Nehemiya 11 - Siswati 1996 Bible

Bantfu labebahlala eJerusalema

¹ Baholi besive bakha eJerusalema, kwatsi laba labanye nje besive base benta inkatho kutsi bakhetse munye kulabo nalabo labalishumi kutsi ayewuhlala eJerusalema, lidolobha lelingcwele, bese kutsi laba labanye labayimfica babuyele emadolobheni akubo.

² Bantfu bawadvumisa onkhe emadvodza latinikela kutsi ayewuhlala eJerusalema.

³ Laba-ke baholi betifundza labefika bakha eJerusalema; labanye bekungema-Israyeli, nebaphristi, nemaLevi, netisebenti tasethempelini, nebatukulu betisebenti taSolomoni labebahlala emadolobheni akaJuda, nguloyo atihlalela endzaweni yakakhe emadolobheni lehlukene,

⁴ kantsi laba labanye lababephuma kaJuda nakaBhenjamini babehlala eJerusalema: Esitukulwaneni sakaJuda bekubo-Athaya, umsa wa-Uziya, umsa waZakhariya, umsa wa-Amariya, umsa waShefathiya, umsa waMahalaleli, umtukulu waPheresi,

⁵ naMaseya, umsa waBharuki, umsa waKholi Hoze, umsa waHazaya, umsa wa-Adaya, umsa waJoyaribi, umsa waZakhariya, umtukulu waShela.

⁶ Titukulwane takaPheresi lebetihlala eJerusalema tatingema-468, emadvodza lanemandla.

⁷ Esitukulwaneni sakaBhenjamini bekunguSalu, umsa waMeshulamu, umsa waJowedi, umsa waPhedaya, umsa waKholaya, umsa waMaseya, umsa wa-Ithiyeli, umsa waJeshaya,

⁸ kanye nebalandzeli bakhe, boGabhayi, naSalayi, emadvodza langema-928.

⁹ Joweli, umsa waZikhri, abeyindvuna yabo lenkhulu, Juda, umsa waHasenuwa, abengamele Sifundza Sesibili salelidolobha.

¹⁰ Kubaphristi bekuboJedaya, umsawaJoyaribi, naJakhini,

¹¹ naSeraya, umsa waHilkiya, umsa waMeshulamu, umsa waSadoki, umsa waMerayothi, umsa wa-Ahitubi, labengumengameli wasendlini yaNkulunkulu,

¹² nabomnakabo labahlanganyela nabo emsebentini wasethempelini, emadvodza labengema-822, nabo-Adaya, umsa waJerohamu, umsa waPhelaliya, umsa wa-Amsi, umsa waZakhariya, umsa waPhashuri, umsa waMalkhiya,

¹³ nabomnakabo lababetinhloko temindeni yabo, emadvodza langema-242, na-Amashisayi, umsa wa-Azareli, umsa wa-Ahazayi, umsa waMeshilemothi, umsa wa-Imeri,

¹⁴ nabomnakabo lababetingwazi letatinesibindzi tili-128. Indvuna yato bekunguZabdiyeli, umsa waHagedolimu.

¹⁵ KumaLevi bekuboShemaya, umsa waHashubi, umsa wa-Azrikamu, umsa waHashabiya, umsa waBuni,

¹⁶ naShabhethayi, naJozabadi, lababengubona batinhloko temaLevi labebhekene nemsebenti wangaphandle kwendlu yaNkulunkulu;

¹⁷ naMathaniya, umsa waMikha, umsa waZabdi, umsa wa-Asafa labengumcondzisi labehola tibongo nemithandazo, naBakbukiya labewesibili kubomnakabo, na-Abda, umsa waShamuwa labetalwa nguGalali, umsa waJeduthuni.

¹⁸ EmaLevi labesedolobheni lelingcwele abengema-284.

¹⁹ Bomahlalesangweni bekubo-Akhubi, naThalmoni kanye nebangani babo lababehlala bacize emasango, bona babeli-172.

²⁰ Lawa lamanye ema-Israyeli, nebaphristi babo, nemaLevi babegcwele kuwo onkhe emadolobha akaJuda, ngulowo ahleti endzaweni yeyisemkhulu.

²¹ Tisebenti tasethempelini tona tatihlala entsabeni i-Ofeli, boSiha naGishpa lekwakungutona tindvuna tabo.

²² Indvuna lenkhulu yemaLevi labeseJerusalema bekungu-Uzi, umsa waBani, umsa waHashabiya, umsa waMathaniya, umsa waMikha. Uzi abengulomunye webatukulu ba-Asafa lababehlabela endlini yaNkulunkulu.

²³ Bahlabeli-ke bona babephetfwe ngimiyalo yenkhosi leyayinguyona ibalawula ngemisebenti yemalanga ngemalanga.

²⁴ Phethahiya, umsa waMeshezabeli, lomunye wentalelwane yaZera, umsa waJuda, abeliso lenkhosi kuto tonkhe tindzaba letiphatselene nesive.

Bantfu labebakulamanye emadolobha nemadolobhakati

²⁵ Mayelana nemiti nemasimi ayo labanye bantfu bakaJuda bona babehlala eKhiriyathi Abha nasetabelweni tayo, eDiboni nasetabelweni tayo, eKhabsiyeli nasemitini yayo,

²⁶ naseJeshuwa, naseMolada, naseBhethi Pheleti,

²⁷ naseHasari Shuwali, eBherisheba nasetabelweni tayo,

²⁸ naseSikilagi, eMekhona nasetabelweni tayo,

²⁹ nase-Eni Rimoni, naseSora, naseJamuthi,

³⁰ naseZanowa, e-Adulamu nasemitini yayo, naseLakhishi, nasetigangeni tangakhona, e-Azekha nasetabelweni tayo. Ngako babegcwele kuyo yonkhe leyo ndzawo kusukela eBherisheba kuze kuyewufika eSigodzini sakaHinomu.

³¹ Titukulwane takaBhenjamini kusukela eGeba tatihlala eMikmashi, nase-Ayija, eBetheli nasetabelweni tayo,

³² nase-Anathothi, naseNobi, nase-Ananiya,

³³ naseHasori, naseRama, naseGithayimu,

³⁴ naseHadidi, naseSeboyimu, naseNebalathi,

³⁵ naseLodi, nase-Ono, naseSigodzini Setingcweti.

³⁶ Letinye ticheme temaLevi akaJuda takha kulakaBhenjamini.