Matewu 13 - Siswati 1996 Bible

Umfanekiso ngemhlanyeli

¹ Ngalo lelo langa Jesu waphuma endlini wayawuhlala ngaselwandle.

² Sicumbi sebantfu sasondzela kuye samtungeleta, bantfu baba banyenti kangangekutsi wangena esikebheni wahlala ekhatsi, bantfu bema elusentseni.

³ Wabatjela tintfo letinyenti ngemifanekiso, watsi: “Bekukhona umuntfu lowahamba wayawuhlanyela.

⁴ Ekuhlanyeleni kwakhe lenye inhlanyelo yawela endleleni, kwefika tinyoni tayidla tayicedza.

⁵ Kepha lenye yawela emhlabatsini losemadvwaleni, yasheshe yamila, ngobe yayite umhlabatsi lowenele.

⁶ Latsi ngekuphuma lilanga lahashula titfombo tabuna, ngenca yekutsi tatite timphandze letijulile.

⁷ Lenye inhlanyelo yawela emanyeveni, yamila; emanyeva akhula aminyetela titfombo.

⁸ Kodvwa lenye yawela emhlabatsini lovundzile, yatsela titselo: lenye ngelikhulu, lenye ngema-60, lenye ngema-30.

⁹ “Lonendlebe yekuva akeve!”

Inhloso yekusebentisa imifanekiso

¹⁰ Kwase kufika bafundzi bakhe kuye batsi: “Ukhulumelani kubo ngemifanekiso?”

¹¹ Wabaphendvula watsi: “Nine ninikiwe lwati lwetimfihlakalo tembuso welizulu, kodvwa bona abakanikwa.

¹² Ngobe lowo lonako uyawunikwa kube kunyenti, kodvwa lowo lote uyakwemukwa naloko lokuncane lanako.

¹³ Kungako nje ngikhuluma kubo ngemifanekiso, ngobe nome babuka ababoni, nome beva abevisisi, abacondzi.

¹⁴ Kugcwaliseka kubo siprofetho sa-Isaya lesitsi: “ ‘Ngekuva niyakuva, ningete nacondza; ngekubuka niyawubuka, ningete nabona.

¹⁵ Ngobe inhlitiyo yalesive seyaba lukhuni, netindlebe tabo tiva kamatima, emehlo abo bawavalile; funa mhlawumbe ngemehlo abo babone, nangetindlebe tabo beve, nangetinhlitiyo tabo bacondze baphendvuke, bese ngiyabaphilisa.’

¹⁶ “Kodvwa-ke nine nibusisiwe, ngobe emehlo enu ayabona, netindlebe tenu tiyeva.

¹⁷ Ngobe ngicinisile, ngitsi kini: Banyenti baprofethi nebantfu labalungile lababefisa kubona loku lenikubonako, kodvwa abazange bakubone; futsi babefisa kuva loku lenikuvako, kodvwa abazange bakuve.”

Jesu uchaza umfanekiso ngemhlanyeli

¹⁸ “Lalelani-ke kutsi umfanekiso ngemhlanyeli usho kutsini.

¹⁹ Bantfu labatsi nabeva livi lembuso kepha bangete balicondza, bayaye befikelwe nguLomubi, abemuke loko bekuhlanyelwe etinhlitiyweni tabo: loko-ke kusho inhlanyelo leyayihlanyelwe endleleni.

²⁰ Kuhlanyelwa kwenhlanyelo emhlabatsini losemadvwaleni kusho labo labalivako livi lembuso balemukele masinyane ngekujabula.

²¹ Kepha ngekubate timphandze letijulile etinhlitiyweni tabo, bahlala sikhashana nje. Kutsi kungavela tinhlupheko nome kutingelwa ngenca yelivi, bese bahlubuka masinyane.

²² Kuhlanyelwa kwenhlanyelo emanyeveni kusho labalivako livi lembuso, kodvwa tinhlupheko macondzana nalemphilo nelutsandvo lwebunjinga kuyaye kuliminyetele livi bangabe basatsela titselo.

²³ Lena leyayihlanyelwe emhlabatsini lovundzile ifanekisa lowo lolivako livi, alicondze, bese utsela titselo: lomunye ngelikhulu, lomunye ngema-60, nalomunye ngema-30.”

Umfanekiso ngelukhula

²⁴ Lomunye umfanekiso lawubeka utsi: “Umbuso welizulu ufanana nendvodza leyahamba yayawuhlanyela inhlanyelo lenhle ensimini yayo.

²⁵ Kepha ebusuku, bantfu sebalele bonkhe, kwefika sitsa sayo sahlanyela lukhula emkhatsini walamabele, sesuka sahamba.

²⁶ Latsi kube likhule likhaba litsele titselo, kwase kubonakala lukhula.

²⁷ Tisebenti talendvodza teta kuyo tatsi: ‘Mnumzane, njengobe wawuhlanyele inhlanyelo lenhle ensimini yakho, pho, lolukhula luphumaphi?’

²⁸ Lendvodza yaphendvula yatsi: ‘Loko kwentiwa sitsa.’ Tase tiyabuta titsi: ‘Uyafuna yini siyeluzuphuna lolukhula?’

²⁹ Kodvwa yena watsi: ‘Cha, ngobe nitawutsi nizuphuna lukhula, kantsi senizuphuna nalamabele.

³⁰ Yekelani nje kukhule kokubili ndzawonye, kuze kube sikhatsi sekuvuna, kuvunwe; nasekuvunwa ngitawutjela labavunako kutsi babutse lukhula kucala, balubophe tincumbi, kuze lutewushiswa; bese-ke nibutsela emabele ndzawonye esiteni sami.’ ”

Umfanekiso ngenhlanyelo yendlulamitsi

³¹ Lomunye umfanekiso labatjela wona wawutsi: “Umbuso welizulu ufanana nenhlavu yendlulamitsi, layitsatsa lomunye umuntfu wayihlanyela ensimini yakhe.

³² Yona yincane kakhulu, kepha naseyikhulile iba yinkhulu kunato tonkhe tihlahla, kudzimate kufike netinyoni temoya, takhele tidleke tato emagaleni aso.”

Umfanekiso ngembiliso

³³ Waphindze wabatjela lomunye umfanekiso watsi: “Umbuso welizulu ufanana nembiliso leyatsatfwa ngumfati wayibhica nemabinta lamatsatfu emphuphu, kwabila konkhe.”

Kusebentisa imifanekiso kwaJesu

³⁴ Konkhe loku Jesu wakukhuluma esicukwini ngemifanekiso. Ngaphandle kwemifanekiso kute lakukhuluma kuso,

³⁵ kuze kugcwaliseke loko lokwakhulunywa ngemprofethi kutsi: “Ngiyawukhuluma ngemifanekiso, ngiphumisele lokufihlakele seloku kwasekelwa umhlaba.”

Jesu uchaza umfanekiso ngelukhula

³⁶ Jesu wesuka lapho watishiya ticumbi, wangena endlini. Bafundzi bakhe beta kuye, befika batsi: “Ase usichasisele lomfanekiso ngelukhula ensimini kutsi usho kutsini.”

³⁷ Yena wabaphendvula watsi: “Lona lowahlanyela inhlanyelo lenhle yiNdvodzana yeMuntfu.

³⁸ Insimi ngulomhlaba, inhlanyelo lenhle bantfwana bembuso, kepha lukhula bantfwana baLomubi.

³⁹ Sitsa lesahlanyela lukhula nguSathane. Kuvuna kusho siphetfo saletikhatsi, bavuni-ke tingilosi.

⁴⁰ “Ngako-ke njengobe lukhula lwabutfwa lwashiswa, kuyawuba njalo nasekupheleni kwelive.

⁴¹ INdvodzana yeMuntfu iyawutfumela tingilosi tayo tiyewubutsa tikhiphe konkhe lokubanga kona nabo bonkhe benti balokubi embusweni wayo,

⁴² tibalahle emlilweni lowesabekako, lapho bayawukhala kudzimate kugedletele ematinyo.

⁴³ Lapho bantfu baNkulunkulu bayawukhanya njengelilanga embusweni weYise. “Lalelani-ke, naninendlebe yekuva.”

Umfanekiso ngemcebo lofihliwe

⁴⁴ “Umbuso welizulu ufanana nemcebo lofihlwe ensimini. Kwenteka indvodza yawutfola, yabuye yawugcibedzela. Yajabula kangangekuba yahamba yayawutsengisa ngako konkhe leyayinako yancandzeka, yayawutsenga leyo nsimi.”

Umfanekiso ngelitje leliligugu

⁴⁵ “Futsi umbuso welizulu ufanana nemtsengi labefuna ematje laligugu lelikhulu.

⁴⁶ Watsi kube alitfole lelinye lawo lelalidule kakhulu, wase uyahamba wayawutsengisa ngako konkhe lanako, wabuyela wayawulitsenga.”

Umfanekiso ngelinetha

⁴⁷ “Futsi umbuso welizulu ufanana nelinetha lelafakwa elwandle, labutsa tonkhe tinhlobo tetinhlanti.

⁴⁸ Latsi nase ligcwele, badwebi balidvonsela elusentseni lwelwandle bahlala phansi, behlukanisa letinhlanti. Letinhle batifaka etitjeni, kwatsi letimbi batilahla.

⁴⁹ Kuyawuba njalo ekupheleni kwelive, kuyawuphuma tingilosi tikhiphe lababi emkhatsini walabalungile,

⁵⁰ tibajike emlilweni lowesabekako, lapho bantfu bayawukhala kakhulu bagedletelise nematinyo.”

Emaciniso lamasha nalamadzala

⁵¹ Jesu wababuta watsi: “Nikuve kahle yini konkhe loku?” Baphendvula batsi: “Yebo, sikuvile.”

⁵² Wase utsi kubo: “Ngako-ke wonkhe umfundzisi wemtsetfo loba ngumfundzi embusweni welizulu, unjengemnikati wemuti lokhipha engcebeni yakhe lokusha nalokudzala.”

Jesu akemukeleki eNazaretha

⁵³ Watsi Jesu nasacedzile ngalemifanekiso, wase uyesuka kuleyo ndzawo.

⁵⁴ Wabuyela edolobheni lakubo. Wabafundzisa esinagogeni labo, bamangala badzimate batsi: “Lomuntfu wakutfolaphi lokuhlakanipha lokungaka, nalemisebenti yemandla?

⁵⁵ Akusiyo yini indvodzana yembati le? Unina akusiye yini lona lekutsiwa nguMariya, bomnakabo akusibo yini boJakobe, naJosefa, naSimoni, naJudasi?

⁵⁶ Bodzadzewabo bona akusibo yini laba labahlala natsi? “Kepha lona ukutsatsaphi konkhe loku?”

⁵⁷ Bakhubeka ngaye. Kepha Jesu watsi: “Umprofethi uhlonishwa nome kukuphi, ngaphandle kwasendzaweni yakubo, nakubantfu bakubo.”

⁵⁸ Akazange ayente imisebenti yemandla leminyenti lapho ngenca yekungakholwa kwabo.