Matewu 11 - Siswati 1996 Bible

Titfunywa letiphuma kuJohane uMbhabhatisi

¹ Kwatsi kube Jesu acedze kuyala bafundzi bakhe labebali-12, wesuka lapho wayawufundzisa ashumayela emadolobheni akuleyo ndzawo.

² Kwatsi-ke Johane uMbhabhatisi asesejele weva ngemisebenti yaKhristu, wase utfumela labanye bafundzi bakhe kuye.

³ Befike batsi kuye: “Wena unguye yini lona lotako, nome kusafanele silindzele lomunye?”

⁴ Jesu waphendvula watsi kubo: “Ncandzekani niyemtjela Johane ngako konkhe lenikuvako nalenikubonako:

⁵ Timphumphutse setiyabona, tinchute netishosha setiyahamba, emalephelo ayahlanteka, tihhulu setiyeva, labafile bayavuswa, neliVangeli seliyashunyayelwa kulabamphofu.

⁶ Ubusisiwe longakhubeki ngami.”

⁷ Kwatsi nasebancandzeka, Jesu wacala wakhuluma eticunjini ngaJohane watsi: “Nanisuka niya ehlane naniyewubonani kani? Naniyewubona umhlanga uveveteliswa ngumoya yini?

⁸ Kantsi nanisukele kuyawubonani, vele? Naniyewubona umuntfu lowembetse tingubo letinhle yini? Anati yini kutsi labanjalo basetindlini temakhosi?

⁹ Kodvwa vele nje, nanisukele kuyawubonani, umphrofethi? Yebo, empeleni nabona lomkhulu kakhulu kunemphrofethi.

¹⁰ Nguye lona lekubhalwe ngaye kutsi: “ ‘Bheka, ngitfumela sitfunywa sami embikwakho, lesiyawulungisa indlela yakho embikwakho.’

¹¹ “Ngicinisile, ngitsi kini: Kubo bonkhe labake baba khona emhlabeni kute lowake waba mkhulu kunaJohane uMbhabhatisi; kepha lomncane embusweni welizulu mkhulu kunaye.

¹² Kusukela etikhatsini taJohane uMbhabhatisi kuze kube ngulamuhla umbuso welizulu uyaphangwa, nalabo labawuphangako bayawuhlwitsa.

¹³ Ngobe bonkhe baphrofethi nemtsetfo kwaphrofetha, kwaze kwefika Johane.

¹⁴ Nanivuma kukwemukela loko, ngu-Elija lona labetawufika.

¹⁵ Lowo lonendlebe yekuva akeve.

¹⁶ “Konje ngingasifanisa nani nje lesitukulwane salamuhla? Sinjengebantfwana labasemakethe nabamemetana

¹⁷ batsi: ‘Sanishayela tigubhu, anigidzanga; sahlabela tingoma tesililo, kodvwa anikhalanga.’

¹⁸ Ngobe Johane wefika angadli, anganatsi, base batsi: ‘Unelidimoni.’

¹⁹ INdvodzana yeMuntfu yona yefika, yadla yanatsa, base batsi: ‘Ase nibheke, nansi indvodza! Simiti nemnatsi weliwayini, kantsi futsi ungumngani webatselisi netoni!’ Noko, kuhlakanipha kwaNkulunkulu kubonakala kuliciniso ngemiphumela yako.”

Imiti lebeyingakholwa

²⁰ Jesu wase ucala kusola emadolobha, lekwakwenteke kuwo imisebenti yakhe yemandla leminyenti, ngobe abengaphendvuki.

²¹ Watsi: “Maye kuwe, Khorazini! Maye nakuwe, Bhethsayida! Ngobe kube lemisebenti yemandla lebeyenteke kini beyenteke eThire naseSidoni, ngabe kadze batitsela ngemlotsa bembatsa emasaka bakhombisa kuphendvuka.

²² Kepha ngitsi kini: Kuyawuba ncono kuyo iThire neSidoni kunakini ngelilanga lekwehlulela.

²³ “Nawe-ke Khaphanawume, ucabanga kutsi uyawuphakanyiselwa ezulwini yini? Uyakwehliselwa endzaweni yalabafile, ngobe kube yayentiwe eSodoma imisebenti yemandla leyayentiwe kuwe, ngabe ikhona nalamuhla.

²⁴ Kepha ngitsi kini: Kuyawuba ncono kulo live laseSodoma kunakuwe ngelilanga lekwehlulela.”

Wotani kimi niphumule

²⁵ Ngaleso sikhatsi Jesu wakhuluma watsi: “Ngiyabonga, Babe, Nkhosi yelizulu nemhlaba, ngobe ukufihlile loku kulabahlakaniphile nalabanekucondza, wakwembula kulabo lababantfwana.

²⁶ Yebo, Babe, ngobe kwaba kuhle ebusweni bakho kutsi kube njalo.

²⁷ “Konkhe ngikuphiwa nguBabe, kute loyatiko iNdvodzana ngaphandle kweYise, kantsi futsi kute lomatiko uYise ngaphandle kweNdvodzana nalowo iNdvodzana letsandza kumembulela yena.

²⁸ “Wotani kimi, nine nonkhe lenikhatsele nalenisindvwa yimitfwalo, ngitaniphumuta.

²⁹ Bekani lijoko lami etikwenu, nifundze kimi, ngobe mine ngimnene, ngitfobekile ngenhlitiyo, khona niyawutfola kuphumula kwemiphefumulo yenu;

³⁰ ngobe lijoko lami lilula, nemtfwalo wami awusindzi.”