Makho 8 - Siswati 1996 Bible

Jesu wesutsisa bantfu labati-4 000

¹ Kwatsi nje kuwo lawo malanga ticumbi tebantfu tabutsanela kuJesu, tase teswele kudla letatingakudla. Ngako-ke Jesu wabita bafundzi bakhe watsi kubo:

² “Ngiyabadzabukela labantfu, ngobe bebakanye nami lapha kwaze kwaba ngemalanga lamatsatfu. Manje sebate lutfo loludliwako.

³ Futsi nangibahambisa ngendlala kutsi baye emakhaya, batawucaleka ngendlela, ngobe labanye babo besuka khashane kakhulu.”

⁴ Bafundzi bakhe bamphendvula batsi: “Kepha vele, umuntfu angabaphani la ehlane, kute netinkhwa nje?”

⁵ Jesu wababuta watsi: “Ninetinkhwa letingakhi?” Bamphendvula batsi: “Tisikhombisa.”

⁶ Wase utsi kulabantfu abahlale phansi, watsatsa letinkhwa letisikhombisa watsi kube atibusise wase uyatihlephula watinika bafundzi bakhe kuze babele labantfu. Nangempela-ke bababela.

⁷ Babenetinhlantana nje letimbalwa, nato watibusisa, watsi nato atabelwe labantfu.

⁸ Bantfu badla besutsa; babutsa timvutfuluka letatisele, tagcwala emabhasikidi lasikhombisa.

⁹ Bantfu lababelapho babengacishe babe ti-4 000. Jesu-ke wase utsi sale babuyela emakhaya abo.

¹⁰ Waphutfuma yena wangena esikebheni kanye nebafundzi bakhe, balibangisa eDalmanutha.

BaFarisi bafuna Jesu ente sibonakaliso

¹¹ BaFarisi beta kuJesu bacondze kuphikisana naye. Bamlinga batsi akente sibonakaliso sasezulwini.

¹² Jesu wabubula ngalokujulile emoyeni wakhe watsi: “Lesitukulwane sisifunelani sibonakaliso? Ngicinisile, ngitsi kini: Kute nasinye sibonakaliso lesiyawukhonjiswa kulesitukulwane.”

¹³ Wesuka wabashiya, wangena esikebheni walibangisa ngesheya kwelwandle.

Imbiliso yebaFarisi neyaHerodi

¹⁴ Bafundzi baJesu bakhohlwa kutiphatsela tinkhwa; bese basele nesinkhwa sinye kuphela esikebheni.

¹⁵ Jesu wabadvonsa ngendlebe watsi: “Caphelani imbiliso yebaFarisi neyaHerodi.”

¹⁶ Bakhulumisana bodvwana batsi: “Kumbe usho ngobe kute sinkhwa.”

¹⁷ Jesu ababona kutsi batsini, watsi kubo: “Nikhulumelani ngendzaba yekubate kwenu sinkhwa? Nanyalo anikacondzi, futsi anikaboni? Kantsi tinhlitiyo tenu senitente taba lukhuni yini?

¹⁸ Naloku ninemehlo kaniboni? Nangetindlebe kaniva? Anisakhumbuli?

¹⁹ Namzukwana ngihlephula tinkhwa letisihlanu, ngihlephulela ti-5 000, nagcwalisa emabhasikidi lamangaki?” Bamphendvula batsi: “Lali-12.”

²⁰ Jesu wachubeka wababuta watsi: “Naletinkhwa letatisikhombisa lengatihlephulela ti-4 000, nagcwalisa emabhasikidi lamangaki ngetimvutfuluka letatisele?” Batsi kuye: “Lasikhombisa.”

²¹ Watsi kubo: “Solomane nanyalo anikeva?”

Jesu uphilisa imphumphutse eBhethsayida

²² Jesu watsi efika nje eBhethsayida, baletsa kuye imphumphutse, bamcela kutsi ayitsintse ngesandla.

²³ Wayibamba ngesandla lemphumphutse wayikhiphela ngephandle kwemuti. Watsi kube ayikhafulele emehlweni wayibeka tandla wayibuta watsi: “Kukhona yini lokubonako?”

²⁴ Lemphumphutse yaphakamisa inhloko yatsi: “Ngibona bantfu, kodvwa banjengetihlahla letihambako.”

²⁵ Waphindza futsi Jesu wabeka tandla emehlweni ayo. Yabukisisa, yaphiliswa, yabona kahle konkhe.

²⁶ Wase uyayiyala kutsi ayiye ekhaya layo, watsi: “Ungasaphambukeli edolobheni.”

Phetro uyavuma kutsi Jesu nguKhristu

²⁷ Emvakwaloko Jesu wesuka wahamba nebafundzi bakhe baya emadolobhaneni langaseKhesariya Filiphi; basesendleleni wababuta bafundzi bakhe watsi: “Bantfu batsi mine ngingubani?”

²⁸ Bamtjela batsi: “Batsi unguJohane uMbhabhatisi, kantsi labanye batsi ungu-Elija; labanye batsi: ‘Ngulomunye nje webaphrofethi.’ ”

²⁹ Wase ubuta bona utsi: “Nine-ke nitsi ngingubani?” Phetro wamphendvula watsi: “Wena unguKhristu.”

³⁰ Jesu wabayala abafica kutsi bangatjeli muntfu ngaye.

Jesu ukhuluma kwekucala ngekufa kwakhe

³¹ Jesu watjela bafundzi bakhe kutsi iNdvodzana yemuntfu ifanele kuhlushwa ngalokunyenti, ilahlwe natibondza telibandla, nebaphatsi bebaphristi, netati temtsetfo, ibulawe, ivuke emvakwemalanga lamatsatfu.

³² Loko wakusho ngalokucacile. Phetro wamdvonsela eceleni wamekhuta.

³³ Kodvwa Jesu waphendvuka wabuka bafundzi, wakhahla Phetro, watsi: “Suka kimi, Sathane! Awukunakekeli lokukwaNkulunkulu, kodvwa unakekela kwebantfu!”

Kulandzela Jesu

³⁴ Jesu wabita bafundzi bakhe kanye nesicuku watsi kubo: “Umuntfu nakafuna kungilandzela, akatidzele, etjatse siphambano sakhe angilandzele.

³⁵ Ngobe wonkhe lofuna kusindzisa kuphila kwakhe, uyawulahlekelwa nguko, nalowo lolahlekelwa kuphila kwakhe ngenca yami nangenca yeliVangeli, uyawukusindzisa.

³⁶ Ngabe kambe kuyawumsita ngani umuntfu kuzuza live lonkhe, kepha alahlekelwe ngumphefumulo wakhe?

³⁷ Ingabe angakhiphani umuntfu kuhlenga umphefumulo wakhe?

³⁸ Lowo lonemahloni ngami, nangemavi ami, kulesitukulwane lesonakele nalesiphingako, neNdvodzana yeMuntfu iyawuba nemahloni ngaye, nayifika ebukhosini beYise kanye netingilosi letingcwele.”