Lukha 9 - Siswati 1996 Bible

Jesu utfumela bafundzi bakhe labali-12

¹ Jesu wabita bafundzi bakhe labali-12 watsi abasondzele kuye; wase ubanika emandla, neligunya lekukhipha emadimoni nekuphilisa labanetifo.

² Wase uyabatfuma kutsi bayewushumayela umbuso waNkulunkulu baphilise nalabagulako.

³ Watsi kubo: “Ningaphatsi lutfo lwalendlela, ningaphatsi naludvondvolo lwekudvondvolotela, nemgodla wetihambi, nekudla, nemali, ngisho nemphahla yekuntjintja.

⁴ Lapho banemukela khona, hlalani kulelo khaya nize nihambe kulelo dolobha.

⁵ Lapho banganemukeli khona lishiyeni lelo dolobha, nitsintsitse lutfuli etinyaweni tenu, kuze kube bufakazi bekunala kwabo.”

⁶ Bahamba-ke, bangenela imiti ngemiti bashumayela liVangeli, baphilisa kuto tonkhe tindzawo.

Kudzidzeka kwaHerodi

⁷ Herodi, inkhosi yaseGalile, weva ngato tonkhe letintfo letatenteka; wadzidzeka kakhulu, ngobe labanye bantfu bebatsi: “Johane uMbhabhatisi sewuvukile ekufeni;”

⁸ labanye bebatsi ngu-Elija lotibonakalisile; kantsi labanye bebatsi ngulomunye webaphrofethi basendvulo lovuke ekufeni.

⁹ Herodi watsi: “Ngayijuba inhloko yaJohane; kodvwa manje sengubani lona lesengiva ngaye konkhe loku?” Wase wetama kumbona.

Jesu wesutsisa sicumbi lesinemadvodza lati-5 000

¹⁰ Nase babuyile baphostoli, bafike batjela Jesu konkhe lababekwentile. Wase uhamba nabo uya edolobheni eBhethsayida.

¹¹ Tatsi kube tikuve loko leticumbi tebantfu, tamlandzela. Watemukela, wakhuluma ngembuso waNkulunkulu, waphilisa nalabo bebadzinga kuphiliswa.

¹² Nalishonako lilanga, baphostoli labali-12 beta kuye batsi: “Bacitse labantfu bahambe baye emitini nasemakhaya bayewutifunela kudla kanye nendzawo yekulala, ngobe ilihlane kakhulu lendzawo lesikuyo.”

¹³ Kodvwa Jesu watsi kubo: “Banikeni nine matfupha labangahle bakudle.” Baphendvula batsi: “Lesinako tinkhwa letisihlanu netinhlanti letimbili, ngaphandle kwekutsi siyewutsenga lokunye sitekwengeta, kuze kutekwenela bonkhe labantfu.”

¹⁴ Bekungaba ti-5 000 temadvodza labelapho. Jesu watsi kubafundzi bakhe: “Hlalisani labantfu ngema-50 sicumbi sisinye.”

¹⁵ Bafundzi bakhe benta njengobe abeshito, babahlalisa phansi bonkhe.

¹⁶ Jesu wase utsatsa letinkhwa letisihlanu netinhlanti letimbili wabuka ezulwini, watibusisa, watihlephula wase utinika bafundzi bakhe kutsi babele bantfu.

¹⁷ Bonkhe badla besutsa; bafundzi base babutsa timvutfuluka letatisele, kwagcwala emabhasikidi lali-12.

Phetro uvuma kutsi Jesu unguKhristu

¹⁸ Kwatsi Jesu asathandaza yedvwana bafundzi bakhe banaye, wababuta watsi: “Bantfu batsi ngingubani?”

¹⁹ Bafundzi bamphendvula batsi: “Labanye batsi unguJohane uMbhabhatisi, labanye batsi ungu-Elija, kantsi labanye batsi ungulomunye webaphrofethi basendvulo uvukile ekufeni.”

²⁰ Wababuta watsi: “Nine nitsi ngingubani?” Phetro wamphendvula watsi: “UnguKhristu waNkulunkulu.”

Jesu ukhuluma kwekucala ngekuhlupheka nekufa kwakhe

²¹ Jesu wabadvonsa ngendlebe watsi loko bangakutjeli muntfu,

²² wachubeka watsi: “INdvodzana yeMuntfu ifanele kuhlupheka kakhulu, ilahlwe tibondza tenkholo, nebaphristi labakhulu nebafundzisi bemtsetfo. Iyawubulawa, ivuswe ekufeni ngelilanga lesitsatfu.”

²³ Wase utsi kubo bonkhe: “Lofuna kungilandzela, kufanele atidzele, etjatse siphambano sakhe onkhe emalanga, angilandzele.

²⁴ Ngobe lofuna kusindzisa imphilo yakhe, uyawulahlekelwa ngiyo, kodvwa lolahlekelwa yimphilo yakhe ngenca yami, uyakuyisindzisa.

²⁵ “Kodvwa kuyawumbuyiselani umuntfu kuzuza live lonkhe, bese ulahlekelwa nguye lucobo lwakhe nome abhujiswe?

²⁶ Nangabe umuntfu unemahloni ngami nangemavi ami, neNdvodzana yeMuntfu iyawuba nemahloni ngaye nayita ngenkhatimulo yayo nangebukhosi beYise kanye neyetingilosi letingcwele.

²⁷ Ase nginitjele naliciniso kutsi, bakhona lapha emkhatsini wenu labangeyikufa bangakawuboni umbuso waNkulunkulu.”

Kugucuka kwesimo saJesu

²⁸ Ngemuva kweliviki akushito loko, Jesu watsatsa boPhetro, naJohane, naJakobe wenyukela nabo entsabeni ayewuthandaza.

²⁹ Asathandaza buso bakhe bagucuka, netimphahla takhe taba mhlophe tamengetela.

³⁰ Kusenjalo kwabonakala emadvodza lamabili asakhuluma naye, kwakuboMosi na-Elija;

³¹ babonakala ngebukhatikhati banenkhatimulo yasezulwini bakhuluma naJesu ngeluhambo lwakhe belutawugcwaliseka eJerusalema lokwakuyinjongo yaNkulunkulu.

³² Phetro nebangani bakhe babephetfwe butfongo lobukhulu, kodvwa babebhekile bayibona inkhatimulo yaJesu kanye nalamadvodza.

³³ Atsi nasehlukana lamadvodza, Phetro watsi kuye: “Mfundzisi, kuhle lokutsi sibe lapha. Asakhe emathende lamatsatfu: lelinye libe lakho, lelinye libe laMosi, lelinye libe la-Elija.” Empeleni abengati kutsi utsini.

³⁴ Asakhuluma loko, kwachamuka lifu labasitsa ngesitfunti salo, bafundzi besaba nababona kusondzela lelifu.

³⁵ Kwase kuvakala livi liphuma kulelifu litsi: “Lena yiNdvodzana yami, lengiyikhetsile, yilaleleni!”

³⁶ Latsi libindza lelivi, kwabesekusele Jesu yedvwana. Bafundzi bakufihla loko, abazange batjele muntfu ngalababekubonile ngalawo malanga.

Jesu uphilisa umfana lonemoya lomubi

³⁷ Ngakusasa sebehlile entsabeni, sicumbi lesikhulu seta sihlangabeta Jesu.

³⁸ Kwase kumemeta indvodza emkhatsini waso itsi: “Mfundzisi, ase ungibonele nangu umsa wami, indvodzana yekuphela.

³⁹ Kunemoya lomhlaselako ummemetise kakhulu, bese uba nesitfutfwane, aze akhihlite emagwebu emlonyeni; kumshumphisa kangangekutsi uze ehluleke ngisho nekuhamba, kulukhuni kuphuma kwawo.

⁴⁰ Ngancenga bafundzi bakho kutsi bawukhiphe lomoya, kodvwa behluleka.”

⁴¹ Jesu waphendvula watsi: “Yehheni, nine situkulwane lesonakele nalesingakholwa, ngiyawuhlala nani kuze kube ngunini nginibeketelela? Mletse lapha lomsa wakho.”

⁴² Watsi naketa lomfana, lidimoni lamjika phansi, waba nesitfutfwane. Jesu wawekhuta lomoya lomubi, wamphilisa lomfana, wase umbuyisela kuyise.

⁴³ Bonkhe bantfu bamangala ngalamandla aNkulunkulu lamakhulu kangaka. Bantfu bebasamangele ngako konkhe lokwakwentiwa nguJesu, nakatsi kubafundzi bakhe:

Jesu ukhuluma kwesibili ngekufa kwakhe

⁴⁴ “Ningabokukhohlwa naku lengitanitjela kona! INdvodzana yeMuntfu itawunikelwa etandleni tebantfu.”

⁴⁵ Kodvwa abazange bayive lenkhulumo kutsi isho kutsini, ngobe beyifihlakele kubo futsi ingevakali, kantsi babesaba nekumbuta ngalendzaba.

Ngubani lomkhulu kakhulu?

⁴⁶ Bafundzi baJesu babese bayaphikisana ngekutsi ngubani lomkhulu kunabo bonkhe.

⁴⁷ Kodvwa Jesu asabonile kutsi bacabangani, wase uletsa umntfwana, wammisa eceleni kwakhe.

⁴⁸ Wase utsi kubo: “Umuntfu lowemukela lomntfwana ngelibito lami, wemukela mine; nalowo lowemukela mine, wemukela lowo longitfumile. Ngobe lowo lomncane kakhulu kunani nonkhe, nguye lomkhulu kunani nonkhe.”

Longalwi nani ungakini

⁴⁹ Johane wakhuluma watsi: “Mfundzisi, sibone umuntfu akhipha emadimoni ngelibito lakho, samtjela satsi akakhawule, ngobe akahambisani natsi.”

⁵⁰ Jesu wase utsi kuye: “Ningamyekelisi, ngobe longalwi nani ungakini.”

Lidolobha laseSamariya lala kwemukela Jesu

⁵¹ Sekusele emalangana ekutsi Jesu atsatfwe ayiswe ezulwini, watimisela kutsi aye eJerusalema.

⁵² Watfumela titfunywa ngembili kwakhe, letesuka tangena edolobheni lemaSamariya kuyawumlungisela khona.

⁵³ Kodvwa bantfu balapho abazange bamemukele, ngobe kwakukhanya kutsi ucondze kuya eJerusalema.

⁵⁴ BoJakobe naJohane, bafundzi bakhe, nabakubona loku, batsi: “Nkhosi, uyafuna yini sibite umlilo wehle ezulwini ubacedze bonkhe?”

⁵⁵ Kodvwa Jesu wagucuka wabekhuta.

⁵⁶ Base bachubekela kulelinye lidolobha.

Labangaba balandzeli baJesu

⁵⁷ Basesendleleni, kwefika indvodza kuJesu yatsi: “Ngitakulandzela nome ngukuphi lapho uya khona.”

⁵⁸ Jesu watsi kuyo: “Timphungutja tinemigodzi, netinyoni tinetidleke, kodvwa iNdvodzana yeMuntfu ayinandzawo yekulala iphumule.”

⁵⁹ Wase utsi kulenye indvodza: “Ngilandzele!” Kodvwa yona yatsi: “Nkhosi, asewungivumele ngiyewungcwaba babe.”

⁶⁰ Jesu waphendvula watsi: “Yekela labafile bangcwabane bodvwana. Wena hamba uyewushumayela umbuso waNkulunkulu!”

⁶¹ Lenye indvodza yatsi: “Ngitakulandzela, Nkhosi, kodvwa asewungivumele sengiyewuvalelisa likhaya lami.”

⁶² Jesu watsi kuye: “Wonkhe lobambe likhuba alima bese ubuka emuva, akawufaneli umbuso waNkulunkulu.”