Matewu 8 - Siswati 1996 Bible

Jesu uhlambulula lilephelo

¹ Kwatsi Jesu nehla entsabeni, walandzelwa ticumbi letinyenti tebantfu.

² Kwase kufika umuntfu labenebulephelo, wakhuleka kuye watsi: “Nkhosi, nawutsandza, ungangihlambulula.”

³ Jesu welula sandla, wamtsintsa watsi: “Ngiyatsandza, hlambuluka!” Nembala wahlambuluka masinyane ebulephelweni bakhe.

⁴ Jesu wase utsi kuye: “Lalela la! Ungatjeli muntfu, kodvwa hamba uye kumphristi akubone, bese wenta umnikelo wekubonga lowamiswa nguMosi, ukhombise nebantfu kutsi sewuhlantekile.”

Jesu uphilisa sisebenti sendvuna lengumRoma

⁵ Kwatsi Jesu asangena eKhaphanawume, wahlangabetwa yindvuna yelikhulu lemasotja, yamncenga

⁶ yatsi: “Nkhosi, sisebenti sami silele phansi endlini, sife luhlangotsi, sisebuhlungwini lobukhulu.”

⁷ Jesu watsi kuyo: “Ngiyeta, mine ngitamphilisa.”

⁸ Lendvuna yaphendvula yatsi: “Nkhosi, angikafanelwa nekutsi ungene ngaphansi kweluphahla lwendlu yami, kepha shano livi nje, khona sisebenti sami sitawuphila.

⁹ Nami nginetiphatsimandla letingetulu kwami, nginemasotja langaphansi kwami; ngitsi kulelinye: ‘Hamba,’ lihambe; ngitsi kulelinye: ‘Wota la,’ lite; nencekwini yami ngitsi: ‘Yenta loku,’ ikwente.”

¹⁰ Jesu nakuva loko, wamangala, watsi kulaba babemlandzela: “Ngicinisile, ngitsi kini: Ngisho naka-Israyeli angizange sengikutfole kukholwa lokunje.

¹¹ Kepha ngiyanitjela ngitsi: Labanyenti bayawuchamuka emphumalanga nasenshonalanga, bahlale etafuleni kanye na-Abrahama, na-Isaka, naJakobe embusweni welizulu.

¹² Kodvwa bantfwana bembuso bayawukhishelwa ebumnyameni bangaphandle, lapho kuyawuba khona kukhala nekugedletela kwematinyo.”

¹³ Jesu wase utsi endvuneni: “Hamba, akwenteke kuwe njengekukholwa kwakho!” Lesisebenti sasindza ngaso leso sikhatsi.

Jesu uphilisa bantfu labanyenti

¹⁴ Jesu wase ungenisa ekhaya laPhetro, lapho efika wakhandza uninatala waPhetro alele embhedzeni, aphetfwe ngumkhuhlane.

¹⁵ Jesu watsintsa sandla sakhe, umkhuhlane wase uyamyekela; wasukuma wamlungisela kudla.

¹⁶ Kwatsi nase kuhlwa, baletsa kuye labanyenti lababenemadimoni; wabakhipha bonkhe bomoya lababi ngelivi nje, waphilisa bonkhe lababegula,

¹⁷ kuze kugcwaliseke loko lokwakhulunywa ngumphrofethi Isaya nakatsi: “Wasetfwalela butsakatsaka betfu, watisusa kitsi tifo tetfu.”

Labangahle babe balandzeli baJesu

¹⁸ Jesu watsi kube abone sicumbi simkakile, wase utsi akwewelelwe ngesheya kwelwandle.

¹⁹ Kwase kufika sati semtsetfo satsi: “Mfundzisi, ngitakulandzela, ngisho nome uyaphi.”

²⁰ Jesu wamphendvula watsi: “Timphungutja tinemigodzi, netinyoni tinetidleke, kodvwa iNdvodzana yeMuntfu ite indzawo yekulala iphumule.”

²¹ Lomunye webafundzi bakhe watsi kuye: “Nkhosi, asewungivumele kucala sengiyewungcwaba babe!”

²² Kepha Jesu watsi kuye: “Ngilandzele, uyekele labafile, bangcwabe labafile babo!”

Jesu ubindzisa sivunguvungu

²³ Kwatsi Jesu nasangena esikebheni, bafundzi bakhe bamlandzela.

²⁴ Kwase kuvuka sivunguvungu selwandle lesikhulu, sikebhe sadzimate sagujetelwa ngemagagasi; kepha Jesu abelele.

²⁵ Bafundzi baya kuye bayakumvusa batsi: “Nkhosi, sisindzise! Sesiyafa!”

²⁶ Jesu wabaphendvula watsi: “Nesabani, nine bekukholwa lokuncane?” Wasukuma wasekhuta lesivunguvungu kanye nelwandle, kwase kuba khona kuthula lokukhulu.

²⁷ Bantfu bamangala, badzimate batsi: “Kantsi muntfu muni lona, ngobe imimoya nelwandle kuyamlalela?”

Jesu uphilisa emadvodza lamabili lanemadimoni

²⁸ Kwatsi Jesu nasafikile ngesheya, eveni lemaGadara, wahlangabetwa bantfu lababili lababenemadimoni, baphuma emathuneni. Babeyingoti lenkhulu kangangekutsi kwakungasahambi muntfu ngaleyo ndlela.

²⁹ Bamemeta batsi: “Sinamsebenti muni nawe, Ndvodzana yaNkulunkulu, sewutele kutesivisa buhlungu yini sikhatsi sisengakefiki?”

³⁰ Madvutane nalapho kwakudla umhlambi lomkhulu wetingulube.

³¹ Emadimoni ancenga Jesu atsi: “Nawusikhipha la, sitfumele singene kunankhu umhlambi wetingulube!”

³² Jesu watsi kuwo: “Hambani!” Ngako aphuma angena etihhontjini, wonkhe lowo mhlambi wagijima wewusa sihosha, wangena elwandle, wacwila, wafa.

³³ Lamadvodza abelusile abaleka aya edolobheni, afike abalandzisa yonkhe indzaba, nekutsi kwentekani kulamadvodza lamabili labenemadimoni.

³⁴ Ngako-ke wonkhe umuntfu kulelo dolobha waphuma wayawuhlangabeta Jesu; batsi kube bambone, bamncenga batsi akesuke kulelo live labo.