Nehemiya 6 - Siswati 1996 Bible

Kusongelwa kwaNehemiya

¹ Kwase kufika livi kuboSanbalati, naThobiya, naGeshemu, um-Arabu, kanye nakuletinye titsa tetfu setivile kutsi ngase ngilwakhile lubondza kwavaleka yonkhe indzawo, noko ngangisengakatifaki tivalo emasangweni alo,

² boSanbalati naGeshemu bangitfumelela umlayeto, batsi: “Wota sitewuhlangana nawe kulelinye lalamadolobha etsafeni lase-Ono.” Kodvwa lelo bekulicebo lekungenta silo sengubo.

³ Ngako ngatfumela titfunywa kubo nemphendvulo leyayitsi: “Ngibhekene nemsebenti lomkhulu lapha, ngingeke ngikhone kwehla. Lomsebenti utawuyekelelwani, ngesikhatsi ngehla ngita lapho kini?”

⁴ Bangitfumelela lomlayeto emahlandla lamane, nami ngangiloku ngibaphendvula ngayona leyo mphendvulo.

⁵ Sanbalati watfumela lesinye setisebenti takhe, saletsa umlayeto wesihlanu ubhalwe encwadzini leyayingakavalwa,

⁶ utsi: “Geshemu ungitjele watsi kunemahemuhemu lasandzile kuletive letibomakhelwane kutsi wena kanye nemaJuda nitilungiselela kuvukela umbuso, nguko nje sewulwakha kabusha lolubondza. Ngetulu kwaloko lamahemuhemu atsi wena sewucondze kutibeka inkhosi,

⁷ nekutsi sewubeke ngisho nebaphrofethi kutsi batewumemetela eJerusalema kutsi wena sewuyinkhosi kaJuda. Nakanjani loko kutawufika etindlebeni tenkhosi, ngako ngincoma kuwe kutsi ute sitewuhlolisana ngaloko sindzawonye.”

⁸ Mine ngamtfumelela imphendvulo leyayitsi: “Kute intfo lenjalo leyentekako lapha; uyatisusela nje.”

⁹ Bonkhe babetama kusesabisa bacabanga batsi: “Tandla tabo titawuba butsakatsaka tingabe tisasebenta, lomsebenti ungabe usaphela.” Kodvwa ngathandaza ngatsi: “Nkulunkulu, cinisa tandla tami.”

¹⁰ Ngalelinye lilanga ngahamba ngaya endlini kaShemaya, umsa waDelaya, umsa waMehethabeli, labevalelwe ekhaya kakhe. Wakhuluma kimi watsi: “Asihlanganele endlini yaNkulunkulu ekhatsi ethempelini, sitivalele ekhatsi, ngobe kukhona emadvodza letako atekubulala ebusuku. Angefika nome ngunini kulobusuku atekubulala.”

¹¹ Kodvwa ngamphendvula ngatsi: “Indvodza lenjengami ingabaleka yini iyewubhaca? Empeleni umuntfu lofanana nami angabaleka yini, abalekele kufa ayewubhaca ethempelini? Ngingeke ngiye!”

¹² Ngavele ngabona kutsi abengakatfunywa nguNkulunkulu, kodvwa abephrofetha emelene nami, ngobe abesatsengwe boThobiya naSanbalati.

¹³ Abetsengelwe kutsi angesabise, khona ngitekwenta sono ngaloko, kuze phela ngitewuhlambalateka bese ngiyahlazeka.

¹⁴ Ngathandaza ngatsi: “Nkulunkulu wami, khumbula boThobiya naSanbalati ngenca yaloko labakwentile; ukhumbule nalomphrofethikati Nohadiya, kanye nalabanye babetama kungesabisa.”

Kuphela kwekwakhiwa kwelubondza

¹⁵ Lubondza lwaphela kwakhiwa ngelilanga lema-25 enyangeni ya-Eluli, emvakwemalanga langema-52.

¹⁶ Tatsi kube tonkhe titsa tetfu tive ngaloko, tonkhe tive letibomakhelwane takubona, letitsa tetfu tesaba tase tiyajabha, ngobe tabona kutsi lomsebenti siwente ngekusitwa nguNkulunkulu wetfu.

¹⁷ Kuwo lawo malanga baholi bemaJuda babesolomane babhalelana naThobiya bamsekela naye abaphendvule.

¹⁸ Bantfu labanyenti lapha kaJuda babefungele kumsekela, ngobe abengumkhwenyana waShekhaniya, umsa wa-Ara, nendvodzana yakhe Jehohanani yayitsetse indvodzakati yaMeshulamu, umsa waBherekhiya.

¹⁹ Ngetulu kwaloko, babechubeka nekungibikela imisebenti yakhe lemihle, baphindze bamtjele loko nami lengikushoko. Thobiya yena abetfumela tincwadzi tekungesabisa.