Makho 10 - Siswati 1996 Bible

Jesu ufundzisa ngekudivosana kwalabashadile

¹ Jesu wesuka lapho waya eveni laseJudiya adzabula live lelingesheya kweJordane. Ticumbi letikhulu tebantfu taphindza tabutsanela kuye, watifundzisa njengenhlalayenta.

² Kwase kuta baFarisi kuye batakumlinga, bambuta batsi: “Kuvumelekile yini emtsetfweni kutsi indvodza idivose umkayo?”

³ Jesu wabaphendvula watsi: “Mosi waniyala watsini?”

⁴ Batsi bona: “Mosi wasivumela kutsi indvodza ingayibhala incwadzi yedivosi imlahle umkayo.”

⁵ Kodvwa Jesu watsi kubo: “Mosi wanibhalela loko ngenca yebulukhuni betinhlitiyo tenu.

⁶ Kodvwa ekucaleni kwendalo ‘uMdali wenta umuntfu lomdvuna nalomsikati.

⁷ Ngaloko-ke indvodza iyawushiya uyise nenina [inamatsele kumkayo] ,

⁸ labo bobabili sebayawuba nyamanye.’ Ngako-ke abasebabili, sebamunye.

⁹ Loko losekuhlanganiswe nguNkulunkulu, akungabe kusehlukaniswa ngumuntfu.”

¹⁰ Sebasendlini, bafundzi bakhe bambuta futsi ngalendzaba.

¹¹ Watsi kubo: “Lowo lodivosa umkakhe bese utsatsa lomunye umfati, unelicala kumkakhe lekuphinga.

¹² Nalowo lodivosa indvodza yakhe bese wendza kulenye indvodza, unelicala endvodzeni yakhe lekuphinga.”

Jesu ubusisa bantfwana

¹³ Labanye bantfu baletsa bantfwana kuye, khona atewubeka tandla etikwabo ababusise; bafundzi babakhalimela.

¹⁴ Kodvwa watsi kube akubone loko Jesu, watfukutsela watsi kubo: “Vumelani bantfwana bete kimi, ningabavimbeli, ngobe umbuso waNkulunkulu walabanjalo.

¹⁵ Ngicinisile, ngitsi kini: Lowo longawemukeli umbuso waNkulunkulu njengemntfwana, angeke angene kuwo.”

¹⁶ Wabatsatsa labantfwana, wabagona, wabeka tandla etikwabo, wababusisa.

Indvodza lenjingile

¹⁷ Kwatsi Jesu nasatawuhamba, kwachamuka indvodza ita igijima, yefika yaguca embikwakhe yambuta yatsi: “Mfundzisi lolungile, ngingentani kuze ngitfole kuphila lokuphakadze?”

¹⁸ Jesu watsi kuye: “Ungibitelani ngekutsi ngilungile? Kute lolungile, nguNkulunkulu kuphela.

¹⁹ Uyayati imiyalo letsi: ‘Ungabulali, ungaphingi, ungebi, ungafakazi emanga, ungatsatsi lutfo ngebucili, hlonipha uyihlo nenyoko.’ ”

²⁰ Yamphendvula yatsi: “Mfundzisi, konkhe loko ngakugcina kusukela ebuntfwaneni bami.”

²¹ Jesu asambuka wamtsandza watsi kuye: “Kunye lokusasele kutsi ukwente: Hamba uyewutsengisa ngako konkhe lonako, wabele labamphofu lemali, khona uyawuba

²² nemcebo ezulwini, bese-ke uyeta uyangilandzela.” Yajabha kakhulu nayikuva loko, ngobe beyinjinge kakhulu, yahamba umoya wayo sewushone phansi.

²³ Jesu wabuka bafundzi bakhe watsi kubo: “Maye, kuyawuba lukhuni kulabo labanjingile kungena embusweni waNkulunkulu!”

²⁴ Bafundzi bakhe bamangala ngalawo mavi akhe. Kodvwa Jesu waphindze watsi kubo: “Bantfwabami, kumatima kungena embusweni waNkulunkulu.

²⁵ Kulula kungena kwelikamela embotjeni yenyalitsi kunekungena kwemuntfu lonjingile embusweni waNkulunkulu.”

²⁶ Bafundzi bamangala kakhulu babutana bodvwana batsi: “Kepha nakunjalo, ngubani longasindziswa?”

²⁷ Jesu wababuka emehlweni wase utsi: “Kubantfu kungeke kwenteke loku, kodvwa kuNkulunkulu kungenteka, ngobe kuNkulunkulu konkhe kuyenteka.”

²⁸ Phetro watsi kuye: “Buka la, tsine sishiye konkhe, salandzela wena.”

²⁹ Jesu watsi: “Ngicinisile, ngitsi kini: Lowo loshiye umuti, nome bomnakabo, nome bodzadzewabo, nome unina, nome uyise, nome bantfwana, nome emasimi, ngenca yami nangenca yeliVangeli,

³⁰ uyakwemukeliswa lokunyenti aselapha kulomhlaba. Uyawuphiwa ngalokuphindvwe kalikhulu: imiti, nabomnakabo, nabodzadzewabo, nabonina, nebantfwana, nemasimi, yebo, ngisho netinhlupheko, bese kutsi kulelitako atfole kuphila lokuphakadze.

³¹ Labanyenti lababekucala bayawuba bekugcina, nalabo lababekugcina bayawuba bekucala.”

Jesu ukhuluma kwesitsatfu ngekufa kwakhe

³² Batsi basendleleni benyukela eJerusalema, Jesu abahola embili, bafundzi bakhe bebasamangele, nalabo labebamlandzela befikelwa kwesaba. Waphindza watsatsa bafundzi bakhe labali-12, wakhweshela nabo eceleni, wabafundzisa, abatjela ngaloko lebekutamehlela,

³³ watsi: “Ase nilalele la, sesenyukela eJerusalema, iNdvodzana yeMuntfu itawunikelwa kubaphristi labakhulu nasetatini temtsetfo, batayilahla ngelicala kutsi ibulawe. Batayinikela kubetive.

³⁴ Batawuhlekisa ngayo, bayikhafulele ngematse, bayibhambabule, bayibulale, kodvwa kuyawutsi ngelilanga lesitsatfu ivuke kulabafile.”

Sicelo saJakobe naJohane

³⁵ BoJakobe, naJohane, emadvodzana aZebedi, basondzela kuJesu batsi: “Mfundzisi, kukhona lesicela kutsi usentele kona.”

³⁶ Wababuta watsi: “Nifuna nginenteleni?”

³⁷ Batsi kuye: “Sicela kutsi lomunye wetfu ahlale ngesekudla sakho, lomunye ahlale ngesancele sakho ebukhosini bakho.”

³⁸ Kodvwa Jesu watsi kubo: “Anikwati lenikucelako. Nitakumela yini kuyinatsa lendzebe yelusizi lengitayinatsa nome kubhajatiswa ngalombhabhatiso lengitawubhajatiswa ngawo mine?”

³⁹ Batsi kuye: “Singakumela.” Jesu watsi kubo: “Yebo kona, lendzebe lengitayinatsa nani nitayinatsa; nangalombhabhatiso lengitawubhajatiswa ngawo nani nitawubhajatiswa ngawo.

⁴⁰ Kodvwa tikhundla tekuhlala ngesekudla nome ngesancele sami akusiko kwami kutsi ngephane ngato; kodvwa talabo labalungiselelwe tona nguNkulunkulu.”

⁴¹ Batsi nabakuva loko lababelishumi, babacansukela boJakobe naJohane.

⁴² Jesu wababita wabatjela watsi: “Niyati kutsi babusi betive babusa etikwato, netikhulu tato titiphetse ngesandla lesimatima.

⁴³ Kodvwa akukafaneli kutsi kube njalo kini, lowo lofuna kuba ngulomkhulu kini nonkhe, akabe sisebenti senu nonkhe.

⁴⁴ Nalowo lofuna kuba wekucala kini, akabe sigcili senu nonkhe.

⁴⁵ Ngobe neNdvodzana yeMuntfu ayitelanga kutawukhontwa, kodvwa yetela kutawukhonta, nekunikela ngekuphila kwayo kutsi ibe yinhlawulo yalabanyenti.”

Jesu uphilisa Bhathimeyosi loyimphumphutse

⁴⁶ Befika eJerikho. Jesu nase aphuma khona kanye nebafundzi bakhe, nesicuku lesikhulu sebantfu, Bhathimeyosi, imphumphutse, umsa waThimeyosi, abehleti ngasemgwacweni acela kuphiwa.

⁴⁷ Watsi kube eve kutsi nguJesu waseNazaretha, wamemeta kakhulu atsi: “Jesu, Ndvodzana yaDavide! Ngihawukele!”

⁴⁸ Labanyenti bamkhahlameta, batsi akathule; kodvwa kwaba shangatsi bambangile, washo kakhulu watsi: “Ndvodzana yaDavide, ngihawukele!”

⁴⁹ Jesu wema watsi: “Mbiteni.” Bayibita lemphumphutse, batsi: “Ungesabi, sukuma, uyakubita Jesu.”

⁵⁰ Yalahla phansi lijazi layo, yasukuma yabanga kuJesu.

⁵¹ Jesu wayibuta watsi: “Ufuna ngikwenteleni?” Lemphumphutse yatsi: “Mfundzisi wami, mane ngibone nje.”

⁵² Jesu watsi kuyo: “Hamba; kukholwa kwakho kukuphilisile.” Masinyane avuleka emehlo ayo abona, yase ilandzela Jesu eluhambeni lwakhe.