwa kufanele ente njalo nakaletsa umnikelo lowentiwa ngemlilo, kube liphunga lelinuka lusi lolumnandzi kuSimakadze.

¹⁴ Nakwenteka nome ngunini wetive lohlala emkhatsini wenu, nome kukwesikhashana nome sikhatsi lesidze, aletsa umnikelo lowentiwa ngemlilo, kube liphunga lelinuka lusi lolumnandzi kuSimakadze, naye kufanele ente njengobe nani nenta.

¹⁵ Sive siyawuba nemtsetfo lofananako: wenu kanye newebetive labahlala emkhatsini wenu. Leso-ke simiso setitukulwane ngetitukulwane. Nine nebetive niyawufanana embikwaSimakadze.

¹⁶ Imitsetfo nemiyalo yenu iyawusebenta ngalokufananako kini nakubetive labasemkhatsini wenu.’ ”

¹⁷ Simakadze wakhuluma kuMosi, watsi:

¹⁸ “Khuluma kuma-Israyeli utsi: ‘Nase ningene eveni lenginipha lona,

¹⁹ kufanele nehlukanisele Simakadze sabelo sakhe, nanidla sinkhwa salelo live.

²⁰ Kufanele sinkhwa setilinga tenu tekwendvulelisa nisetfule njengemnikelo wesivuno senu sekucala ekubhuleni kwenu.

²¹ Tonkhe titukulwane tenu seniyawunikela kuSimakadze umnikelo wetivuno tenu tekwendvulelisa.

²² “ ‘Nangabe kwenteka nona ngesiphosiso ngekungayigcini lemiyalo Simakadze layinika Mosi,

²³ konkhe loko Simakadze laniyala ngako ngaMosi kusukela mhlazana Mosi acala kuniyala kuye embili titukulwane ngetitukulwane,

²⁴ nakwenteka-ke nona ngesiphosiso, nangabe sive sonkhe besingati, kufanele sive sinikele ngenkunzana yinye ibe ngumnikelo wekushiswa, liphunga lelinuka lusi lolumnandzi kuSimakadze, kanye nemnikelo walokutinhlavu, nemnikelo walokunatfwako, kanye nesiphongo sinye kube ngumnikelo wesono.

²⁵ Umphristi uyakwenta inhlawulo yekubuyisana kwesive sonkhe sema-Israyeli siyawube sesiyatsetselelwa, ngobe sone ngesiphosiso, futsi sitsite ngekona kwaso sasesiletsa kuSimakadze umnikelo lowentiwa ngemlilo kanye nemnikelo wesono.

²⁶ Sonkhe sive sema-Israyeli kanye nebetive labahlala emkhatsini waso bayawutsetselelwa, ngobe sonkhe lesive sone ngesiphosiso.

²⁷ “ ‘Kodvwa nangabe kone umuntfu munye ngesiphosiso, uyawuletsa sibhutatana lesinemnyaka munye budzala, sibe ngumnikelo wesono.

²⁸ Umphristi uyawukwentela lowo muntfu lowone ngesiphosiso inhlawulo yekubuyisana naSimakadze. Nase amentele leyo nhlawulo yekubuyisana naSimakadze, lowo muntfu uyawube sewuyatsetselelwa.

²⁹ Lowo mtsetfo wekona ngesiphosiso uyawusebenta ngalokufananako, nome ngabe kone um-Israyeli wekutalwa nome ngabe wetive.

³⁰ “ ‘Kodvwa umuntfu lowona ngemabomu, nome angewemdzabu nome angewetive, uyawuba nelicala lekungahloniphi Simakadze, uyawuncunywa esiveni sakubo.

³¹ Njengobe lomuntfu wedzelele livi laSimakadze, wephula lomunye wemitsetfo yakhe ngemabomu, kufanele ancunywe; licala lakhe libe setikwakhe.’ ”

Indvodza leyephula liSabatha

³² Atsi ema-Israyeli asesehlane, kwatfolakala indvodza itfota tinkhuni ngelilanga leliSabatha.

³³ Labo labayikhandza itfota tinkhuni bayitsatsa bayimikisa kuMosi na-Aroni nesive sonkhe,

³⁴ bayivalela esitokisini, ngobe kwakungakakhanyi kahle kutsi kufanele kwentiweni kuyo.

³⁵ Simakadze wakhuluma kuMosi, watsi: “Lendvodza kufanele ife. Sive sonkhe kufanele siyigcobe ngematje, siyigcobele ngephandle kwenkambu.”

³⁶ Ngako-ke sive sayitsatsa sayikhiphela ngephandle kwenkambu, sayigcoba ngematje yaze yafa, njengobe Simakadze abeyale Mosi.

Imitsetfo lecondzene netimvakaza tetingubo

³⁷ Simakadze wakhuluma kuMosi, watsi:

³⁸ “Khuluma kuma-Israyeli, utsi: ‘Kuto tonkhe titukulwane tenu letiyawulandzela kufanele nente timvakaza emiphetfweni yetingubo tenu ngelucotfo loluluhlata njengesibhakabhaka.

³⁹ Niyawutsi nanitibuka letimvakaza, bese nikhumbula yonkhe imiyalo yaSimakadze, niyilalele, khona ningetiwuba tingwadla ngekudvonswa tinkhanuko tetinhlitiyo tenu netemehlo enu.

⁴⁰ Niyawukhumbula kulalela yonkhe imiyalo yami, nibe ngulabehlukaniselwe Nkulunkulu wenu.

⁴¹ NginguSimakadze, Nkulunkulu wenu lowanikhipha eGibhithe, kutsi ngibe nguNkulunkulu wenu. NginguSimakadze, Nkulunkulu wenu.’ ”