Matewu 10 - Siswati 1996 Bible

Baphostoli labali-12

¹ Jesu wase ubitela ndzawonye bafundzi bakhe labali-12, wabanika emandla etikwemimoya lemibi, ekutsi bayikhiphe, newekuphilisa tifo tonkhe nekugula konkhe.

² Nankha emabito ebaphostoli lababeli-12: Wekucala nguSimoni, lotsiwa nguPhetro, nemnakabo Andreya; Jakobe nemnakabo longuJohane, emadvodzana aZebedi;

³ Filiphu naBhatalomewu; Tomase naMatewu, umtselisi; Jakobe, umsa wa-Alfiyose, naThadiyosi;

⁴ Simoni, wephathi yemaKhenani, naJudasi Skariyothi lowatsengisa Jesu.

Kutfunywa kwalabali-12

⁵ Jesu wawatfuma lamadvodza labeli-12 wawayala watsi: “Ningangeni eveni lebetive nasemitini yemaSamariya.

⁶ Esikhundleni saloko hambani niyewufuna timvu letilahlekile letisive sema-Israyeli.

⁷ Hambani nishumayele nitsi: ‘Umbuso welizulu sewusondzele.’

⁸ Philisani labagulako, nivuse labafile, niphilise emalephelo, nikhiphe emadimoni. Nemukeliswe ngesihle, ngako-ke nani phanini ngesihle.

⁹ Ningayiphatsi imali, negolide, nesiliva, nemasenti emakhikhini enu.

¹⁰ Ningaphatsi ngisho nemgodla wendlela wekucela, nemabhantji lamabili, neticatfulo, nentfonga, ngobe sisebenti sifanelwe kudla kwaso.

¹¹ “Naningena edolobheni nome emtini, nibofuna umuntfu lotimisele kunemukela, bese nihlala naye, nize nihambe kuleyo ndzawo.

¹² Naningena kulowo muti, nibobabingelela.

¹³ Nangabe bantfu balowo muti banemukela, shiyani sibusiso senu sekuthula sihlale khona; kodvwa nangabe abanemukeli, sitsatseni lesibusiso senu sibuyele kini.

¹⁴ Kantsi futsi nangabe anemukelwa, nelivi lenu lingalalelwa, nibotsi naniphuma kulelo dolobha nome umuti, nitsintsitse lutfuli lwetinyawo tenu.

¹⁵ Ngicinisile, ngitsi kini: Kuyawuba ncono eveni laseSodoma nelaseGomora ngelilanga lekwehlulela kunakulowo muti.”

Kuhlushwa lokutako

¹⁶ “Lalelani! Nginitfuma njengetimvu emkhatsini wetimphisi. Ngako-ke hlakaniphani njengetinyoka, nibete bucili njengematuba.

¹⁷ Kepha nicaphele bantfu, ngobe bayawunibopha banifake etinkantolo, banibhambabule emasinagogeni abo.

¹⁸ Niyawumiswa embikwebabusi nemakhosi ngelibito lami, kuze kube bufakazi kubo nakubetive.

¹⁹ Kepha-ke nabanimangalele, ningahlupheki ngekutsi niyawutsini nekutsi nikusho kanjani; ngobe nakufika leso sikhatsi, niyawunikwa lenifanele nikusho.

²⁰ Ngobe akusini leniyakukhuluma, kepha nguMoya weYihlo wasezulwini loyawukhuluma ngani.

²¹ “Kepha umuntfu uyawunikela umnakabo ekufeni, neyise umntfwanakhe; bantfwana bayawuvukela batali babo babanikele ekufeni.

²² Niyawutondvwa bantfu bonkhe ngenca yelibito lami; kodvwa lokhutsatelako kuze kubesekupheleni, uyawusindziswa.

²³ Nabanitingela kulelinye lidolobha, nibobalekela kulelinye; ngobe ngicinisile, ngitsi kini: Ningeke niwacedze onkhe emadolobha aka-Israyeli, iNdvodzana yemuntfu ingakabuyi.

²⁴ “Kute umfundzi lomkhulu kunemfundzisi wakhe, futsi kute nenceku lengetulu kwenkhosi yayo.

²⁵ Ngako-ke umfundzi kufanele eneliswe kutsi ufanana nemfundzisi wakhe, nenceku kufanele yeneliswe kutsi ifanana nenkhosi yayo. Nangabe inhloko yemuti kwatsiwa nguBhelzebule, emalunga alowo muti ayawubitwa ngemagama lamabi kakhulu!”

Lofanele kwesatjwa

²⁶ “Ningabesabi-ke bantfu, ngobe kute lokumbonyiwe lokungayikwembulwa, nalokufihlakele lokungayikwatiwa.

²⁷ Loku lenginitjela kona lapha ekusitsekeni kukhulumeni ebaleni, naloku lenikuva etindlebeni kumemeteleni yonkhe indzawo.

²⁸ Ningabesabi lababulala umtimba kodvwa babe bangeke bawubulale umphefumulo; lokungenani, mesabeni Yena, lokwati kubulala umtimba nemphefumulo kokubili esihogweni.

²⁹ Abatsengwa yini boncedze lababili ngesenti? Noko kute nome munye longawa phansi afe ngaphandle kwemvume yeYihlo.

³⁰ Kodvwa kini kubalwe ngisho netinwele tonkhe tenhloko yenu.

³¹ Ngako-ke ningesabi; ngobe nine nibaluleke kakhulu kunaboncedze labanyenti.”

Kuvuma nekuphika Khristu

³² “Ngako-ke wonkhe loyawungivuma embikwebantfu, nami ngiyawumvuma embikwaBabe losezulwini.

³³ Kodvwa lowo longiphika embikwebantfu, nami ngiyawumphika embikwaBabe losezulwini.”

Hhayi kuthula, kodvwa inkemba

³⁴ “Ningacabangi kutsi ngitele kuletsa kuthula emhlabeni; cha, angiketeli kuletsa kuthula kepha inkemba.

³⁵ Ngitele kuphambanisa indvodzana neyise, indvodzakati nenina, malukatane neninatala.

³⁶ Titsa letinkhulu temuntfu kuyawuba bakabo.

³⁷ “Lotsandza uyise nome unina kwengca mine, akangifaneli; nalotsandza indvodzana yakhe nome indvodzakati yakhe kwengca mine, akangifaneli.

³⁸ Longetjatsi siphambano sakhe angilandzele, akangifaneli.

³⁹ Lofuna kutfola imphilo yakhe, uyawulahlekelwa ngiyo; nalolahlekelwa yimphilo yakhe ngenca yami, uyakuyitfola.”

Imivuzo

⁴⁰ “Lonemukelako nine, wemukela mine; nalowemukela mine, wemukela longitfumile.

⁴¹ Lowemukela umphrofethi ngobe angumphrofethi, uyakutfola umvuzo wemphrofethi; nalowemukela lolungile ngobe angulolungile, uyakwemukela umvuzo walolungile.

⁴² Ngulowo nalowo loyawunatsisa abe munye kulaba labancane nome yinye nje inkomishi yemanti, ngobe angumfundzi wami, ngicinisile, ngitsi kini: Ngeke alahlekelwe ngumvuzo wakhe.”