Mikha 3 - Siswati 1996 Bible

Mikha usola baholi baka-Israyeli

¹ Lalelani, nine baholi baka-Israyeli! Bekufanele ngabe ninakekela kutsi esiveni sakini konkhe kwentiwe ngendlela lefanele;

² kodvwa esikhundleni saloko nitondza kulunga, nitsandze lokubi. Nihlinza bantfu bami, nihlube inyama yabo ematsanjeni abo.

³ Nidla inyama yemitimba yesive sami, nihlube inyama yaso ematsanjeni aso nihlahlele ematsambo aso, nicobe inyama yemitimba yabo njengenyama icotjelwa kufakwa ebhodweni.

⁴ Siyeta sikhatsi lapho nitawukhala khona kuSimakadze, kodvwa angeke aniphendvule. Angeke ayilalele imithandazo yenu, ngobe nente lokubi kuye.

⁵ Sive sami sedukiswa baphrofethi labetsembisa kuthula kulabo lababapha imali, kantsi labo labangabadizeli babetsembisa babasongele ngemphi. Kulabo baphrofethi Simakadze utsi:

⁶ “Baphrofethi, sekusele kancane kuniphelele; yebo, selinishonele lilanga. Njengobe naku nedukisa sive sami, ningeke niphindze nibe netiphrofetho temibono, futsi ningeke nikwati kukubona lokutako kusengakefiki.”

⁷ Labo lababona lokutako kusengakefiki bayawuhlazeka bative badliwa ngemahloni ngenca yekwehluleka kwabo. Bayawujabha, ngobe Nkulunkulu angasabaphendvuli.

⁸ Kepha mine, Simakadze ungigcwalisa ngaMoya nangemandla akhe, anginike luvelo lwekwenta tintfo ngekulunga, anginike nesibindzi sekutjela Israyeli lapho one khona nekutsi tono takhe ngutiphi.

⁹ Lalelani la kimi, nine babusi baka-Israyeli, nine lenitondza kuvikela lokulungile bese niguculela lokuhle kube kubi.

¹⁰ Nine nakha iJerusalema, likhaya laNkulunkulu, etikwesisekelo sekubulala kanye nekwenta tintfo ngekungalungi.

¹¹ Babusi balamadolobha bawabusa ngekudizelwa, kanjalo nebaphristi bayatsengwa kuze bachaze bahumushe nemtsetfo, nebaphrofethi imibono netembulo tabo batichaza ngekudizelwa; noko basajinge bachoshe ngekutsi Simakadze unabo, batsi: “Kute lokutasehlela, ngobe Simakadze unatsi.”

¹² Ngako-ke ngenca yenu, iSiyoni iyawulinywa njengensimi, iJerusalema iyakuba yincumbi yencitsakalo, intsaba yelithempeli ibe lihlatsi.