Matewu 24 - Siswati 1996 Bible

Jesu ukhuluma ngekubhujiswa kwelithempeli

¹ Jesu abephuma ethempelini; abesahamba ngesikhatsi bafundzi bakhe beta kuye batemkhombisa takhiwo telithempeli.

² Kepha waphendvula watsi: “Angitsi, niyakubona konkhe loku? Nginitjela ngitsi: Kute ngisho nalinye litje leliyawusala lihleti etikwalelinye lingakadzilitelwa phansi.”

Tinhlupheko nekuphatseka kabi

³ Watsi Jesu asehleti eNtsabeni Yemincumo, bafundzi bakhe beta kuye ngasense, batsi: “Sitjele kutsi letintfo tiyakwenteka nini, kuyakwentekani lokuyawukhombisa kutsi sesikhatsi sekubuya kwakho nekutsi sekuphela kwetikhatsi?”

⁴ Jesu waphendvula watsi: “Caphelani, kutsi kubete umuntfu lonedukisako.

⁵ Ngobe bantfu labanyenti bayawuta ngelibito lami, befike batsi: ‘NginguKhristu!’ bedukise labanyenti.

⁶ Niyawuva ngetimphi nangemahemuhemu etimphi; caphelani ningetfuki, ngobe loko kufanele kwenteke, kodvwa umhla wekuphela uyawube ungakefiki.

⁷ Ngobe sive siyawuvukela lesinye sive, nembuso uyawuvukela lomunye umbuso. Kuyawuba khona tindlala nekutamatama kwemhlaba tindzawo ngetindzawo.

⁸ Konkhe loku kukucala kwemihelo.

⁹ “Lapho-ke bayawuninikela etinhlungwini, banibulale. Tonkhe tive tiyawunitondza ngenca yelibito lami.

¹⁰ Labanyenti bayawuhlubuka, batsengisane bodvwana, batondzane.

¹¹ Kuyakuvela baprofethi bemanga labanyenti, bedukise bantfu labanyenti.

¹² Ngekwandza kwekona kuyawuphola lutsandvo kulabanyenti.

¹³ Kodvwa lowo loyawubambelela kuze kube ngusekupheleni, uyawusindziswa.

¹⁴ LeliVangeli ngembuso liyawushunyayelwa emhlabeni wonkhe, kuze kube bufakazi etiveni tonkhe, bese-ke kuyefika kuphela.”

Sinengisoncitsakalo

¹⁵ “Ngako-ke nanibona sinengisoncitsakalo sime endzaweni lengcwele, njengobe asho umphrofethi Danyela,” (lofundzako akacaphele inchazelo yaloku),

¹⁶ “labo labaseJudiya ababalekele etintsabeni.

¹⁷ Umuntfu losetikwendlu angabe asehla kuyawutsatsa lutfo lolusendlini yakhe,

¹⁸ nalowo losensimini angabuyeli endlini kuyawutsatsa kwekwembatsa.

¹⁹ Kepha maye kulabayawube batetfwele nakulabayawube bamunyisa ngaleto tikhatsi!

²⁰ Thandazelani kutsi kubaleka kwenu kungabi kusebusika nome ngeliSabatha!

²¹ Ngobe lapho kuyawuba khona kuhlupheka lokukhulu lokungazange sekube khona kusukela seloku kwasekelwa umhlaba, kuze kube ngulamuhla, futsi akuseyiwuba khona.

²² Kube lawo malanga akafinyetwanga bekuyakubate longasindziswa; kepha ngenca yalabakhetsiwe lawo malanga ayawufinyetwa.

²³ “Nome umuntfu asatsi kini: ‘Bukani, nangu Khristu,’ nome: ‘Nanguya lapho akhona,’ ningamkholwa!

²⁴ Ngobe kuyawuvela bokhristumbumbulu, nebaphrofethi bemanga, bente tibonakaliso letinkhulu netimangaliso, kuze kudukiswe nalabakhetsiwe nakunekwenteka.

²⁵ Bukani-ke, senginitjele ngaphambili kungakenteki.

²⁶ “Ngako-ke nabatsi: ‘Bukani usehlane,’ ningayi khona; nome batsi: ‘Bukani usendlini,’ ningakholwa!

²⁷ Ngobe iNdvodzana yeMuntfu iyawufika njengembane umanyata esibhakabhakeni kusukela emphumalanga kuye enshonalanga.

²⁸ “Nome ngukuphi lapho kunesidvumbu khona emangce abutsana khona.”

Kufika kweNdvodzana yeMuntfu

²⁹ “Kepha masinyane nje emvakwaleto tinhlupheko, “ ‘lilanga liyawufiphala, nenyanga iyawubate kukhanya, netinkhanyeti tidzilike esibhakabhakeni, nemandla emkhatsi ayawunyakatiswa.’

³⁰ “Lapho-ke kuyawubonakala sibonakaliso seNdvodzana yeMuntfu esibhakabhakeni; tonkhe tive temhlaba tiyawukhala natibona iNdvodzana yeMuntfu ita ngemafu elizulu, ngemandla, nangenkhatimulo lenkhulu.

³¹ Iyawutfumela tingilosi tayo ngekukhala lokukhulu kwelicilongo, tibutse bonkhe labakhetsiwe bayo emagumbini omane emhlaba, kusukela emkhawulweni lomunye welizulu kuze kube kulomunye.”

Sifundvo ngesihlahla semkhiwa

³² “Ase nifundze sifundvo ngesihlahla semkhiwa. Ngesikhatsi emagala aso advumba, nemacembe ahluma, niyaye nati kutsi lihlobo selidvutane.

³³ Kanjalo-ke nani, nanibona konkhe loku kwenteka, nibokwati kutsi sekusedvute ngasemnyango.

³⁴ Ngicinisile, ngitsi kini: Lesitukulwane ngeke sendlule kungakenteki konkhe loku.

³⁵ Lizulu nemhlaba kuyakwendlula, kodvwa emavi ami wona angeke endlule.”

Kute lowati lilanga nesikhatsi sekubuya kweNkhosi

³⁶ “Noko kute lowatiko kutsi lelo langa nemzuzu kuyawufika nini, ngisho netingilosi ezulwini neNdvodzana ayati, lowatiko nguBabe kuphela.

³⁷ Njengasemalangeni aNowa kuyawuba njalo nekufika kweNdvodzana yeMuntfu.

³⁸ Njengemalanga labengembili kwazamcolo, bantfu babedla banatsa, labadvuna nalabasikati batsatsana, kwaze kwaba lilanga langena ngalo Nowa emkhunjini;

³⁹ abazange bati, kwaze kwefika zamcolo wabacedza, kuyawuba njalo nekufika kweNdvodzana yeMuntfu.

⁴⁰ Ngaleso sikhatsi emadvodza lamabili ayawube asebenta ensimini; lenye iyawutsatfwa, lenye isale.

⁴¹ Bafati lababili bayawube basila; lomunye uyawutsatfwa, lomunye asale.

⁴² Ngako-ke caphelani, ngobe anilati lilanga iNkhosi yenu leyawubuya ngalo.

⁴³ Nibokwati kutsi kube umniyo wendlu abesati sikhatsi sekufika kwelisela, abengeke alale, entele kuvimbela lelisela lingayigcekezi lendlu yakhe.

⁴⁴ “Ngako-ke nani hlalani nilindzele, ngobe iNdvodzana yeMuntfu iyawufika ngesikhatsi leningakasibheki.”

Sisebenti lesetsembekile nome lesingaketsembeki

⁴⁵ “Pho, ngubani losisebenti lesetsembekile nalesihlakaniphile, inkhosi yaso lesimise etikwebendlu yayo, kutsi sibanike kudla ngesikhatsi lesifanele?

⁴⁶ Sibusisiwe leso sisebenti lesiyawukhandvwa yinkhosi yaso senta njalo.

⁴⁷ Ngicinisile, ngitsi kini: Iyawusimisa ngetulu kwako konkhe lenako lenkhosi.

⁴⁸ Kodvwa nangabe leso sisebenti lesibi sicabanga enhlitiyweni yaso sitsi: ‘Inkhosi yami isalibele,’

⁴⁹ bese sicala kushaya letisebenti letikanye naso, sidle sinatse naletinye tidzakwa,

⁵⁰ inkhosi yaleso sisebenti iyawufika ngalelo langa, leso sisebenti singakayibheki, nangesikhatsi lesingasati.

⁵¹ Iyawusijezisa kakhulu kanye nebatentisi. Lapho kuyawuba khona kukhala nekugedletelisa ematinyo.”