Makho 11 - Siswati 1996 Bible

Jesu ungena eJerusalema ngeludvumo

¹ Batsi kube basondzele eJerusalema sebasedvute naseBhethifage neBhetani, ngaseNtsabeni Yemincumo, Jesu watfumela bafundzi bakhe lababili,

² watsi kubo: “Hambani nize ningene edolobhaneni lelimacondzana nani; nitawukhandza kukhungwe litfole lembongolo, lelingazange seligitjelwe. Nifike nilikhumule, nililetse la.

³ Nakukhona lonibutako atsi: ‘Nikwentelani loko?’ nibotsi: ‘INkhosi iyalidzinga, italibuyisa masinyane.’ ”

⁴ Bahamba-ke labo lababili balikhandza lelitfole likhungwe ngasesangweni, ngephandle kwemuti, ngasemgwacweni, balitfukulula.

⁵ Labo lababeme lapho bababuta batsi: “Nentani? Nilikhumulelani lelitfole?”

⁶ Babatjela loko labebakutjelwe nguJesu; nembala bantfu babayekela bahamba.

⁷ Baliletsa kuJesu lelitfole. Bagaca tingubo tabo etikwalo, Jesu waligibela.

⁸ Labanyenti bendlala tingubo tabo emgwacweni, labanye bendlala emagala etihlahla labebawagawule esigangeni.

⁹ Labo labebahamba embili nalabebahamba ngemuva babememeta batsi: “Hosana! Ubusisiwe lotako egameni leNkhosi!

¹⁰ Ubusisiwe umbuso lotako wababe Davide! Hosana kulelisetikwako konkhe!”

¹¹ Jesu wangena-ke eJerusalema, wacondza ngekhatsi ethempelini. Watsi kube acedze kubuka konkhe, wase uyengca uya eBhetani ngobe kwase kuhlwile, abehamba kanye nebafundzi bakhe lababeli-12.

Jesu ucalekisa umkhiwa

¹² Ngakusasa nase babuya eBhetani, Jesu wativa asalambile.

¹³ Wabona bucalu sihlahla semkhiwa sinemacembe, waya kuso ayewufuna emakhiwa. Watsi uyefika wakhandza kute, kungemacembe odvwa, ngobe bekungesiso sikhatsi semakhiwa.

¹⁴ Watsi kulesihlahla: “Sale kubate muntfu loyakudla emakhiwa la kuwe nanini.” Bafundzi bakhe bamuva nakasho njalo.

Jesu ucitsa lababhizinisa ethempelini

¹⁵ Befika eJerusalema. Jesu wangena ethempelini wakhipha bonkhe lababetsenga nalababetsengisa. Wagumbucela ematafula alababentjintja timali kanye netihlalo talabebatsengisa ngematuba.

¹⁶ Abengavumeli muntfu kutsi ahambe adzabule emabaleni elithempeli atfwele.

¹⁷ Wabafundzisa watsi: “Akashongo yini Nkulunkulu emBhalweni wakhe watsi: ‘Indlu yami iyawubitwa ngekutsi yindlu lapho kuthandaza khona tonkhe tive’? Kodvwa nine seniyigucule yaba ngumhume wabosidlani!”

¹⁸ Baphristi labakhulu kanye netati temtsetfo batsi kube bakuve loko, bafuna indlela lababengabulala ngayo Jesu, ngobe phela babemesaba, kwatise kutsi tonkhe ticuku tatitsatsekile ngalemfundziso yakhe, timangele.

¹⁹ Kwatsi nakuhwalala Jesu nebafundzi bakhe baphuma edolobheni laseJerusalema.

Sifundvo ngemkhiwa lose ubunile

²⁰ Ekuseni nase babuyela emuva, basibona lesihlahla semkhiwa sesome ngisho netimphandze taso.

²¹ Phetro wayikhumbula indzaba yangayitolo, wase utsi: “Mfundzisi, buka lesa sihlahla losicalekise itolo, sesomile.”

²² Jesu wakhuluma kubo watsi: “Kholwani kuNkulunkulu.

²³ Ngicinisile, ngitsi kini: Nome ngubani loyawutsi kulentsaba: ‘Cukuleka uyewuphonseka le elwandle,’ angangabati enhlitiyweni yakhe, kodvwa akholwa kutsi loko lasakushito kutakwenteka, uyakwentelwa kona.

²⁴ Ngako-ke ngitsi kini: Konkhe leniyawukucela ngemkhuleko, kholwani kutsi seninako, niyawube seniyaphiwa-ke.

²⁵ Ngaso sonkhe sikhatsi nanithandazako, nibobacolela leniphambene nabo, kuze kutsi neYihlo losezulwini anitsetselele tono tenu. [

²⁶ Kodvwa naningatsetselelani, neYihlo losezulwini angeke anitsetselele emacala enu.]”

Umbuzo ngeligunya laJesu

²⁷ Babuyela-ke eJerusalema; watsi asaya ethempelini, baphristi labakhulu netati temtsetfo netibondza beta kuye,

²⁸ bambuta batsi: “Ulitsatsaphi ligunya lekwenta letintfo, kona ngubani lokunike leligunya lekutenta?”

²⁹ Jesu watsi: “Nami ngitanibuta livi libe linye; naninginika imphendvulo, ngitanitjela kutsi leligunya lengenta ngalo letintfo, ngilitsatsaphi.

³⁰ Ase ningitjele kutsi umbhabhatiso waJohane bewuphuma kuNkulunkulu yini nome bewuphuma kubantfu?”

³¹ Bacale bakhulumisana bodvwana batsi: “Nasitsi: ‘KuNkulunkulu,’ utawutsi: ‘Animkholwanga ngani kepha?’

³² Kodvwa nasingatsi: ‘Kubantfu,’ ngeke silunge.” Phela babesaba bantfu, ngobe bonkhe bebabambelele ekutseni Johane abengumphrofethi cobo.

³³ Ngako base baphendvula Jesu batsi: “Awu, asati.” Jesu-ke yena watsi: “Nami-ke ngeke nginitjele kutsi letintfo ngitenta ngaliphi ligunya.”