Matewu 27 - Siswati 1996 Bible

Jesu umikiswa kuPhilatu

¹ Ekuseni lokwa ngeluvivi baphristi labakhulu netibondza tesive benta lisu lekubulala Jesu.

² Bambopha, bamtsatsa, bammikisa kuLusibalukhulu Philatu.

Kufa kwaJudasi

³ Judasi, labengumtsengisi wakhe, nakabona kutsi Jesu bamlahle ngelicala lekufa, watisola, wabuyisela letinhlavu letingema-30 kubaphristi labakhulu kanye netibondza,

⁴ atsi: “Ngonile ngekutsengisa ngengati lengenacala!” Bona batsi kuye: “Pho, singenaphi lapho tsine? Tibonele wena!”

⁵ Judasi wasakata phansi lemali ethempelini, wahamba wayawutikhunga.

⁶ Baphristi labakhulu bayicobonga lemali batsi: “Lemali ngeyengati, kantsi kuphambene nemtsetfo wakitsi kutsi imali lenje ifakwe esikhwameni selithempeli.”

⁷ Emvakwekuvumelana ngaloko, lemali batsenga ngayo iNsimi yeMbumbi, kuze ibe yindzawo yekungcwabela tihambi.

⁸ Ngiko nje lensimi kuze kube ngulamuhla ibitwa ngekutsi: “YiNsimi yeNgati.”

⁹ Ngako kwagcwaliseka loko lokwashiwo ngumphrofethi Jeremiya kutsi: “Batsatsa tinhlavu letingema-30 tesiliva, intsengo yakhe. Lentsengo ngaye yalungiswa ngulabanye bemadvodzana aka-Israyeli.

¹⁰ Batsenga ngayo insimi yembumbi, njengobe iNkhosi ingiyalile.”

Philatu ubuta Jesu

¹¹ Jesu wemiswa embikwaLusibalukhulu lowambuta watsi: “Wena ungiyo yini inkhosi yemaJuda?” Jesu waphendvula watsi: “Usho kona.”

¹² Kepha ngesikhatsi baphristi labakhulu netibondza bametfwesa emacala abengaphendvuli.

¹³ Ngako Philatu watsi kuye: “Awuweva yini lamacala langaka labakubeka wona?”

¹⁴ Kepha Jesu akazange amphendvule, ngisho nangalinye nje. Lusibalukhulu wamangala kakhulu.

Jesu bamlahla ngelicala lekufa

¹⁵ Ngesikhatsi semkhosi Lusibalukhulu abenemkhuba wekukhulula sinye siboshwa lesasifunwa sicuku sebantfu.

¹⁶ Ngaso leso sikhatsi-ke kwakunesiboshwa lesasidvume ngebubi baso lebesinguBharaba.

¹⁷ Ngako-ke satsi kube lesicumbi sibutsane, Philatu wasibuta watsi: “Nifuna nginikhululele bani emkhatsini waBharaba naJesu lowatiwa ngekutsi nguKhristu?”

¹⁸ Abati kahle kamhlophe kutsi Jesu babemletse ngobe babenemona naye.

¹⁹ Watsi Philatu asahleti esihlalweni sekwehlulela, umfati wakhe watfumela kuye livi atsi: “Ungatifaki endzabeni yalowo muntfu longenacala, ngobe angikalali ngihlushwa ngaye ngeliphupho ebusuku balamuhla.”

²⁰ Kepha baphristi labakhulu netibondza bativumisa leticumbi kutsi ticele Bharaba, kubulawe Jesu.

²¹ Kodvwa Lusibalukhulu wababuta watsi: “Nifuna nginikhululele muphi emkhatsini walaba lababili?” Baphendvula batsi: “Bharaba!”

²² Philatu wababuta watsi: “Ngenteni-ke ngaloJesu lekutsiwa nguKhristu?” Bonkhe baphendvula batsi: “Mbetsele esiphambanweni!”

²³ Kodvwa Philatu wababuta futsi watsi: “Ngobe ente cala lini?” Kepha kwaba ngukhona bamemeta bonkhe batsi: “Mbetsele esiphambanweni!”

²⁴ Watsi kube abone Philatu kutsi kute langaphindze akwente, nekutsi sekusuka siphitsiphitsi, watsatsa emanti, wageza tandla embikwebantfu bonkhe watsi: “Anginacala ngengati yalomuntfu! Tiboneleni nine!”

²⁵ Sonkhe sive saphendvula satsi: “Ingati yakhe ayibesetikwetfu nasetikwebantfwana betfu!”

²⁶ Philatu wase ubakhululela Bharaba; kepha Jesu asashayiwe wase umnikela kubo kutsi abetselwe esiphambanweni.

Emasotja ahlekisa ngaJesu

²⁷ Emasotja aLusibalukhulu ase atsatsa Jesu ammikisa esigodlweni saLusibalukhulu. Lonkhe libutfo lemasotja lasondzela lamtungeleta.

²⁸ Lamhlubula tingubo takhe, lamembatsisa ingubo lebovu.

²⁹ Lase leluka umchele ngemanyeva, lawufaka enhloko yakhe, lambambisa umhlanga ngesekudla, laguca embikwakhe, lamphukuta latsi: “Bayethe! Nkhosi yemaJuda!”

³⁰ Lamkhafulela ngematse, latsatsa lomhlanga, lamshaya enhloko.

³¹ Naselicedzile kumphukuta, lamkhumula lengubo lebovu, laphindze futsi lamembatsisa letakhe tingubo, lase liphuma naye layakumbetsela esiphambanweni.

Jesu ubetselwa esiphambanweni

³² Libutfo lemasotja latsi lisaphuma nje lahlangana nalenye indvodza yaseSirene, lenguSimoni libito layo, layicindzetela kutsi yetfwale siphambano saJesu.

³³ Nasebafikile endzaweni lekutsiwa yiGolkotha, lokusho kutsi: “YiNdzawo yeSikobho,”

³⁴ lamnatsisa liwayini lelalibhicwe nenyongo; watsi kube alive walala, wangete walinatsa.

³⁵ Selimbetsele esiphambanweni, lase lenta inkatho, lehlukaniselana ngetingubo takhe.

³⁶ Lahlala phansi, lamgadza.

³⁷ Ngetulu kwenhloko yakhe labeka satiso selicala lagwetjwe ngalo sitsi: “lona ngujesu, inkhosi yemajuda.”

³⁸ Kwase kubetselwa kanye naye tigebengu letimbili, lesinye ngesekudla, lesinye ngesancele.

³⁹ Bantfu lababendlula lapho babemetfuka banikine tinhloko,

⁴⁰ batsi: “Wena lobhidlita lithempeli uphindze ulakhe ngemalanga lamatsatfu! Tisindzise phela, nangabe uyiNdvodzana yaNkulunkulu! Yehla lapho esiphambanweni!”

⁴¹ Kanjalo futsi nebaphristi labakhulu, netati temtsetfo, netibondza bamphukuta, batsi:

⁴² “Wabasindzisa labanye, kodvwa yena angeke atisindzise! Kantsi akasiyo iNkhosi yema-Israyeli yini? Akehle phela! Nangabe angehla esiphambanweni, sitawukholwa nguye!

⁴³ Wetsembele kuNkulunkulu. Akamehlise phela loNkulunkulu wakhe namtsandza! Ngobe watsi: ‘NgiyiNdvodzana yaNkulunkulu.’ ”

⁴⁴ Ngisho nalabo lababili lababebetselwe kanye naye, bametfuka nabo.

Kufa kwaJesu

⁴⁵ Kepha kusukela ngeli-awa leli-12 emini umhlaba wonkhe waba mnyama, kwaze kwaba li-awa lesitsatfu.

⁴⁶ Kwatsi ngensimbi yesitsatfu entsambama Jesu wakhala kakhulu watsi: “Eli, Eli, lama sabakthani?” lokusho kutsi: “Nkulunkulu wami, Nkulunkulu wami, ungishiyeleni?”

⁴⁷ Labanye bantfu lababelapho labamuva batsi: “Ase nimuve! Ubita Elija!”

⁴⁸ Lomunye wabo wagijima masinyane waya kuye nesiponji, wasenya ewayinini lelimunyu, wasihloma elutsini lwemhlanga wetama kumnatsisa.

⁴⁹ Kodvwa labanye batsi: “Ase nimyekele, sibone kutsi lo-Elija utawufika yini atemsindzisa!”

⁵⁰ Jesu waphindze wakhala ngelivi lelikhulu kakhulu, wase uyafa.

⁵¹ Bheka, indvwangu leyayilenga ethempelini yadzabuka ekhatsi, kusukela etulu kuya phansi. Umhlaba watamatama, emadvwala achekeka ekhatsi,

⁵² emathuna avuleka, bantfu labanyenti baNkulunkulu labebafile bavuswa ekufeni.

⁵³ Bawashiya emathuna; emvakwekuvuka kwaJesu ekufeni baya bangena edolobheni lelingcwele, lapho babonwa bantfu labanyenti.

⁵⁴ Indvuna yemphi nemasotja labenawo labelindze Jesu, nabakubona lokutamatama kwemhlaba, nako konkhe lokwenteka, befikelwa kwesaba lokukhulu baze batsi: “Ngempela lomuntfu abeyiNdvodzana yaNkulunkulu!”

⁵⁵ Kwakunebafati labanyenti lapho lababemlandzela basita Jesu kusukela eGalile; babebukela, babucalu.

⁵⁶ Emkhatsini wabo bekukhona Mariya waseMagdala, naMariya, unina waJakobe naJosefa, nenina wemadvodzana aZebedi.

Kungcwatjwa kwaJesu

⁵⁷ Nakuhwalalako, kwefika Josefa labeyinjinga yase-Arimathiya, naye futsi abengulomunye webafundzi baJesu.

⁵⁸ Waya kuPhilatu kuyawucela sidvumbu saJesu. Philatu wakhipha livi watsi akanikwe.

⁵⁹ Ngako Josefa wasitsatsa lesidvumbu, wasigocota ngendvwangu lenhle, yelineni lecolisakele,

⁶⁰ wasibeka ethuneni lelisha labesandza kuligubha edvwaleni. Wase ugicitela litje lelikhulu emnyango walelithuna wavala ngalo, wesuka wahamba.

⁶¹ Kepha Mariya waseMagdala nalomunye Mariya babehleti khona lapho, macondzana nelithuna.

Balindzi belithuna

⁶² Ngakusasa, lokusho kutsi, ngelilanga lelilandzela lelemalungiselelo, baphristi labakhulu nebaFarisi bahlangana naPhilatu,

⁶³ batsi kuye: “Nkhosi, siyakhumbula kutsi lomkhohlisi asaphila watsi: ‘Ngiyawuvuka emvakwemalanga lamatsatfu.’

⁶⁴ Ngako khipha umyalo kutsi lelithuna lakhe ligadzisiswe kahle kuze kube lilanga lesitsatfu, kuze bafundzi bakhe bangayi kuyawumeba, bese batjela bantfu batsi: ‘Uvusiwe kulabafile,’ bese kutsi lamanga akhe ekugcina abe makhulu kakhulu kunalawa ekucala.”

⁶⁵ Philatu watsi kubo: “Tsatsani naba balindzi nihambe niyekulelusa njengekubona kwenu.”

⁶⁶ Besuka bahamba, bayawuligadzisisa lelithuna: balivalisisa, baze bashiya neluphawu etjeni, babeka nebalindzi.