Matewu 22 - Siswati 1996 Bible

Umfanekiso ngelidzili lemshado

¹ Jesu waphindze futsi wakhuluma kubo ngemifanekiso watsi:

² “Umbuso welizulu ungafaniswa nenkhosi leyalungisela indvodzana yayo lidzili lemshado.

³ Yatfumela tisebenti tayo kutsi tiyewubita lababemenyiwe kuta emshadweni, kodvwa abavumanga kuta.

⁴ Yaphindze yatfumela letinye tisebenti yatsi: ‘Tjelani labo labamenyiwe kutsi lidzili lami selilungile, tinkhabi tami netinkhomo tami letikhuluphalisiwe setihlatjiwe, konkhe sekulungile; wotani edzilini!’

⁵ Kodvwa letimenywa atinakanga, tesuka tahamba: Lesinye satiyela ensimini, lesinye satiyela ebhizinisini yaso.

⁶ Letinye timenywa tabamba letisebenti, tatiphatsa dlephu, tatishaya, tatibulala.

⁷ Inkhosi yatfukutsela kakhulu, yaze yakhipha imphi yemasotja leyafike yabulala bonkhe labo babulali, yashisa nelidolobha labo.

⁸ Ngako yatsi etisebentini tayo: ‘Lidzili selilungile, kodvwa labo labebamenyiwe abakalifaneli.

⁹ Ngako-ke hambani niye etinhlanganweni tetindlela nemigwaco; nimeme bonkhe lenibabonako kutsi bete edzilini.’

¹⁰ Ngako-ke tisebenti taphuma, taya etindleleni, tabutsa bonkhe letatihlangana nabo, lababi nalabahle ngalokufananako; indlu yemshado yagcwala letimenywa.

¹¹ “Inkhosi yatsi iyangena itewubona timenywa, yabona kukhona lomunye labengakayembatsi ingubo yemshado,

¹² yatsi kuye: ‘Mnganami, ungene njani lapha ungenayo ingubo yemshado?’ Kepha yena wathula.

¹³ Inkhosi yatjela tisebenti tayo yatsi: ‘Mbopheni tandla netinyawo, nimlahle ngephandle ebumnyameni. Lapho kuyawuba khona kukhala nekugedletelisa ematinyo.’

¹⁴ “Ngobe banyenti labamenyiwe, kodvwa bambalwa labakhetsiwe.”

Umbuzo ngekukhipha umtselo

¹⁵ Besuka lapho baFarisi bayakwakha licebo lekumgiba ngemibuzo.

¹⁶ Base batfumela kuye labanye bafundzi babo kanye nemalunga ephathi yemaHerodi. Befike batsi: “Mfundzisi, siyati kutsi wena uneliciniso, ufundzisa indlela yaNkulunkulu ngeliciniso, awunaki muntfu, ngobe awubuki buso bemuntfu.

¹⁷ Sitjele-ke kutsi wena utsini. Kuvunyelwe yini kutsela kuKhesari nome cha?”

¹⁸ Kepha Jesu abati bubi babo watsi: “Batentisi, ningilingelani?

¹⁹ Ngikhombiseni imali lenitsela ngayo!” Base bamkhombisa denariyo.

²⁰ Wase uyababuta utsi: “Lomfanekiso nalelibito kwabani?”

²¹ Bamphendvula batsi: “KwaKhesari.” Ngako watsi kubo: “Yebo-ke, nikani Khesari lokukwaKhesari; ninike Nkulunkulu lokukwaNkulunkulu!”

²² Batsi sebakuvile loko, bamangala kakhulu, bamshiya bahamba.

Umbuzo ngekuvuka kulabafile

²³ Ngalo lelo langa kwefika kuye baSadusi labatsi kute kuvuka kulabafile,

²⁴ batsi: “Mfundzisi, Mosi watsi: ‘Nakufa indvodza ingenabantfwana, umnakabo uyamngena lomfelokati wakhe, kuze atalele umufi bantfwana.’

²⁵ Manje le ngakitsi kwakunetelamani letatisikhombisa. Lona lomdzala watsatsa umfati, kodvwa wafa ate bantfwana, ngako umnakabo wamngena lomfati.

²⁶ Kwenteka kona loko nakuwesibili nakuwesitsatfu, kwaze kwefika kuwesikhombisa.

²⁷ Ekugcineni nalomfati wafa.

²⁸ Pho, nasekuvukwa ekufeni, lomfati uyawuba wabani kulaba labasikhombisa, ngobe bonkhe abengumfati wabo?”

²⁹ Jesu watsi kubo: “Maye! Nedukile, ngobe aniyati imiBhalo kanye nemandla aNkulunkulu!

³⁰ Ngobe ekuvukeni kulabafile abateki, abatekwa, banjengetingilosi tasezulwini.

³¹ Kepha macondzana nekuvuswa kwalabafile: Anifundzanga yini lokwakhulunywa nguNkulunkulu kini nakatsi:

³² ‘Mine nginguNkulunkulu wa-Abrahama, naNkulunkulu wa-Isaka, naNkulunkulu waJakobe’? Akasiye Nkulunkulu walabafile, kodvwa walabaphilako.”

³³ Natikuva loko ticumbi tebantfu, tamangala ngalokufundzisa kwakhe.

Umyalo lomkhulu

³⁴ Batsi nasebevile baFarisi kutsi Jesu ubathulisile baSadusi, base babutsana ndzawonye.

³⁵ Lomunye wabo labesati semtsetfo wamlinga ngekumbuta, watsi:

³⁶ “Mfundzisi, ngumuphi umyalo lomkhulu emtsetfweni seyiyonkhe?”

³⁷ Jesu watsi kuye: “ ‘Uboyitsandza iNkhosi, Nkulunkulu wakho, ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.’

³⁸ Ngulowo-ke umyalo lomkhulu newekucala.

³⁹ Wesibili ufanana nawo utsi: ‘Ubotsandza makhelwane wakho, njengobe utitsandza wena.’

⁴⁰ Kuleyo miyalo yomibili kubambelele wonkhe umtsetfo kanye nemfundziso yebaphrofethi.”

Umbuzo ngaKhristu

⁴¹ Kwatsi basebutsene ndzawonye baFarisi, Jesu wababuta,

⁴² watsi: “Nitsini ngaKhristu? Nitsi uyiNdvodzana yabani?” Bamphendvula batsi: “YaDavide.”

⁴³ Jesu watsi kubo: “Pho, Davide wambita njani akuMoya ngekutsi: ‘YiNkhosi,’

⁴⁴ nakatsi: “ ‘INkhosi yatsi eNkhosini yami: “Hlala lapha ngesekudla sami, ngize ngibeke titsa takho ngaphansi kwetinyawo takho” ’?

⁴⁵ “Ngako-ke nangabe Davide wambita ngekutsi: ‘YiNkhosi,’ uyiNdvodzana yakhe njani?”

⁴⁶ Kwabate ngisho namunye lowaba nelivi labengamphendvula ngalo; kusukela ngalelo langa kute lowaphindze waba nesibindzi sekumbuta.