Lukha 7 - Siswati 1996 Bible

Jesu uphilisa sisebenti sendvuna yemaRoma

¹ Watsi nase akhulume konkhe loku kubantfu, wesuka waya eKhaphanawume.

² Indvuna yelibutfo lemaRoma yayinesisebenti leyayisitsandza kakhulu, sasigulela kufa.

³ Yatsi nayiva ngaJesu lendvuna, yatfumela kuye lamanye emaJuda lamadzala kutsi ayewucela Jesu kutsi ete ateyiphilisela lesisebenti sayo.

⁴ Befika kuJesu bamncengisisa batsi: “Impela lomuntfu ulufanele lusito lwakho.

⁵ Uyasitsandza sive sakitsi, futsi nguye lowasakhela lelisinagoge.”

⁶ Ngako Jesu wahamba nabo. Watsi nase asedvute nalapho ihlala khona lendvuna, yatfumela bangani bayo kuJesu kutsi bafike batsi: “Nkhosi, ungatihluphi ngekuta lapha. Angikafaneli nekutsi ngingakungenisa nasemtini wami,

⁷ ngako-ke, ngitikhandza ngingakafaneli nekutsi ngite kuwe. Mane usho livi nje, sisebenti sami sitawuphila.

⁸ Nami ngiyindvuna lephetfwe ngulabakhulu, nginemabutfo lengiwaphetse, ngitsi kulelinye: ‘Hamba!’ lihambe; ngitsi kulelinye: ‘Wota!’ lite; ngitsi esigcilini sami: ‘Yenta naku!’ sikwente.”

⁹ Jesu wamangala nakeva loku, wagucuka wabuka lesicumbi sebantfu lesasimlandzela watsi: “Angizange sengikubone kukholwa lokungaka ngisho naka-Israyeli imbala.”

¹⁰ Titfunywa tatsi tibuyela emuva endlini yalendvuna, takhandza lesisebenti sesiphilile.

Jesu uvusa indvodzana yemfelokati

¹¹ Emvakwaloko Jesu waya edolobheni lelalitsiwa yiNayini. Bafundzi bakhe nesicumbi sebantfu lesikhulu sasihamba naye.

¹² Nakefika esangweni lelidolobha, wahlangana nebantfu baya emngcwabeni. Lendvodzana lebeyifile beyiyemfelokati, futsi bekukuphela kwayo. Sicumbi sebantfu sasimsingatsile lomfelokati.

¹³ INkhosi yamdzabukela nayimbona lomfelokati yatsi kuye: “Ungakhali!”

¹⁴ Wahamba Jesu watsintsa loluhlaka lwalunalesidvumbu, bantfu lababelutfwele base bayema. Jesu watsi: “Ngitsi kuwe: Vuka, jaha!”

¹⁵ Lelijaha lelalifile lavuka lahlala ngetibunu, lacala lakhuluma. Jesu wase ulinika unina.

¹⁶ Bonkhe bantfu bafikelwa kwesaba, badvumisa Nkulunkulu batsi: “Sifikelwe ngumphrofethi lomkhulu!” Baphindze batsi: “Nkulunkulu sewubahambele bantfu bakhe!”

¹⁷ Lendzaba ngaJesu yandza neliJudiya lonkhe kanye netigodzi letatakhelene nalo.

Titfunywa letiphuma kuJohane uMbhabhatisi

¹⁸ Bafundzi baJohane bamtjela ngato tonkhe tintfo tatentiwa nguJesu. Johane wase ubita babili babo.

¹⁹ Wabatfumela eNkhosini kuyawubuta kutsi: “Unguye yini lona lofanele kufika, nome kusafanele silindzele lomunye?”

²⁰ Nase befikile kuJesu, befika batsi: “Johane uMbhabhatisi usitfumile kutsi sitewubuta kutsi: ‘Unguye yini lona lotawufika, nome kusafanele silindzele lomunye?’ ”

²¹ Ngaso leso sikhatsi Jesu waphilisa labanyenti labebaphetfwe ngimikhuhlane, netifo, nemadimoni, wavula emehlo etimphumphutse letinyenti.

²² Titfunywa taJohane watiphendvula watsi: “Ncandzekani nifike nimtjele konkhe lenikubone kwenteka nalenikuvile kukhulunywa: Timphumphutse tiyabona, tinchute netishosha tiyahamba, emalephelo ayaphiliswa, tihhulu tiyeva, labafile bayavuswa, neliVangeli liyashunyayelwa etimphuyeni.

²³ Maye, ubusisiwe lowo longangabati ngami!”

²⁴ Tatsi kube tihambe titfunywa taJohane, Jesu wacala wakhuluma eticunjini tebantfu watsi: “Ngesikhatsi niya kuJohane ehlane nanilindzele kubonani? Nanilindzele kubona tjani bulaliswa ngumoya yini?

²⁵ Naniyewubonani? Naniyele kuyawubona indvodza legcoke tingubo letinhle nje kuphela? Empeleni anati yini kutsi bantfu labahlobe ngemvunulo lenhle batfolakala etigodlweni?

²⁶ Ase ningitjele kahle nine, nanibheke kubonani? Umphrofethi? Yebo, ngiyanivumela, empeleni nabona lomkhulu kunalomphrofethi nanimbhekile.

²⁷ “Nguye loJohane imiBhalo lekhuluma ngaye kutsi: ‘Bheka, ngiyawutfumela sitfunywa sekungendvulela lesiyawungiphendlela indlela.’ ”

²⁸ Wachubeka watsi: “Ngiyanitjela ngitsi, akekho namunye, lotelwe ngumfati, lomkhulu kunaJohane, kepha loyo lomncane embusweni waNkulunkulu, mkhulu kunaye.”

²⁹ Bonkhe bantfu labebamlalele labebabhajatiswe nguJohane, ngisho nebatselisi imbala bavuma kutsi tindlela taNkulunkulu tilungile.

³⁰ Kodvwa baFarisi netati temtsetfo atiyemukelanga injongo yaNkulunkulu ngato, bala kubhajatiswa nguJohane.

³¹ Jesu wachubeka watsi: “Konje bantfu balesitukulwane ngingabafanisa nani nje?

³² Banjengebantfwana labahleti emakethe, lesinye sicumbi sabo simemeta lesinye sitsi: ‘Sanishayela tigubhu engomeni yesibhaca, kodvwa anizange nigidze; sahlabela tingoma temngcwabo, kodvwa anizange senikhale.’

³³ “Johane uMbhabhatisi wazila kudla wangete wanatsa neliwayini, nase nitsi: ‘Unelidimoni!’

³⁴ INdvodzana yeMuntfu yase iyefika, yona-ke yadla yanatsa, nase nitsi: ‘Ase nibheke! Lomuntfu usimiti nemnatsi, futsi ungumngani webatselisi netoni.’

³⁵ Noko inhlakanipho yaNkulunkulu ibonakaliswa iliciniso kulabo labayemukelako.”

Jesu ekhaya laSimoni umFarisi

³⁶ Jesu wamenywa ngumFarisi kutsi ete atewudla ekhaya kakhe. Nangempela Jesu waya wafike wadla.

³⁷ Kulelo dolobha bekunemfati labephila imphilo lengcolile; wase uyeva kutsi Jesu usadla endlini yemFarisi, ngako weta nemakha agcwele libhodlela lelalakhiwe ngembiza,

³⁸ wafike wema emvakwaJesu, ngasetinyaweni takhe akhala, taze tinyawo taJesu taba manti tinyembeti. Watesula ngetinwele takhe lomfati, watanga, watitsela ngemakha.

³⁹ Nakabona loko lomFarisi lobekameme Jesu, watsi enhlitiyweni yakhe: “Kube lomuntfu ungumphrofethi ngempela, ngabe uyati kutsi ungubani lomfati lomtsintsako. Ngabe uyati kutsi uphila imphilo leyonakele kangakanani.”

⁴⁰ Jesu wakhuluma waphumisela watsi: “Simoni, kukhona lengifuna kukutjela kona.” Waphendvula watsi: “Yebo, Mfundzisi, ngitjele.”

⁴¹ Jesu watsi: “Kwake kwaba khona emadvodza lamabili labekweleda umtjelekisi wetimali. Lenye yayimkweleda tinhlavu tesiliva letingema-500, lenye yayimkweleda tinhlavu tesiliva letingema-50.

⁴² Atsi kube ehluleke omabili kuyibuyisa lemali yakhe, wawacolela. Nguyiphi emkhatsini wawo leyamtsandza kakhulu?”

⁴³ Simoni waphendvula watsi: “Ngiyabona kutsi kufanele kube ngulena lebeyimkweleda kakhulu.” Watsi Jesu: “Uphendvule kahle.”

⁴⁴ Wase ugucukela kulomfati, utsi kuSimoni: “Uyambona lomfati? Seloku ngingenile lapha endlini yakho awukanginiki emanti ekugeza tinyawo tami, kodvwa yena sewugeze tinyawo tami ngetinyembeti takhe, waze watesula ngetinwele takhe.

⁴⁵ Wena awukangemukeli ngekunganga, kodvwa yena seloku efikile wanga tinyawo tami.

⁴⁶ Wena awukayigcobisi ngemafutsa inhloko yami, kodvwa yena sewugcobise tinyawo tami ngemakha.

⁴⁷ “Ngako-ke ngikutjela ngitsi: Tono takhe lebetitinyenti setitsetselelwe, ngobe unelutsandvo lolukhulu, kodvwa lowo lotsetselelwe lokuncane, utsandza kancane.”

⁴⁸ Wase utsi kulomfati: “Tono takho titsetselelwe.”

⁴⁹ Labanye labebahleti naye badla, bavungatela bodvwana batsi: “Ngubani lona lotsetselela netono?”

⁵⁰ Kodvwa Jesu wase utsi kulomfati: “Kukholwa kwakho kukusindzisile, hamba ngekuthula.”