Matewu 4 - Siswati 1996 Bible

Kulingwa kwaJesu

¹ Khona lapho nje Jesu waholelwa nguMoya waNkulunkulu ehlane, kuze atewulingwa nguSathane.

² Asazilile kudla emalanga langema-40 nebusuku bakhona, wase uyalamba.

³ Umlingi wase uyefika kuye utsi: “NawuyiNdvodzana yaNkulunkulu, tjela nankha ematje agucuke abe tinkhwa!”

⁴ Jesu waphendvula watsi: “Kubhaliwe kutsi: “ ‘Umuntfu angeke aphile ngesinkhwa sodvwa, kodvwa uphila ngawo onkhe emavi laphuma emloyeni waNkulunkulu.’ ”

⁵ Wesuka lapho Sathane wamyisa edolobheni lelingcwele, wammisa esicongweni selithempeli,

⁶ watsi kuye: “NawuyiNdvodzana yaNkulunkulu, tijike phansi, ngobe kubhaliwe kutsi: “ ‘Uyawuyaleta tingilosi takhe ngawe kutsi tikwetfwale ngetandla tato, ungete wakhutjwa nalitje etinyaweni takho.’ ”

⁷ Jesu watsi kuye: “Kantsi kubhaliwe futsi nekutsi: “ ‘Ungaboyilinga iNkhosi, Nkulunkulu wakho!’ ”

⁸ Waphindza futsi Sathane wamtsatsa, wamenyusela esicongweni sentsaba, wamkhombisa yonkhe imibuso nebucwebecwebe bayo,

⁹ watsi kuye: “Konkhe loku ngitakunika kona, nawungamane uwe phansi nje, ungikhotsame.”

¹⁰ Jesu watsi kuye: “Suka, Sathane, ngobe kubhaliwe kutsi: “ ‘Ubokhonta iNkhosi, Nkulunkulu wakho, umkhotsamele yena yedvwa!’ ”

¹¹ Wesuka Sathane wamshiya, kwase kufika tingilosi titewusita Jesu.

Jesu ucala kusebenta eGalile

¹² Watsi Jesu nakeva kutsi Johane abesafakwe ejele, wahamba waya eGalile.

¹³ Wesuka eNazaretha wayawuhlala eKhaphanawume eceleni kwelwandle, eveni lakaZebuloni nelakaNaftali,

¹⁴ kuze kugcwaliseke lokwashiwo ngumphrofethi Isaya kutsi:

¹⁵ “Wena, live lakaZebuloni, nawe, live lakaNaftali, nine, leningasendleleni lengaselwandle, nani leningesheya kweliJordane, nawe, Galile, live lebetive,

¹⁶ sive lebesihleti ebumnyameni, nikubonile kukhanya lokukhulu; nine, lebenihleti eveni nasetfuntini lekufa, kuphumele kini kukhanya.”

¹⁷ Kusukela ngaleso sikhatsi Jesu wacala kushumayela watsi: “Phendvukani, ngobe umbuso welizulu sewusondzele.”

Jesu ubita badwebi labane

¹⁸ Jesu asahamba ngaseLwandle lwaseGalile, wabona telamani letimbili letatibadwebi, Simoni labetsiwa nguPhetro, na-Andreya, umnakabo, babedweba tinhlanti ngelinetha.

¹⁹ Jesu watsi kubo: “Ngilandzeleni, ngitawunenta badwebi bebantfu.”

²⁰ Bashiya emanetha abo masinyane, bamlandzela.

²¹ Asachubeka lapho, wabona letinye telamani letimbili, boJakobe naJohane, emadvodzana aZebedi, lababesesikebheni naZebedi, uyise, bachibela emanetha abo, wababita.

²² Masinyane bamshiya uyise kanye nesikebhe, balandzela Jesu.

Jesu uyafundzisa, uyashumayela, uyaphilisa

²³ Jesu walihamba lonkhe laseGalile, afundzisa emasinagogeni abo, ashumayela liVangeli lembuso, aphilisa bantfu kuto tonkhe tifo nasekuguleni kwabo.

²⁴ Ludvumo ngaye lwandza nalo lonkhe laseSiriya, kangangekutsi kwaletfwa kuye bonkhe bantfu lababegula, baphetfwe tinhlobonhlobo tekufa, nalababekhatsatwe tinhlobonhlobo tetinhlupheko: lababenemadimoni, nalababenesitfutfwane, nalababefe tinhlangotsi; Jesu wabaphilisa bonkhe.

²⁵ Ticumbi letikhulu tebantfu tamlandzela tisuka eGalile, naseDekhapholisi, naseJerusalema, naseJudiya, naseveni lelingesheya kwemfula iJordane.