Makho 15 - Siswati 1996 Bible

Jesu embikwaPhilatu

¹ Kwanelela kwasa nje kwabutsana lonkhe Liqoqo, baphristi labakhulu, netibondza, netati, kanye nalamanye emalunga alo, bahlanganisa inkhulumo. Babopha Jesu bamchuba bayawumetfula kuPhilatu.

² Philatu wambuta watsi: “Ungiyo yini inkhosi yemaJuda?” Jesu wamphendvula watsi: “Sewushito wena.”

³ Baphristi labakhulu bambeka emacala lamanyenti.

⁴ Waphindza Philatu wambuta watsi: “Ute yini imphendvulo longayisho? Buka kutsi bakubeka emacala lamanyenti kangakanani!”

⁵ Kodvwa Jesu akabange asamphendvula ngalutfo. Loko kwammangalisa kakhulu Philatu.

Jesu ugwetjwa intsambo

⁶ Kulomkhosi-ke Philatu abevamise njalo nje kubakhululela siboshwa sibe sinye lesicelwe ngulesicuku.

⁷ Ngaleso sikhatsi bekunesiboshwa ejele lesasinguBharaba, sasiboshwe kanye nalabanye lababevukele umbuso: ngekususa tiphitsiphitsi nangekubulala.

⁸ Sicuku sebantfu sasondzela kuPhilatu samncenga kutsi asentele leso sisa njengasemihleni.

⁹ Philatu wase uyababuta utsi: “Niyafuna yini kutsi nginikhululele inkhosi yemaJuda?”

¹⁰ Philatu abesabonile kutsi baphristi labakhulu babephetfwe ngumona nje lokutsi baze baletse Jesu la kuye.

¹¹ Kodvwa baphristi labakhulu basifaka umoya lesicuku kutsi sicele Philatu asikhululele Bharaba, hhayi Jesu.

¹² Philatu waphindza watsi kubo: “Ngitakwentani ngalomuntfu lenitsi yinkhosi yemaJuda?”

¹³ Bamemeta kakhulu futsi batsi: “Mbetsele esiphambanweni!”

¹⁴ Philatu watsi kubo: “Ngani, wenteni lengakalungi?” Kodvwa bamemeta kakhulu kunakucala batsi: “Mbetsele esiphambanweni!”

¹⁵ Ngako-ke Philatu atsandza kujabulisa ticumbi, wabakhululela Bharaba. Jesu asabhanjabuliwe, Philatu wabe sewumnikela esicukwini kutsi siyewumbetsela esiphambanweni.

Emasotja ahlekisa ngaJesu

¹⁶ Emasotja achuba Jesu amngenisa ngekhatsi kwesigodlo saPhilatu, ase abita yonkhe imphi yemasotja.

¹⁷ Amembatsisa umjiva lobovu webukhosi, eluka umchele lonemanyeva, awuhlisibetela enhloko yakhe.

¹⁸ Ase amshayela sihlutfu atsi: “Bayethe! Nkhosi yemaJuda!”

¹⁹ Abehle amshaya enhloko ngendvuku yenhlangamlambo, amkhafulele ngematse, aguce embikwakhe amkhotsamele.

²⁰ Asamphukutile aze enela, ase ayamkhumula lomjiva lobovu webukhosi, amembatsisa tingubo takhe. Amkhiphela ngephandle aya kumbetsela esiphambanweni.

Jesu ubetselwa esiphambanweni

²¹ Emasotja asesendleleni ahlangana nendvodza yaseSirene, libito layo lalinguSimoni. Beyiphuma emaphandleni ite edolobheni. Beyinguyise wabo-Alekzanda naRufusi. Emasotja ayicindzetela kutsi yetfwale siphambano saJesu.

²² Achuba Jesu amyisa endzaweni lekwakutsiwa yiGolkotha, lokusho kutsi: “YiNdzawo yeSikobho”.

²³ Wanikwa liwayini lelalibhicwe nemure, kodvwa wala kulinatsa.

²⁴ Emasotja ambetsela esiphambanweni, abelana ngetingubo takhe, entelana inkatho kuze kubonakale kutsi lilinye belitawutfolani.

²⁵ Bekuli-awa lemfica ekuseni nababetsela Jesu esiphambanweni.

²⁶ Satiso selicala lakhe lesasibhalwe esiphambanweni besitsi: “INKHOSI YEMAJUDA.”

²⁷ Kwabetselwa kanye naye tigelekece letimbili, lesinye ngesekudla, lesinye ngesancele sakhe. [

²⁸ Ngako kwagcwaliseka umBhalo lotsi: “Wabalwa kanye netoni.”]

²⁹ Bantfu labendlulako lapho babemetfuka banikine tinhloko batsi: “Wo! Wena longabhidlita lithempeli ubuye ulakhe ngemalanga lamatsatfu!

³⁰ Tisindzise phela, wehle lapho esiphambanweni!”

³¹ Nebaphristi labakhulu kanye netati temtsetfo bebahlekisa ngaye, batsi: “Wabasindzisa labanye, kodvwa akasakwati kutisindzisa yena.

³² Nango-ke, Khristu, iNkhosi yaka-Israyeli! Sale wehla lapho esiphambanweni, kuze sitewubona sikholwe.” Nalaba lababebetselwe kanye naye nabo babemetfuka.

Kufa kwaJesu

³³ Kwatsi ngeli-awa leli-12 emini kwaba mnyama emhlabeni wonkhe, kwaze kwaba li-awa lesitsatfu.

³⁴ Ngalelo awa Jesu wakhala ngelivi lelikhulu, watsi: “Eloyi! Eloyi! Lama sabakthani?” lokusho kutsi: “Nkulunkulu wami! Nkulunkulu wami! Ungishiyeleni?”

³⁵ Labanye labebeme khona lapho nabamuva batsi: “Ase nimuve, ubita Elija.”

³⁶ Lomunye wagijima watsatsa siponji wasicwilisa ewayinini lelimunyu, wasihloma endvukwini yenhlangamlambo, wamnatsisa, atsi: “Ase nime sesibone kutsi lo-Elija utawuta yini atemsita, ametfule lapha etulu.”

³⁷ Jesu waphindze wamemeta ngelivi lelikhulu, wase uyafa.

³⁸ Indvwangu yesihenco leyayilenga ethempelini yadzabuka ekhatsi kusukela etulu kwaya kuphuma phansi.

³⁹ Kwatsi indvuna yelikhulu lebeyime lapho imbuka nakafa ngalendlela, yavuma yatsi: “Ngempela lomuntfu abengiyo iNdvodzana yaNkulunkulu.”

⁴⁰ Bekukhona nebafati lababebuka beme bucalu, emkhatsini wabo bekukhona Mariya waseMagdala, naSalome, naMariya, unina waboJosese naJakobe labemncane.

⁴¹ Labo-ke ngulababenaye aseseGalile, babemsita, bamkhonta. Bekukhona nalabanye nje-ke bafati labanyenti, lababete kanye naye eJerusalema.

Kungcwatjwa kwaJesu

⁴² Kwase kucalile kuhwalala. Phela kwakulilanga lekwenta emalungiselelo, lokusho kutsi kwakunguLesihlanu, kutakusa kuliSabatha.

⁴³ Josefa wase-Arimathiya, umhlonishwa walelo Liqoqo, labe ngulomunye walababelindzele umbuso waNkulunkulu, wacunga sibindzi waya kuPhilatu ayewucela sidvumbu saJesu.

⁴⁴ Philatu wamangala kwekutsi Jesu sewufile; wabita indvuna yemasotja wabuta kutsi ngabe sesikhatsi lesingakanani Jesu afile.

⁴⁵ Watsi kube atfole imphendvulo endvuneni, wase uyavuma kutsi Josefa asitsatse lesidvumbu.

⁴⁶ Josefa watsenga indvwangu yelineni, wasetfula sidvumbu saJesu, wasigocota ngalendvwangu, wayawusibeka ethuneni lelalimbiwe edvwaleni, wagicitela litje wavala ngalo umnyango walelithuna.

⁴⁷ BoMariya waseMagdala naMariya, unaboJosese, babona lapho angcwatjwa khona Jesu.