Nehemiya 12 - Siswati 1996 Bible

Baphristi nemaLevi

¹ Baphristi nemaLevi lababuya kanye naZerubhabheli, umsa waSalatiyeli, naJeshuwa: bekuboSeraya, naJeremiya, na-Ezra,

² na-Amariya, naMaluki, naHathushi,

³ naShekhaniya, naRehumi, naMeremothi,

⁴ na-Ido, naGinethoni, na-Abiya,

⁵ naMijamini, naMowadiya, naBilgayi,

⁶ naShemaya, naJoyaribi, naJedaya,

⁷ naSalu, na-Amoki, naHilkiya, naJedaya. Labo-ke bekubaholi bebaphristi nebeticheme tabo ngesikhatsi saJeshuwa.

⁸ EmaLevi wona bekuboJeshuwa, naBinuwi, naKhadmiyeli, naSherebiya, naJuda kanye naMathaniya labenguyena aphetse kanye nabomnakabo, baphetse tingoma tekudvumisa.

⁹ BoBakbukiya, na-Uni, bomnakabo, bona babema babukane nabo nakukhontwako.

Titukulwane temPhristi Lomkhulu Jeshuwa

¹⁰ Jeshuwa watala Joyakimi, Joyakimi watala Eliyashibi, Eliyashibi watala Joyada,

¹¹ Joyada watala Jonathani, Jonathani watala Jaduya.

Tinhloko temindeni yebaphristi

¹² Tinhloko temindeni yebaphristi ngetikhatsi taJoyakimi betime kanje: kaSeraya bekunguMeraya, kaJeremiya kunguHananiya.

¹³ Ka-Ezra bekunguMeshulamu, ka-Amariya kunguJehohanani.

¹⁴ KaMaluki bekunguJonathani, kaShebaniya kunguJosefa.

¹⁵ KaHarimi bekungu-Adna, kaMeremothi kunguHelkayi.

¹⁶ Ka-Ido bekunguZakhariya, kaGinethoni kunguMeshulamu.

¹⁷ Ka-Abiya bekunguZikhri, kaMiniyamini nakaMowadiya kunguPhiltayi.

¹⁸ KaBilga bekunguShamuwa, kaShemaya kunguJehonathani.

¹⁹ KaJoyaribi bekunguMathenayi, kaJedaya kungu-Uzi.

²⁰ KaSalu bekunguKhalayi, ka-Amoki kungu-Ebheri.

²¹ KaHilkiya bekunguHashabiya, kaJedaya kunguNethaneli.

Incwadzimlandvo yemindeni yebaphristi nemaLevi

²² Tinhloko temindeni yemaLevi ngetikhatsi tabo-Eliyashibi, naJoyada, naJohanani, naJaduya kanye naleto tebaphristi taze tabhalwa ngesikhatsi sekubusa kwaDariyusi wasePheresiya.

²³ Tinhloko temindeni tetitukulwane temaLevi kuze kube ngusesikhatsini saJohanani, umsa wa-Eliyashibi, taze tabhalwa phansi etincwadzini temilandvo.

Kwabiwa kwemisebenti yasethempelini

²⁴ Baholi bemaLevi bekuboHashabiya, naSherebiya, naJeshuwa, umsa waKhadmiyeli; ticheme tabomnakabo tatima malungana nabo, kuze tidvumise tiletse netibongo, sicheme sabomnakabo lesinye siphendvule lesinye, njengobe abeshito Davide, inceku yaNkulunkulu.

²⁵ BoMathaniya, naBakbukiya, na-Obadiya, naMeshulamu, naThalmoni, na-Akhubi bekubomahlalesangweni lababeciza tingungumakamelo letatingasemasangweni.

²⁶ Bona-ke babekhonta lapho ngesikhatsi saJoyakimi, umsa waJeshuwa, umsa waJosadaki, nangesikhatsi saNehemiya, umbusi, bana-Ezra, umphristi nengcweti yetemtsetfo.

Nehemiya unikela lubondza lwelidolobha

²⁷ Ngesikhatsi sekunikelwa kwelubondza lweJerusalema, emaLevi afunwa aze atfolakala lapho abehlala khona, atsatfwa aletfwa eJerusalema kutsi atewungenela lomkhosi ngenjabulo, nangetingoma tekubonga, nangemculo wabokhencekhence, newemahabhu, newemalire lanetintsambo letinyenti.

²⁸ Nebahlabeli nabo babutfwa kulo lonkhe laseJerusalema nemaphetselo alo, kusukela emitini yemaNethofa,

²⁹ naseBhethi Gilgali, nasesigodzini saseGeba, nase-Azmavethi, njengobe bahlabeli nabo bese batakhele imiti emacentselweni aseJerusalema.

³⁰ Batsi nase batihlambululile ngekwelisiko baphristi nemaLevi, base bahlambulula bantfu, nemasango kanye nalolubondza.

³¹ Ngase ngikhuphula baholi bakaJuda baya etulu elubondzeni. Ngase ngilawula emakwaya lamabili ebahlabeli kutsi abonge ngemculo. Leli lelinye lalitawuchubeka lapha etulu elubondzeni liye ngesekudla, kubheka ngaseSangweni Lebulongo.

³² BoHoshaya kanye nencenye yebaholi bakaJuda babalandzela ngemuva,

³³ nabo-Azariya, na-Ezra, naMeshulamu,

³⁴ naJuda, naBhenjamini, naShemaya, naJeremiya,

³⁵ ngisho nalabanye baphristi lababenemacilongo kanye naZakhariya, umsa waJonathani, umsa waShemaya, umsa waMathaniya, umsa waMikhaya, umsa waZakhuri, umsa wa-Asafa,

³⁶ nabomnakabo: boShemaya, na-Azareli, naMilalayi, naGilalayi, naMayi, naNethaneli, naJuda, naHanani, netingubhu tabo telikhetselo laDavide, inceku yaNkulunkulu. Ezra, ingcweti yetemtsetfo, abehola wonkhe lomkhumbi walowo mkhosi.

³⁷ ESangweni Lemtfombo bachubeka bakhuphuka ngetitebhisi telubondza lweLidolobha laDavide letenyuka kulo, bendlule ngetulu kwendlu yaDavide baze bayewufika eSangweni Lemanti ngasemphumalanga.

³⁸ Lena lenye ikwaya yebahlabeli yayichubeka ngale, yacondza ngesancele iphambana nalena lenye lecondze ngasekudla. Ngabalandzela ngisetulu elubondzeni nginencenye yalabanye bantfu, sendlula uMbhoshongo Wemahhavu saya eLubondzeni Lolubanti,

³⁹ nasetikweLisango laka-Efrayimu, sendlulela nakulakaJeshana, nakuLetinhlanti, neMbhoshongo waHananeli, neweLikhulu kuze kuyewufika eSangweni Letimvu. Befika bema eSangweni Labomahlalesangweni.

⁴⁰ Lamakwaya lamabili labehlabelela kubonga esuka atsatsa tindzawo tawo lapha ekhatsi nendlu yaNkulunkulu, nami futsi kanjalo kanye nencenye yetindvuna,

⁴¹ nebaphristi nabo batsatsa tindzawo tabo, bo-Eliyakimu, naMaseya, naMiniyamini, naMikhaya, na-Eliyoyenayi, naZakhariya, naHananiya baphetse emacilongo abo,

⁴² kanye naboMaseya, naShemaya, na-Eleyazare, na-Uzi, naJehohanani, naMalkhiya, na-Elamu, na-Ezeri. Lamakwaya abehlatjeleliswa ngumholi wawo, Jezrahiya.

⁴³ Ngalelo langa banikela ngalemikhulu imihlatjelo bajabula, ngobe Nkulunkulu abebentele injabulo lenkhulu. Bafati nebantfwana nabo bajabula. Umsindvo wekujabula lowawuseJerusalema wawungevakala khashane kakhulu.

Emalungiselelo ekukhonta ethempelini

⁴⁴ Ngaleso sikhatsi kwabekwa emadvodza labetakwengamela tingungumakamelo teminikelo, netetilinga kanye netekwelishumi. Lamadvodza abebekelwe kutsi abutse iminikelo yebaphristi neyemaLevi kubo bonkhe balimi lababesedvutane nemadolobha, akuletse kuletingungumakamelo, tonkhe tabelo tebaphristi netemaLevi letatifunwa ngumtsetfo. Sonkhe sive semaJuda saseneliswa yinkonzo yebaphristi neyemaLevi.

⁴⁵ Babeyenta kahle lenkonzo yaNkulunkulu wabo kanye nenkonzo yekuhlanjululwa, njengobe kwakwenta lamakwaya nabomahlalesangweni, kuye njengekwemyalo waDavide nemsa wakhe Solomoni.

⁴⁶ Kadzeni ngetikhatsi taboDavide nabo-Asafa kwakunebacondzisi balabebahlabelela kanye nebetingoma tekudvumisa nekubonga Nkulunkulu.

⁴⁷ Ngako ngetikhatsi taboZerubhabheli naboNehemiya, onkhe ema-Israyeli abeletsa umnikelo welilanga ngelilanga webahlabeli newabomahlalesangweni. Ngabo futsi labebabela lawa lamanye emaLevi incenye yawo, nemaLevi ehlukanisa tabelo tetitukulwane ta-Aroni.