Makho 3 - Siswati 1996 Bible

Kuphiliswa kwemuntfu lonesandla lesishwaphene

¹ Waphindza Jesu wangena esinagogeni, bekunemuntfu labenesandla lesishwaphene.

² Bekukhona lababefuna kubeka Jesu licala, ngako-ke bamcaphelisisa kutsi utawumphilisa yini lomuntfu, njengobe kwakuliSabatha nje.

³ Jesu watsi kulomuntfu labenesandla lesishwaphene: “Sukuma ute la ngembili.”

⁴ Wabuta kubo watsi: “Kulungile yini kwenta lokuhle ngeliSabatha, nome kwenta lokubi, kusita umuntfu nome kumyekelela aze afe?” Kepha bathula.

⁵ Wabatsi cala cala, acansukile, wadzabuka ngobe tinhlitiyo tabo tatilukhuni, tinenkhani, wase utsi kulomuntfu: “Yelula sandla sakho!” Waselula, saphila.

⁶ Masinyane baFarisi baphuma esinagogeni, bayawuhlanganisa tinhloko nemaHerodi, bakha lisu lekubulala Jesu.

Sicuku sebantfu ngaseLwandle lwaseGalile

⁷ Jesu wahamba nebafundzi bakhe baya ngaseLwandle LwaseGalile. Ticumbi tebantfu letatiphuma eGalile naseJudiya tamlandzela.

⁸ Letinye ticumbi tatiphuma eJerusalema, nase-Idumiya, nangesheya kweJordane, nangasemadolobheni aseThire naseSidoni. Tonkhe leticumbi tatite kuye, ngobe tative ngaloko abekwenta.

⁹ Jesu watjela bafundzi bakhe kutsi bamlungisele sikebhe, hleze sicumbi sebantfu simminyetele.

¹⁰ Loko wakwenta emvakwekuphilisa labanyenti. Bonkhe lababenetifo babephangelana kuye batewumtsintsa.

¹¹ Lababenemadimoni babetsi bangambona, baguce embikwakhe bamemete batsi: “Wena uyiNdvodzana yaNkulunkulu!”

¹² Kepha Jesu wabadvonsa ngendlebe kutsi bangamhlakati ebantfwini.

Jesu ukhetsa baphostoli labali-12

¹³ Jesu wase ukhuphukela entsabeni. Wababita labo labefuna kubatfuma; beta kuye.

¹⁴ Wabamisa baba li-12, lababetawuba naye, [wabetsa watsi baphostoli,] wabatfuma kutsi bayewushumayela,

¹⁵ wabapha nemandla ekukhipha emadimoni.

¹⁶ Naba-ke laba labali-12 labakhetsa: Simoni, lametsa watsi nguPhetro;

¹⁷ boJakobe naJohane, emadvodzana aZebedi, labetsa watsi boBhowanegese, lokusho kutsi “Emadvodzana Ekudvuma Kwelitulu”;

¹⁸ na-Andreya, naFiliphu, naBhatalomewu, naMatewu, naTomasi, naJakobe, umsa wa-Alfiyose, naThadiyosi, naSimoni, wephathi yemaKhenani,

¹⁹ naJudasi Skariyothi labetamtsengisa.

Jesu uchaza ngaBhelzebule

²⁰ Jesu wase uyesuka ubuyela ekhaya. Ticumbi taphindze tabutsana ngalokwengcile, kangangekutsi Jesu kanye nebafundzi bakhe badzimate baswela ngisho sikhatsi sekudla.

²¹ Bakubo batsi kube bakuve loko, baphutfuma bamlandza, ngobe kwase kutsiwa: “Usangene ingcondvo!”

²² Kepha tati temtsetfo letatichamuka eJerusalema tatsi: “UnaBhelzebule,” labanye batsi: “Yinkhosi yemadimoni lena lakhipha ngayo emadimoni.”

²³ Jesu wababita, wakhuluma nabo ngemifanekiso atsi: “Kodvwa Sathane angamcosha njani Sathane?

²⁴ Nangabe umbuso wehlukene ekhatsi, lowo mbuso ngeke ume.

²⁵ Nangabe likhaya lehlukene ekhatsi, alichubi.

²⁶ Nangabe umbuso waSathane wehlukene ekhatsi, sewuvukelana kwawona, ungeke ume, kodvwa uyakuwa uphele.

²⁷ “Kute umuntfu longagcekeza indlu yesichwaga aphange timphahla taso, ngaphandle kwekutsi acale ngekubamba sona asibophe; emvakwaloko-ke angangena aphange timphahla endlini yaso.

²⁸ “Ngiyacinisa ngitsi kini: Tonkhe tono tebantfu tiyawutsetselelwa, nome ngabe sebahlambalate kangakanani;

²⁹ kodvwa umuntfu lohlambalata Moya Longcwele, ngeke atsetselelwe nanini, kepha unelicala laphakadze.”

³⁰ Jesu wakusho loko, ngobe labanye bebatsi unelidimoni.

Tihlobo letingito taJesu

³¹ Kwase kufika unina waJesu nabomnakabo bema ngephandle, base batfumela livi kutsi abambite.

³² Bantfu babegcwele batungelete Jesu bahleti phansi, base bayambikela batsi: “Nangu unyoko la ngephandle nabomnakenu, [nabodzadzewenu] bafuna wena.”

³³ Jesu wabaphendvula watsi: “Ngubani make? Bobani bomnaketfu?”

³⁴ Wacalata ababuka bonkhe labebasedvute naye watsi: “Nangu make nabomnaketfu.

³⁵ Ngobe wonkhe lowenta intsandvo yaNkulunkulu ngumnaketfu, nadzadzewetfu, namake.”