Nehemiya 5 - Siswati 1996 Bible

Kucindzetelwa kwalabamphofu

¹ Kwabe sekuvuka sikhalo lesikhulu emadvodzeni nakubomkawo, bakhala kubomnakabo labangemaJuda.

² Labanye bebatsi: “Tsine imindeni yetfu mikhulu kakhulu, sidzinga lokutinhlavu kuze sitekudla siphile.”

³ Labanye babekhuluma batsi: “Senta sibambiso ngemasimi etfu, nangetivini tetfu, nangetindlu tetfu, khona sitewutfola kudla ngesikhatsi sendlala.”

⁴ Noko labanye bakhonona batsi: “Sidzimate seboleka nemali, kuze sitewukhokha umtselo enkhosini, sitselele emasimi etfu netivini tetfu.

⁵ Nome sisive sinye nalabomnaketfu emaJuda kantsi futsi nebantfwabetfu kufanana nekutsi babo, kodvwa noko siphocelela lamadvodzana nemadvodzakati etfu kutsi abe tigcili. Lamanye emadvodzakati etfu asavele atsengisiwe aba tigcili, asinamandla, ngobe emasimi etfu netivini tetfu sesemukiwe.”

⁶ Ngatfukutsela ngabila, nangiva letikhalo tabo.

⁷ Ngazindla ngato engcondvweni yami, ngase ngisola labahlonishwa babo netindvuna tabo ngitsi: “Nibacindzetelelani labomnakenu?” Ngabita umhlangano lomkhulu wekucatulula lengcaki.

⁸ Ngakhuluma kubo, ngatsi: “Tsine setame ngawo onkhe emandla etfu kuhlenga labomnaketfu labangemaJuda lababetsengiswe kubetive; kodvwa nine nitsengisa labomnakenu, khona batekutsengiselwa tsine!” Baholi behluleka kutsi bangaphendvula batsini, ngako babindza.

⁹ Ngachubeka, ngatsi: “Loku lenikwentako kubi! Kufanele nesabe Nkulunkulu wetfu, khona ningetikunika betive labatitsa tetfu litfuba lekusihhalatisa.

¹⁰ Mine bantfu ngibakhululile kutsi beboleke kudla nemali lapha kimi, benta njalo nalabo lababangani bami kanye nalamadvodza lasebenta kimi. Sonkhe asingayibiti intalo!

¹¹ Sheshani nibuyisele kubo emasimi abo, netivini tabo, netihlahla tabo tetitselo temincumo, netindlu tabo kanye nalentalo lenibabite yona, lekuyincenye yelikhulu yemali, neyekudla, neyeliwayini lelisha kanye neyemafutsa.”

¹² Baholi baphendvula, batsi: “Sitakubuyisela, futsi kute lesitawuphindze sibabite kona ngetulu. Sitakwenta njengobe ushito.” Ngase ngibita baphristi, ngabafungisa labaholi netindvuna embikwabo kutsi basigcine lesifungo sabo labese basentile.

¹³ Ngesuka lapho ngakhumula libhande lelaliselukhalweni lwami ngalivitsita, ngitsi: “Shangatsi Nkulunkulu angamphatsa kanjena-ke wonkhe umuntfu longenakusigcina lesetsembiso sakhe. Shangatsi lowo muntfu angaphundleka adzimate asale angenalutfo!” Kuloko, lababekhona lapho bananatela, ngekutsi: “Amen!” badvumisa Simakadze. Bantfu benta njengobe babefungile.

Kwephana kwaNehemiya

¹⁴ Ngalesikhatsi seminyaka leli-12 ngingumbusi eveni lakaJuda, kusukela emnyakeni wema-20 wekubusa kwa-Athazeksesi kuye emnyakeni wema-32 wekubusa kwakhe, mine netihlobo tami asizange sikudle lokusabelo sami njengembusi.

¹⁵ Bonkhe babusi lababephetse ngembili kwami babengumtfwalo kubantfu, futsi babephocelela kutsi bantfu bakhiphe kudla neliwayini kanye netinhlavu tesiliva letingema-40 ngelilanga. Ngisho netisebenti tabo tatingumtfwalo kubantfu. Noko mine angikwentanga loko ngenca yekwesaba Nkulunkulu.

¹⁶ Esikhundleni saloko, ngatinikela mine emsebentini wekuvusa lubondza. Onkhe emadvodza akami abehlangana lapho kutakwenta umsebenti; tsine asizange sifunane nekutfola tindzawo.

¹⁷ Ngetulu kwaloko etafuleni lami ngangidla nemaJuda nebaholi bawo lababeli-150, kanye nebantfu lababeta baphuma kuletive letibomakhelwane.

¹⁸ Lilanga ngelilanga ngangihlatjelwa inkhabi yinye, netimvu telikhetselo letisitfupha, netinkhukhu letinyenti; bese njalo nje kanye ngemalanga lalishumi kukhishwe tinhlobonhlobo teliwayini lelinyenti. Nome kunjalo, angizange ngiphocelele muntfu kutsi ngabelwe kudla lokufanele umbusi, ngobe letibito tatingaba matima kakhulu kulabantfu.

¹⁹ Awu, Nkulunkulu wami, ngikhumbule ube nesihawu kimi ngako konkhe lengikwentele lesive.