Matewu 7 - Siswati 1996 Bible

Ngekwehlulela labanye

¹ “Ningabehluleli labanye, kuze nani ningetikwehlulelwa nguNkulunkulu.

² Ngobe ngaloko kwehlulela lenehlulela ngako labanye, nani niyakwehlulelwa ngako; nangaleso silinganiso lenilinganisa ngaso, nani niyakulinganiswa ngaso.

³ Pho, ulunakeni lutsi lolusesweni lwemzalwane wakho, kodvwa ube ungalunaki lolugodvo lolusesweni lakho?

⁴ Nome-ke ungasho kanjani kumzalwane wakho utsi: ‘Ase ngikukhiphe nalu lutsi lolusesweni lakho,’ ibe kantsi kuvundle lugodvo esweni lakho?

⁵ Mtentisi, cala kucala ukhiphe lugodvo lolusesweni lakho, emvakwaloko-ke utakubonisisa kahle kutsi ukhiphe lutsi lolusesweni lwemzalwane wakho.

⁶ “Ningatiniki tinja lokungcwele, ningawalahli etihhontjini ematje enu laligugu, funa tiwagcobagcobe ngetinselo tato, bese tigucukela kini tiyanidzabudzabula.”

Ngekucela, nekufuna, nekunconcotsa

⁷ “Celani, nitawuphiwa; funani, nitakutfola; nconcotsani, nitakuvulelwa.

⁸ Ngobe wonkhe locelako uyakuphiwa, nalofunako uyatfola, nalonconcotsako uyavulelwa.

⁹ Ngubani emkhatsini wenu lekungatsi umsa wakhe nakacela sinkhwa, yena amnike litje?

¹⁰ Nome acela inhlanti, yena amnike inyoka?

¹¹ Nangabe-ke nine lenibabi kangaka nikwati kubapha bantfwabenu tipho letinhle, kakhulu kangakanani-ke uYihlo losezulwini utakubapha lokuhle labacela kuye.

¹² “Ngako-ke konkhe lenifisa kutsi bantfu bakwente kini, kwenteni nani kubo; ngobe ngulowo umgogodla wemtsetfo newemfundziso yebaphrofethi.”

Ngelisango lelincane

¹³ “Ngenani ngelisango lelincane, ngobe lisango libanti nendlela ibanti leyisa ekubhujisweni, banyenti labangena ngalo.

¹⁴ Kepha lisango lincane nendlela yincane leyisa ekuphileni, nebantfu labayitfolako bambalwa.”

Ngesihlahla nesitselo saso

¹⁵ “Caphelani baphrofethi bemanga, labeta kini banjengetimvu ngaphandle, kodvwa ngekhatsi banjengetimphisi letibukhali.

¹⁶ Niyawubati ngemisebenti yabo, njengetihlahla tatiwa ngetitselo tato. Emagelebisi angakhiwa yini etihlahleni temanyeva, nome emakhiwa elugaganeni?

¹⁷ Sihlahla lesimnandzi sitsela titselo letimnandzi, kantsi sihlahla lesibi sitsela titselo letimbi.

¹⁸ Sihlahla lesimnandzi singeke sitsele titselo letimbi, kanjalo futsi nesihlahla lesibi singeke sitsele titselo letimnandzi.

¹⁹ Sonkhe sihlahla lesingatseli titselo letimnandzi, siyajutjwa, silahlwe emlilweni.

²⁰ Ngako-ke baphrofethimbumbulu niyawubati ngetitselo tabo.”

Ngekuva nekwenta

²¹ “Akusibo bonkhe labatsi kimi: ‘Nkhosi, Nkhosi,’ labayawungena embusweni welizulu, kodvwa ngulabo labenta intsandvo yaBabe losezulwini.

²² Ngalelo langa labanyenti bayakutsi kimi: ‘Nkhosi, Nkhosi, asizange siphrofethe yini ngelibito lakho? Asiwakhiphanga yini emadimoni ngelibito lakho? Asiyentanga yini imisebenti leminyenti nalemikhulu ngelibito lakho?’

²³ Kepha ngiyawubaphendvula ngitsi: ‘Angizange nginati. Sukani kimi, nine benti balokubi!’ ”

Ngebakhi lababili

²⁴ “Ngako-ke wonkhe umuntfu lova lamavi ami awente, ufanana nendvodza lehlakaniphile, leyakha indlu yayo etikwelidvwala.

²⁵ Kwase kuna imvula, imifula yagcwala, nemimoya yahhusha, yetama kuyiphephula lendlu, kodvwa ayizange iwe, ngobe yayakhelwe esisekelweni lesasilidvwala.

²⁶ “Lowo lova lamavi ami angawenti, ufanana nendvodza lesilima, leyakha indlu yayo esihlabatsini.

²⁷ Kwase kuna imvula, imifula yagcwala, nemimoya yahhusha yayiphephula lendlu, yaze yawa. Maye! Kwaba kukhulu loko kuwa kwayo!”

Emandla aJesu

²⁸ Kwatsi Jesu nacedza lenkhulumo yakhe, ticumbi tebantfu tase timangele ngalemfundziso yakhe,

²⁹ ngobe abebafundzisa njengemuntfu lonemandla, hhayi njengetati tabo temtsetfo.