Makho 14 - Siswati 1996 Bible

Licebo lekubulala Jesu

¹ Bese kusele emalanga lamabili kube nguMkhosi weliPhasika, kudliwe sinkhwa lesite imbiliso. Baphristi labakhulu netati temtsetfo tatifuna lisu lekubamba Jesu ngebucili, timbulale.

² Kepha babetsi: “Akufuneki simbambe ngesikhatsi semkhosi, ngobe bantfu bangahle besuse siphitsiphitsi.”

Jesu ugcotjiswa emafutsa eBhetani

³ Jesu abeseBhetani, ekhaya kaSimoni lowake waba lilephelo. Watsi Jesu asadla, kwefika umfati aphetse sigujana lesasakhiwe ngelitje lembiza, sigcwele emafutsa langemakha enadi ladule kakhulu. Wasivula lesigujana, watsela lamakha enhloko yaJesu.

⁴ Kodvwa bekukhona labatfukutsela, bakhuluma bodvwana batsi: “Kudlalelwani ngalamafutsa?

⁵ Ngobe ngabe atsengiswe ngabodenariyo labangema-300, kwabelwa labamphofu lemali.” Bamsola kakhulu lomfati.

⁶ Kodvwa Jesu watsi: “Myekeleni; nimhluphelani? Ngobe wente umsebenti lomuhle kakhulu kimi.

⁷ Labamphofu nihlala nabo onkhe emalanga, nome ngunini nanitsandzako ningabentela lokuhle; kodvwa mine aninawuhlala nami sonkhe sikhatsi.

⁸ Naye-ke wente loko langahle akwente, ugcobise umtimba wami awulungiselela kungcwatjwa usengakangcwatjwa.

⁹ Ngicinisile, ngitsi kini: Nome kukuphi lapho liVangeli liyawushunyayelwa khona emhlabeni wonkhe, loku lakwentile kuyawuba sikhumbuto ngaye.”

Judasi ulungiselela kutsengisa ngaJesu

¹⁰ Judasi Skariyothe, labengulomunye walababeli-12, waya kubaphristi labakhulu wayawutsengisa ngaJesu.

¹¹ Batsi nabakuva loko, bajabula bafa, bametsembisa kumnika imali. Wacala-ke Judasi wafuna litfuba lelikahle lekunikela Jesu kubo.

Jesu nebafundzi bakhe badla Sidlo seliPhasika

¹² Ngelilanga lekucala leMkhosi Wesinkhwa Lesingenambiliso, mhla kunikelwa imvana yeliPhasika, bafundzi baJesu baya kuye bambuta batsi: “Ungatsandza kutsi siyekulungiselela kuphi Sidlo seliPhasika?”

¹³ Jesu watfumela bafundzi bakhe lababili watsi kubo: “Hambani niye edolobheni, niyawuhlangabetana nemuntfu etfwele imbita yemanti; nibomlandzela.

¹⁴ Nitawufike nikhulume nalomnikati wendlu, latawungena kuyo lomuntfu, nitsi: ‘UMfundzisi utsi: “Liphi likamelo lapho ngingadlela khona liPhasika ngikanye nebafundzi bami?” ’

¹⁵ Lomnikati wendlu utanikhombisa likamelo lelikhulu lelingetulu, lelilungiswe kahle; bese nisilungiselela khona.”

¹⁶ Bafundzi bahamba-ke baya edolobheni, bakhandza kunjengobe Jesu abebatjelile; bavele basilungiselela Sidlo seMkhosi weliPhasika.

¹⁷ Kwatsi sekuhlwile, Jesu wefika akanye nebafundzi bakhe labali-12.

¹⁸ Batsi basadla, Jesu watsi kubo: “Ngicinisile, ngitsi kini: Lomunye emkhatsini wenu, nine lenidla kanye nami, utangitsengisa.”

¹⁹ Bacala kudzabuka, kwaba ngulowo watibutela yena atsi: “Kungabe ngimi yini?”

²⁰ Jesu watsi kubo: “Ngulomunye wenu nine labali-12, lowo lowenya lucetu lwesinkhwa ndishi yinye nami.

²¹ Vele kambe iNdvodzana yeMuntfu itawufa, njengobe kubhaliwe ngayo; kodvwa maye kulowo muntfu iNdvodzana yeMuntfu letawutsengiswa ngaye! Bekuyawuba ncono kulowo muntfu kube mane akatalwanga.”

Kumiswa kweSidlo seNkhosi

²² Batsi basadla, Jesu watsatsa sinkhwa, wabusisa, wase uyasihlephula, wabanika watsi: “Tsatsani, loku ngumtimba wami.”

²³ Watsatsa nendzebe, watsi nasabongile, wabanika, bonkhe banatsa kuyo.

²⁴ Watsi kubo: “Loku kuyingati yami yesivumelwane, lecitselwa labanyenti.

²⁵ Ngicinisile, ngitsi kini: Angeke ngiphindze nginatse kulesitselo semvini, kuyawudzimate kube ngulelo langa nase ngisinatsa sisisha embusweni waNkulunkulu.”

²⁶ Batsi kube bacedze kuhlabela ingoma yekubonga, baphuma baya eNtsabeni Yemincumo.

Jesu ucaphelisa Phetro

²⁷ Jesu watsi kubafundzi bakhe: “Nonkhe nitangihlamuka, ngobe kubhaliwe kutsi: “ ‘Ngiyawushaya ngibulale umelusi, timvu tiyawuhlakateka.’

²⁸ “Kodvwa nase ngivusiwe kulabafile, ngiyawuhamba ngembili kwenu ngiye eGalile.”

²⁹ Kepha Phetro watsi kuye: “Nome bangakuhlamuka bonkhe, mine ngingeke.”

³⁰ Jesu watsi kuye: “Ngicinisile, ngitsi kuwe: Kubo lobusuku balamuhla, lichudze litawutsi lingakakhali kwesibili, wena utabe sewungiphike katsatfu.”

³¹ Kepha Phetro wagcizelela watsi: “Nome bangangibulala kanye nawe, mine ngeke ngikuphike.” Bafundzi bonkhe basho njalo.

Jesu uthandaza eGetsemane

³² Besuka lapho baya endzaweni lekwakutsiwa yiGetsemane, Jesu watsi kubafundzi bakhe: “Hlalani lapha, mine ngisaya kukhuleka.”

³³ Watsatsa boPhetro, naJakobe, naJohane, wachubachubeka nabo. Wafikelwa ngumunyu nekudzabuka nekwesaba,

³⁴ watsi kubo: “Umphefumulo wami ucindzetelwe lusizi, ngidzabuke lokwekufa. Salani lapha nilindze.”

³⁵ Yena wachubachubeka libangana, watilahla phansi, wakhuleka kutsi sendlule kuye lesikhatsi selusizi, nakungenteka.

³⁶ Watsi: “Aba, Babe, konkhe kungenteka kuwe. Yendlulise kimi lendzebe yelusizi, noko kungayi ngentsandvo yami kodvwa kuye ngentsandvo yakho.”

³⁷ Weta kubafundzi labatsatfu wabakhandza sebalele, watsi kuPhetro: “Simoni, ulele? Ungabe usalindza neli-awa linye nje?

³⁸ Lindzani nikhuleke kuze ningangeni ekulingweni. Umoya uyavuma, kodvwa inyama ibutsakatsaka.”

³⁹ Wabuyela futsi wayawuthandaza, asho wona lawo mavi.

⁴⁰ Waphindza wabuyela kulabafundzi labatsatfu, wabakhandza balele. Phela emehlo abo abesindvwa butfongo, behluleka kutsi bangamphendvula batsini.

⁴¹ Wabuya kwesitsatfu watsi kubo: “Kantsi nisalele nanyalo? Nisaphumulile? Sekwenele; sikhatsi sesifikile. Ase nibuke-ke, iNdvodzana yeMuntfu seyiniketwa etandleni tetoni.

⁴² Sukumani sambe! Bukani nangu longitsengisako asakhona.”

Kuboshwa kwaJesu

⁴³ Masinyane nje asakhuluma, kwatseleka Judasi, lomunye walabebali-12. Abehamba nesicuku lesikhulu sebantfu sihlome ngetinkemba nangetindvuku, sitfunywe baphristi labakhulu, netati temtsetfo kanye netibondza.

⁴⁴ Lona labemtsengisa-ke abebanike siboniso watsi: “Lowo lengitamanga, nguye-ke lowo. Nimbambe, niphume naye, nimbone angaphunyuli.”

⁴⁵ Watsi kube efike nje Judasi wacondza ngco kuJesu, watsi: “Mfundzisi!” Wamanga.

⁴⁶ Batselekela Jesu, bambamba, bambopha.

⁴⁷ Kodvwa lomunye walabo lababeme eceleni kwaJesu wahoshula inkemba yakhe wagalela esigcilini semPhristi Lomkhulu, wasihhumbula indlebe.

⁴⁸ Jesu watsi kubo: “Nidzimate nihlome kangaka, shangatsi nihlomele sigebengu, niphetse tinkemba netagila nje, kantsi nitewubamba mine.

⁴⁹ Imihla nemalanga bengihlala nani ethempelini ngifundzisa, anizange seningibophe. Kodvwa kufanele kugcwaliseke umBhalo.”

⁵⁰ Bonkhe bafundzi bakhe bamshiya babaleka.

⁵¹ Lelinye libhungu lalilandzela Jesu, lembetse indvwangu yelineni kuphela. Batsi bayalibamba,

⁵² laphunyula labashiya babambe lendvwangu, lacela empunzini, lingcunu.

Jesu embikweLiqoqo

⁵³ Bachuba Jesu bammikisa kumPhristi Lomkhulu; bonkhe baphristi labakhulu, netibondza, netati temtsetfo tabutsana khona.

⁵⁴ Phetro wamlandzela ahambela emuva le, waze wangena ebaleni lakamPhristi Lomkhulu. Wefika wahlala kanye nabogadzi, wotsa umlilo.

⁵⁵ Baphristi labakhulu kanye neLiqoqo lonkhe bafuna bufakazi labangahle bambeke licala ngabo Jesu, khona batemlahla ngelicala lekufa, kodvwa abazange babutfole ngisho nabunye.

⁵⁶ Labanyenti baletsa bufakazi bemanga ngaye, kodvwa nalobo bufakazi babo abuzange buhlangane.

⁵⁷ Labanye basukuma bafakaza emanga ngaJesu, batsi:

⁵⁸ “Simvile tsine atsi: ‘Ngitalibhidlita lelithempeli lelakhiwe ngetandla, ngibuye ngakhe lelinye lelingakakhiwa ngetandla tebantfu, ngilakhe ngemalanga lamatsatfu.’ ”

⁵⁹ Nakhona lapho bufakazi babo abuzange buhlangane.

⁶⁰ UmPhristi Lomkhulu wasukuma wema emkhatsini wabo bonkhe, wabuta Jesu watsi: “Awutiphendvuleli ngani kuloku labakushoko ngawe labantfu?”

⁶¹ Kodvwa Jesu wathula, wangete wamphendvula. Waphindza futsi umPhristi Lomkhulu wambuta watsi: “Unguye yini Khristu, iNdvodzana yaLobongekako?”

⁶² Jesu watsi: “Nginguye; ngitsi: Niyawuyibona iNdvodzana yeMuntfu ihleti ngesekudla saSomandla, ita ngemafu elizulu.”

⁶³ UmPhristi Lomkhulu wadzabula imijiva yakhe, atsi: “Sisabufunelani lobunye bufakazi?

⁶⁴ Nikuvile kuhlambalata kwakhe. Nitsini-ke nine?” Bonkhe bamlahla ngelicala, batsi kufanele abulawe.

⁶⁵ Labanye bamkhafulela ngematse, bammbonya buso bakhe, bamshaya batsi: “Phrofetha!” Nabogadzi imbala bammukula.

Phetro uphika Jesu

⁶⁶ Phetro asehleti entansi nelibala, kweta kuye intfombatana leyayingulesinye setisebenti temPhristi Lomkhulu;

⁶⁷ yatsi kube ibone Phetro otsa umlilo, yambuka yase itsi kuye: “Nawe futsi bewuhamba naye lomNazaretha longuJesu.”

⁶⁸ Kodvwa waphika Phetro watsi: “Angati, futsi angikuva nekutsi ukhuluma ngani.” Waphumela ngephandle esibuyeni. [Lichudze lase liyakhala.]

⁶⁹ Yaphindza yambona lentfombatana, yase ikhuluma nalababeme naye yatsi: “Lo, ungulomunye wabo.”

⁷⁰ Kodvwa Phetro waphindze waphika. Emvakwesikhashana lababeme naye batsi kuPhetro: “Kuliciniso kutsi ungulomunye wabo, ngobe naku ungumGalile.”

⁷¹ Kodvwa Phetro wafunga aticalekisa, watsi: “Angimati lomuntfu lenikhuluma ngaye!”

⁷² Masinyane lichudze lakhala kwesibili. Nembala Phetro wawakhumbula emagama aJesu ngesikhatsi atsi kuye: “Lichudze lingakakhali kwesibili wena utawube sewungiphike katsatfu.” Wadzabuka kakhulu enhlitiyweni yakhe, wakhala.